ສິງກະໂປ ກຽມຂຶ້ນພາສີສິນຄ້າ ແລະ ບໍລິການ

ຂ່າວຕ່າງປະເທດລາຍງານ ເມື່ອບໍ່ດົນມານີ້, ລັດຖະບານສິງກະໂປໄດ້ອອກຖະແຫຼງການໂດຍລະບຸວ່າ: ພາກຄົວເຮືອນສິງກະໂປກຽມປະເຊີນກັບການປັບຂຶ້ນພາສີການຂາຍ ໂດຍຈະມີຜົນບັງຄັບໃຊ້ໃນວັນທີ 1 ມັງກອນ 2024 ນີ້ ເນື່ອງຈາກລັດຖະບານຕ້ອງການເພີ່ມເງິນກອງທຶນໃຊ້ຈ່າຍທາງສັງຄົມເພີ່ມຂຶ້ນ ເມື່ອສິງກະໂປເລີ່ມເຂົ້າສູ່ສັງຄົມຜູ້ອາຍຸສູງໃນອີກຫຼາຍປີຂ້າງໜ້າ.
ພາສີສິນຄ້າ ແລະ ບໍລິການທີ່ເອີ້ນເກັບຈາກທຸກລາຍການ ນັບຕັ້ງແຕ່ເຄື່ອງແຫ້ງໄປຈົນຮອດເຄື່ອງປະດັບ ຈະປັບເພີ່ມຂຶ້ນ 1% ສູ່ລະດັບ 9% ໃນວັນທີ 1 ມັງກອນ 2024 ຊຶ່ງຖືວ່າເປັນການປັບຂຶ້ນອັດຕາດອກເບ້ຍແບບ 2 ຂັ້ນ ຄັ້ງທີ 2 ໂດຍຜ່ານມາພາສີການຂາຍຂອງສິງກະໂປເພີ່ມຂຶ້ນສູ່ລະດັບ 8% ຈາກ 7% ທີ່ບໍ່ເຄີຍປ່ຽນແປງມາ 15 ປີ. ການຂຶ້ນອັດຕາພາສີດັ່ງກ່າວມາພ້ອມກັບຄ່າຄອງຊີບທີ່ເພີ່ມຂຶ້ນ ສົ່ງຜົນໃຫ້ນິຕິບັນຍັດຂອງຝ່າຍຄ້ານຮຽກຮ້ອງໃຫ້ຢຸດຕິການປັບຂຶ້ນອັດຕາດອກເບ້ຍ ແຕ່ລັດຖະບານເປີດເຜີຍວ່າ: ການຂຶ້ນພາສີເປັນສິ່ງສຳຄັນຕໍ່ການເພີ່ມວົງເງິນໃຫ້ພາກລັດ ເນື່ອງຈາກລັດຖະບານຕ້ອງກຽມຮັບມືກັບປະຊາກອນຜູ້ອາຍຸສູງທີ່ເພີ່ມຂຶ້ນ ແລະ ຕົ້ນທຶນຄ່າເບິ່ງແຍງສຸຂະພາບທີ່ເພີ່ມຂຶ້ນ ຊຶ່ງສິງກະໂປຄາດວ່າປະຊາກອນອາຍຸ 65 ປີ ຈະມີອັດຕາສ່ວນເປັນ 1 ໃນ 4 ຂອງປະຊາກອນທັງໝົດພາຍໃນປີ 2030. ເມື່ອເດືອນສິງຫາປີຜ່ານມາ, ທ່ານ ລໍເຣນ ຫວ່ອງ ຮອງນາຍົກລັດຖະມົນຕີເປີດເຜີຍວ່າ: ການປັບຂຶ້ນພາສີສິນຄ້າ ແລະ ບໍລິການຈະສະສົມບັນຫາໄວ້ໃນອະນາຄົດ ລັດຖະບານຈະຂາດຊັບພະຍາກອນໃນການຈັດສັນຄວາມຕ້ອງການທາງການເງິນ.
ທັງນີ້, ຜ່ານມາລັດຖະບານໄດ້ໃຫ້ເງິນຊ່ວຍເຫຼືອທາງດ້ານການເງິນຜ່ານງົບປະມານປະກັນ ມູນຄ່າຫຼາຍກວ່າ 10.000 ລ້ານໂດລາສິງກະໂປ ລວມເຖິງງົບ 200-800 ລ້ານໂດລາ ທີ່ມອບໃຫ້ກັບປະຊາກອນຜູ້ໃຫຍ່ໃນສິງກະໂປ ສ່ວນອັດຕາເງິນເຟີ້ພື້ນຖານຂອງສິງກະໂປຢູ່ໃນລະດັບປານກາງທີ່ 3,2% ໃນເດືອນພະຈິກຜ່ານມາ ຈາກເດີມຢູ່ໃນລະດັບສູງທີ່ສຸດ 5,5% ໃນເດືອນມັງກອນ ແລະ ກຸມພາ ຜ່ານມາ ແຕ່ເງິນເຟີ້ຍັງຢູ່ໃນລະຫວ່າງທີ່ທະນາຄານກາງຄາດຄະເນໄວ້ສະເລ່ຍ 2,5%-3,5% ໃນປີ 2024.