ສະຫວັນນະເຂດຫາລືປ້ອງກັນໄພນ້ຳຖ້ວມ ແລະ ໄພແຫ້ງແລ້ງ

ກອງປະຊຸມປຶກສາຫາລືການປະເມີນທ່າແຮງພື້ນຖານໂຄງລ່າງຕໍ່ກັບການປ້ອງກັນ-ຫຼຸດຜ່ອນໄພນ້ຳຖ້ວມ ແລະ ໄພແຫ້ງແລ້ງ ໃນເຂດບ້ານເປົ້າໝາຍຂອງໂຄງການຄຸ້ມຄອງຊັບພະຍາກອນນ້ຳແບບເຊື່ອມສານໃນອ່າງຮັບນ້ຳເຊບັ້ງຫຽງໄດ້ຈັດຂຶ້ນໃນວັນທີ 4 ມີນາຜ່ານມາ ທີ່ຫ້ອງປະຊຸມພະແນກຊັບພະຍາກອນທຳມະຊາດ ແລະ ສິ່ງແວດ ລ້ອມແຂວງສະຫວັນນະເຂດ ໂດຍມີຄະນະນຳຈາກກົມຊັບພະຍາກອນນ້ຳ ກະຊວງຊັບພະຍາກອນທຳມະຊາດ ແລະສິ່ງແວດລ້ອມ, ມີບັນດາຜູ້ຕາງໜ້າຈາກພະແນກການ, ກົມກອງຕ່າງໆທີ່ກ່ຽວຂ້ອງຂອງແຂວງເຂົ້າຮ່ວມ. 
ໂອກາດນີ້, ທ່ານ ບູລິກາ ອິນທິລາດ ຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງສະຫວັນນະເຂດ ໄດ້ກ່າວເປີດກອງປະຊຸມວ່າ: ກອງປະຊຸມມື້ນີ້, ແມ່ນກອງປະຊຸມປຶກສາຫາລືກ່ຽວກັບການປະເມີນທ່າແຮງພື້ນຖານໂຄງລ່າງຕໍ່ກັບການປ້ອງກັນ ແລະ ຫຼຸດຜ່ອນໄພນ້ຳຖ້ວມ ແລະ ໄພແຫ້ງແລ້ງ ຊຶ່ງເປັນໂຄງການທີ່ໄດ້ຮັບການສະໜັບສະໜູນຈາກກອງທຶນສິ່ງແວດລ້ອມໂລກ (GEF) ໂດຍຜ່ານອົງການສະຫະປະຊາຊາດ ເພື່ອການພັດທະນາ (UNDP) ໄລຍະຈັດຕັ້ງປະຕິບັດໂຄງການນັບແຕ່ເດືອນສິງຫາ 2022-2025 ເປັນເວລາ 4 ປີ. ໂຄງການດັ່ງກ່າວ ມີຈຸດປະສົງ ເພື່ອສົ່ງເສີມການຄຸ້ມຄອງນ້ຳແບບເຊື່ອມສານໃນເຂດແມ່ນ້ຳຂອງ ເພີ່ມຄວາມທົນທານຕໍ່ຄວາມສ່ຽງດ້ານດິນຟ້າອາກາດຂອງຊຸມຊົນໃນແຂວງສະຫວັນນະເຂດ ທີ່ມີຄວາມສ່ຽງຕໍ່ໄພພິບັດນ້ຳຖ້ວມ ແລະໄພແຫ້ງແລ້ງ ທີ່ຮ້າຍແຮງໃນອະນາຄົດ. ພ້ອມດຽວກັນນັ້ນ, ການຈັດຕັ້ງປະຕິບັດໂຄງການດັ່ງກ່າວ ກໍຖືວ່າເປັນການຈັດຕັ້ງປະຕິບັດແຜນຄຸ້ມຄອງອ່າງຮັບນ້ຳ ທີ່ຖືກອະນຸມັດ ໂດຍສອດຄ່ອງກັບບັນດານະໂຍບາຍ, ຍຸດທະສາດ, ແຜນພັດທະນາເສດຖະກິດ-ສັງຄົມແຫ່ງຊາດ ແລະ ສອດຄ່ອງກັບແຜນພັດທະນາເສດຖະກິດ-ສັງຄົມຂອງແຂວງ ແລະ ເມືອງ. ໃນນີ້, ລວມມີແຜນພັດທະນາຂອງຂະແໜງການຕ່າງໆທີ່ກ່ຽວຂ້ອງ ເພື່ອເປັນການສົ່ງເສີມນະໂຍບາຍ, ຍຸດທະສາດ, ແຜນການ, ກົດໝາຍ ແລະ ນິຕິກຳອື່ນໆ ເພື່ອຮັບປະກັນການນຳໃຊ້ນ້ຳ ແລະ ຊັບພະຍາກອນນ້ຳໃຫ້ມີຄວາມຍືນຍົງ, ພຽງພໍ, ມີປະສິດທິພາບ, ປະສິດທິຜົນ ແລະ ເພື່ອການດຳລົງຊີວິດທີ່ດີຂອງປະຊາຊົນບັນດາເຜົ່າ ແລະ ຊ່ວຍຫຼຸດຜ່ອນຜົນກະທົບຕໍ່ເສດຖະກິດ-ສັງຄົມ ທີ່ອາດຈະເກີດຂຶ້ນໃນອະນາຄົດ.
ໃນພິທີ, ຜູ້ແທນເຂົ້າຮ່ວມ ປະກອບຄຳຄິດຄຳເຫັນແລກປ່ຽນບົດຮຽນຮ່ວມກັນກ່ຽວກັບວຽກງານດັ່ງກ່າວ ແນໃສ່ເພື່ອເຮັດໃຫ້ການຈັດຕັ້ງປະຕິບັດໂຄງການຄຸ້ມຄອງຊັບພະຍາກອນນ້ຳແບບເຊື່ອມສານໃນອ່າງຮັບນ້ຳເຊບັ້ງຫຽງ ໃຫ້ມີປະສິດທິພາບ ແລະ ປະສິດທິຜົນສູງ.
(ຂ່າວ: ສະຫວັນ)