ສະພາບອັດຕາແລກປ່ຽນ ມີສະຖຽນລະພາບ ນັບແຕ່ທ້າຍປີ 2024 ເປັນຕົ້ນມາ ເຖິງວ່າ ມີການເໜັງຕີງຂຶ້ນ-ລົງ ຕາມທ່າອ່ຽງຄ່າເງິນຂອງສາກົນ ແຕ່ກໍຢູ່ໃນຂອບເຂດ ທີ່ກຳນົດ ແລະ ເງິິນກີບທຽບໃສ່ໂດລາ ມີທ່າອຽງແຂງຄ່າ, ສ່ວນຕ່າງອັດຕາແລກປ່ຽນທາງການ ແລະ ຕະຫຼາດ ແມ່ນແຄບເຂົ້າ. ຄັງສໍາຮອງເງິນຕາຕ່າງປະເທດ ຊຶ່ງເປັນພຸ້ມຄຸ້ມກັນ ທີ່ສໍາຄັນໃນການຮັບປະກັນຄວາມໝັ້ນຄົງ ຂອງເສດຖະກິດ ແລະ ຄວາມສ່ຽງຈາກພາຍນອກ ເພີ່ມຂຶ້ນຢ່າງຕໍ່ເນື່ອງ ຈາກລະດັບ 1,677 ລ້ານໂດລາສະຫະລັດ ໃນທ້າຍປີ 2023 ໄດ້ເພີ່ມຂຶ້ນ 2,101 ລ້ານໂດລາສະຫະລັດ ໃນເດືອນທັນວາ ປີ 2024 ແລະ ຢູ່ໃນລະດັບ 3,232.75 ລ້ານໂດລາສະຫະລັດ ໃນເດືອນພະຈິກ ແລະ 3,544.97 ລ້ານໂດລາສະຫະລັດ ໃນເດືອນທັນວາ 2025. ອີງຕາມການລາຍງານໃນກອງປະຊຸມສະພາບໍລິຫານ ທຫລ ຄັ້ງທີ I ວັນທີ 14 ມັງກອນ 2026 ຜ່ານມາ ແລະ ອີງຕາມຂໍ້ມູນທາງເວັບໄຊຂອງ ທຫລ. ຈາກສະພາບທາງດ້ານມະຫາພາກເງິນຕາດີຂຶ້ນ ໄດ້ເຮັດໃຫ້ ສປປລາວ ຖືກຈັດລະດັບຄວາມໜ້າເຊື່ອ ຂຶ້ນ 1 ຂັ້ນ ຈາກອົງການຈັດລໍາດັບຄວາມໜ້າເຊື່ອຖື ຂອງສາກົນ (Moody) ໃນທ້າຍປີ 2025.
ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມບໍລິການ ຍັງກ່າວຕື່ມວ່າ: ເຖິງຢ່າງໃດກໍຕາມ ອີງໃສ່ສະພາບແວດລ້ອມຂອງສາກົນ ທີ່ຍັງມີການຜັນແປ ແລະ ຄາດເດົາໄດ້ຍາກ, ສະພາບທາງດ້ານເງິນຕາຂອງ ສປປລາວ ຍັງຈະສືບຕໍ່ປະເຊີນ ກັບສິ່ງທ້າທ້າຍບາງດ້ານ ໃນປີ 2026 ຈາກສະພາບຄວາມຜັນຜວນຄ່າເງິນ ຂອງສາກົນ, ການເໜັງຕີງແຮງຂອງລາຄາຄໍາ ແລະ ປັດໃຈຄວາມຂັດແຍ່ງ ທາງດ້ານພູມມີລັດຖະສາດ; ເພື່ອຮັບປະກັນສະຖຽນລະພາບ ໄລຍະກາງ ແລະ ຍາວ, ທຫລ ຈະດຳເນີນນະໂຍບາຍເງິນຕາ ໃຫ້ຮັດກຸມ, ຄວບຄຸມປະລິມານເງິນຕາມ ຂອບເຂດທີ່ກຳນົດ, ຄວບຄຸມເງິນເຟີ້ໃຫ້ຢູ່ໃນລະດັບ 5% (ຂຶ້ນ-ລົງ ຫຼື ບວກລົບ 2%) ຄຸ້ມຄອງອັດຕາແລກ ປ່ຽນໃຫ້ມີຄວາມສະຫງົບ, ສືບຕໍ່ສ້າງຄວາມເຂັ້ມແຂງ ທາງດ້ານຄັງສໍາຮອງເງິນຕາ ໃຫ້ມີທ່າອ່ຽງເພີ່ມຂຶ້ນ, ຮັບປະກັນສະຖຽນລະພາບການເງິນ, ປັບປຸງລະບົບການຊໍາລະສະສາງໃຫ້ມີຄວາມທັນສະໄໝ, ມີຄວາມຄ່ອງຕົວ ແລະ ປອດໄພ.
(ຂ່າວ: ຣັດສະໝີ ດວງສັດຈະ)
ຄໍາເຫັນ