ທ່ານ ວຽງໄຊ ສາຍພູຫຼວງ ປະທານບໍລິສັດ ສາຍພູຫຼວງອັດຕະປື ພັດທະນາ ຈໍາກັດຜູ້ດຽວ ໃຫ້ສໍາພາດຕໍ່ນັກຂ່າວແຂວງເຊກອງ ໃນວັນທີ 2 ມີນານີ້ວ່າ: ບໍລິສັດ ສາຍພູຫຼວງອັດຕະປື ພັດທະນາ ຈໍາກັດຜູ້ດຽວ ໄດ້ສ້າງຕັ້ງຂຶ້ນໂດຍມີຈຸດປະສົງ ເພື່ອການພັດທະນາ ແລະ ຊຸກຍູ້ສົ່ງເສີມການຜະລິດກະສິກໍາ (ປູກຝັງ-ລ້ຽງສັດ) ເປັນສິນຄ້າ. ຊຶ່ງປັດຈຸບັນ, ທາງບໍລິສັດໄດ້ລົງທຶນປູກໄມ້ກະຖິນນາລົງຢູ່ເຂດເມືອງກະລຶມໃນເນື້ອທີ່ 150 ເຮັກຕາ. ພ້ອມນີ້, ຍັງໄດ້ສະໜອງເບ້ຍໄມ້ໃຫ້ປະຊາຊົນໃນ 3 ບ້ານ ຄື: ບ້ານກຸງ, ບ້ານບາກ ແລະ ບ້ານຕະລາງໃໝ່ ປູກໄມ້ກະຖິນນາລົງຕື່ມອີກ. ເຖິງຢ່າງໃດກໍດີ, ຖ້າຫາກພໍ່ແມ່ປະຊາຊົນບ້ານອື່ນໆ ທີ່ມີຄວາມສົນໃຈ ຫຼື ມີຈຸດປະສົງຢາກປູກ ໂດຍສະເພາະຜູ້ທີ່ມີພື້ນທີ່, ມີແຮງງານ ແຕ່ຍັງຂາດທຶນ ທາງບໍລິສັດຍິນດີຮ່ວມມືສົ່ງເສີມ, ຈະສະໜອງເບ້ຍໄມ້, ແນະນໍາເຕັກນິກ ແລະ ຮັບເກັບຊື້ຜົນຜະລິດ.
ທ່ານ ວຽງໄຊ ສາຍພູຫຼວງ ໃຫ້ຮູ້ຕື່ມວ່າ: ຄຽງຄູ່ກັບການດໍາເນີນທຸລະກິດ, ບໍລິສັດຍັງໄດ້ເອົາໃຈໃສ່ໃຫ້ການຊ່ວຍເຫຼືອສັງຄົມ ກໍຄື ບັນດາຂະແໜງການຕ່າງໆ ເປັນຕົ້ນ ແມ່ນໄດ້ມອບຊຸດກິລາໃຫ້ກອງບັນຊາການ ປກສ ແຂວງ, ກອງບັນຊາການ ປກສ ເມືອງລະມາມ, ກອງບັນຊາການ ປກສ ເມືອງກະລຶມ ແລະ ກອງບັນຊາການ ປກສ ເມືອງດາກຈຶງ. ນອກນີ້, ຍັງໄດ້ການປະກອບສ່ວນທາງດ້ານວັດຖຸ-ທຶນຮອນ ໃຫ້ແກ່ຂະ ແໜງການຕ່າງໆຂອງແຂວງ ໃນໂອກາດວັນສໍາຄັນຂອງຊາດ, ຂອງພັກ ແລະ ບຸນປະເພນີອື່ນໆ.
ສໍາລັບທິດທາງໃນຕໍ່ໜ້າ, ບໍລິສັດຈະສືບຕໍ່ປະສານສົມທົບກັບຂະແໜງການກ່ຽວຂ້ອງ, ຂະຫຍາຍການດໍາເນີນທຸລະກິດ ແລະ ສຶກສາຄວາມເປັນໄປໄດ້ ລົງທຶນເຂົ້າໃນການພັດທະນາການທ່ອງທ່ຽວ ໂດຍສະເພາະການອະນຸລັກ, ການປົກປັກຮັກສາຮີດຄອງປະເພນີ ແລະ ການເສີມຂະຫຍາຍວັດທະນະທໍາທີ່ເປັນເອກະລັກຂອງບັນດາເຜົ່າ ໃຫ້ກາຍເປັນສິ່ງທີ່ດຶງດູດນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມແຂວງເຊກອງໃຫ້ນັບມື້ຫຼາຍຂຶ້ນ.
(ແຫຼ່ງຂ່າວ: ແຂວງເຊກອງ)
ຄໍາເຫັນ