ເສດຖະກິດອັງກິດພົບກັບພາວະຖົດຖອຍ

ຂ່າວຕ່າງປະເທດລາຍງານ ເມື່ອທ້າຍອາທິດຜ່ານມາ, ສຳນັກງານສະຖິຕິແຫ່ງຊາດຂອງອັງກິດໄດ້ເປີດເຜີຍບົດລາຍງານໂດຍລະບຸວ່າ: ໂຕເລກລວມຍອດຜະລິດຕະພັນພາຍໃນປະເທດ (GDP) ຫຼຸດລົງ 0,3% ໃນໄລຍະໄຕມາດທີ 4 ຂອງປີ 2023 ສ່ວນສະຖິຕິໃນໄຕມາດກ່ອນໜ້າຄື ໄຕມາດທີ 3 ຫຼຸດລົງ 0,1%.
    ທັງນີ້, ການທີ່ GDP ຫຼຸດລົງຕິດຕໍ່ກັນຢ່າງໜ້ອຍ 2 ໄຕມາດມີຄວາມໝາຍໃນທາງທິດສະດີວ່າ: ເສດຖະກິດຂອງປະເທດນັ້ນປະເຊີນກັບພາວະຖົດຖອຍ ແລະ ຖືວ່າເປັນຄັ້ງທຳອິດທີ່ເສດຖະກິດຂອງອັງກິດກັບເຂົ້າສູ່ພາວະດັ່ງກ່າວອີກຄັ້ງຕໍ່ຈາກໄລຍະ 6 ເດືອນທຳອິດຂອງປີ 2020. ສ່ວນອັດຕາເງິນເຟີ້ຂອງອັງກິດຢູ່ທີ່ລະດັບ 4% ເມື່ອປີ 2023 ສູງກວ່າ 2 ເທົ່າຈາກເປົ້າໝາຍຂອງທະນາຄານແຫ່ງອັງກິດ (BOE) ຊຶ່ງເປັນທະນາຄານກາງຂອງປະເທດທີ່ກຳນົດເປົ້າໝາຍເງິນເຟີ້ລາຍປີໄວ້ໃນລະດັບ 2%.
    ສະຖານະການທີ່ເກີດຂຶ້ນຍິ່ງເພີ່ມແຮງກົດດັນໃຫ້ກັບລັດຖະບານຂອງອັງກິດ ໂດຍທ່ານ ຣີຊີ ຊູແນັກ ຊຶ່ງປະກາດວ່າ: ການພັດທະນາເສດຖະກິດຂອງປະເທດຄືໜຶ່ງໃນວາລະແຫ່ງຊາດ ຂະນະດຽວກັນ, ຄະແນນນິຍົມຂອງພັກອະນຸລັກນິຍົມທີ່ເປັນພັກລັດຖະບານກຳລັງນຳຫຼັງພັກແຮງງານ ໂດຍການເລືອກຕັ້ງທົ່ວໄປຕາມກຳນົດຄັ້ງໃໝ່ຂອງອັງກິດຈະເປີດຂຶ້ນໃນເດືອນມັງກອນ 2025.