ສກລ ແຂວງສາລະວັນ ຖືວຽກງານປຸກລະດົມຂົນຂວາຍໂຄສະນາສຶກສາອົບຮົມການເມືອງ - ແນວຄິດ ເປັນວຽກງານຍຸດທະສາດ

ໄລຍະຜ່ານມາສະຫະພັນກໍາມະບານແຂວງ ໄດ້ຖືເອົາວຽກງານປຸກລະດົມຂົນຂວາຍ, ໂຄສະນາສຶກສາອົບຮົມການເມືອງ-ແນວຄິດ ເປັນວຽກງານຍຸດທະສາດ, ເປັນວຽກງານປາຍແຫຼມ, ເປັນວຽກງານແຖວໜ້າທີ່ຕ້ອງໄດ້ເຮັດຢ່າງປົກກະຕິ ແລະ ສອດຫ້ອຍເຂົ້າໃນທຸກຂົງເຂດວຽກງານ, ແນໃສ່ປຸກລະດົມຂົນຂວາຍ, ສຶກສາອົບຮົມໃຫ້ຖັນແຖວພະນັກງານ, ສະມາຊິກກໍາມະບານ, ກໍາມະກອນ ແລະ ຊາວຜູ້ອອກແຮງງານໃຫ້ຮັບຮູ້ ແລະ ເຂົ້າໃຈຕໍ່ແນວທາງຂອງພັກ, ກົດໝາຍ, ລະບຽບຂອງລັດ ແລະ ຂອງອົງການຈັດຕັ້ງກໍາມະບານ ເພື່ອຮັບປະກັນໃຫ້ແກ່ການຫັນປ່ຽນໃໝ່ຢ່າງແຂງແຮງ ເລິກເຊິ່ງ ຮອບດ້ານໃນວຽກງານກໍາມະບານ, ໂດຍໄດ້ນໍາໃຊ້ຫຼາຍຮູບການ, ວິທີການທີ່ເຫັນວ່າມີຄວາມສອດຄ່ອງເໝາະສົມກັບສະພາບຈຸດພິເສດຂອງການຈັດຕັ້ງກຳມະບານແຕ່ລະຂົງເຂດ; ຫົວໜ່ວຍແຮງງານ, ປັບປຸງບັນດາເນື້ອໃນ, ວິທີການປຸກລະດົມຂົນຂວາຍ, ໂຄສະນາສຶກສາອົບຮົມໃຫ້ແທດ

ເໝາະກັບແຕ່ລະກຸ່ມເປົ້າໝາຍເປັນຕົ້ນ: ເອົາໃຈໃສ່ເຮັດວຽກການເມືອງ-ແນວຄິດ ຕິດແໜ້ນກັບການແກ້ໄຂປະກົດການຫຍໍ້ທໍ້ຕ່າງໆໃນຂົງເຂດກຳມະບານ ແລະ ສັງຄົມ, ການເວົ້າຕ້ອງໄປຄຽງຄູ່ກັບການກະທຳ, ຄວາມເປັນແບບຢ່າງນໍາໜ້າ ຂອງພະນັກງານ, ສະມາຊິກກຳມະບານ, ກຳມະກອນ ແລະ ຜູ້ອອກແຮງງານ ເພື່ອສ້າງການຫັນປ່ຽນໃໝ່ຢ່າງແທ້ຈິງ.ໄດ້ຍົກລະດັບຄວາມຮູ້, ຄວາມສາມາດ ໃຫ້ແກ່ພະນັກງານ ຂອງກຳມະບານທີ່ຢູ່ໃນຄວາມຮັບຜິດຊອບຂອງຕົນ, ເພີ່ມທະວີຄວາມຮັບຜິດຊອບ ແລະ ເປັນເຈົ້າຕົນເອງ ຕໍ່ການຈັດຕັ້ງປະຕິບັດພາລະບົດບາດ, ສິດ, ໜ້າທີ່ຂອງຕົນ, ເຮັດໃຫ້ກຳມະກອນຜູ້ອອກແຮງງານ ໄດ້ຮັບການສຶກສາອົບຮົມ, ປຸກລະດົມທາງດ້ານແນວຄິດ ແລະ ເຂົ້າເຖິງແຫຼ່ງຂໍ້ມູນຂ່າວສານທີ່ຈຳເປັນ ກ່ຽວກັບບັນຫາແຮງງານ ແລະ ໄດ້ຮັບການປົກປ້ອງສິດຜົນປະໂຫຍດອັນຊອບທຳຂອງຕົນ. ປຸກລະດົມໃຫ້ພະນັກງານ, ສະມາຊິກກຳມະບານ, ກຳມະກອນ ແລະ ຜູ້ອອກແຮງງານລາວ ຈັດຕັ້ງປະຕິບັດ ແລະ ປັບປຸງເນື້ອໃນໂຄສະນາ, ເນື້ອໃນຝຶກອົບຮົມໃຫ້ມີຄວາມກະທັດຮັດ, ເລິກເຊິ່ງ ແລະ ແທດເໝາະກັບກຸ່ມເປົ້າໝາຍ; ຫັນປ່ຽນໃໝ່ກ່ຽວກັບການໂຄສະນາເຄື່ອນທີ່ຢູ່ໃນຫົວໜ່ວຍແຮງງານ, ກຸ່ມການຜະລິດ ໂດຍມີການຈັດກິດຈະກຳໃຫ້ຜູ້ເຂົ້າຮ່ວມ ຖາມ-ຕອບ ເພື່ອຮັບຂອງລາງວັນໄດ້ທັງໝົດ 327 ຄັ້ງ, ມີຜູ້ເຂົ້າຮ່ວມເຊື່ອມຊຶມທັງໝົົດ 36,806 ເທື່ອຄົນ ຍິງ 15,978 ເທື່ອຄົນ.

ສະຫາຍ ຈິດຕະກອນ ສາຍສະໝຸດ ໃຫ້ຮູ້ຕື່ມວ່າ: ໃນການຈັດຕັ້ງໂຄສະນາ-ປາຖະກາຖາແນວທາງຂອງພັກ, ກົດໝາຍ, ນິຕິກຳ, ໂດຍສະເພາະແມ່ນການປະຕິບັດຄ່າແຮງງານຂັ້ນຕໍ່າ ມູນເຊື້ອຂອງຊາດ ຂອງພັກ ຂອງສະຫະພັນກຳມະບານລາວ ແລະ ສາກົນ ໄດ້ 214 ຄັ້ງ, ມີຜູ້ເຂົ້າຮ່ວມທັງໝົດ 21,298 ສະຫາຍ ຍິງ 7,816 ສະຫາຍ; ສົມທົບກັບສູນກາງສະຫະພັນກຳມະບານລາວ ຈັດຝຶກອົບຮົມວຽກງານກຳມະບານ, ໂຄສະນາ-ປາຖະກະຖາ, ສ້າງຄູຝຶກໄດ້ 16 ຄັ້ງ, ມີຜູ້ເຂົ້າຮ່ວມທັງໝົດ 376 ສະຫາຍ ຍິງ 131 ສະຫາຍ, ເປີດຊຸດອົບຮົມວຽກງານການເມືອງ-ແນວຄິດໃຫ້ຄະນະພັກ, ຄະນະນຳກຳມະບານອ້ອມຂ້າງແຂວງມີຜູ້ເຂົ້າຮ່ວມ 186 ສະຫາຍ ຍິງ 66 ສະຫາຍ; ເກັບກຳສະພາບຫາງສຽງ, ຄຳຄິດເຫັນ, ຄຳສະເໜີຂອງສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານບັນດາເຜົ່າ, ພ້ອມທັງລາຍງານໃຫ້ພາກສ່ວນກ່ຽວຂ້ອງເປັນປົກກະຕິ; ໄດ້ໂຄສະນາເຜີຍແຜ່ວຽກງານກຳມະບານໂດຍຜ່ານສື່ອອນລາຍຂອງສະຫະພັນກຳມະບານແຂວງ, ສື່ຂອງແຂວງ ແລະ ຜ່ານສື່ຂອງສູນກາງສະຫະພັນກຳມະບານລາວ ໄດ້ 406 ຂ່າວ.

ຜ່ານການເຄື່ອນໄຫວຄືດັ່ງກ່າວເຫັນວ່າຄະນະພັກແຕ່ລະຂັ້ນ ຫົວໜ່ວຍແຮງງານພາກວິສາຫະກິດເອກກະຊົນ ການລົງທຶນຂອງຕ່າງປະເທດ ກຳມະກອນ ຜູ້ອອກແຮງງານ ແລະ ມະຫາຊົນອື່ນໆໄດ້ເຫັນວ່າມີຄວາມສຳຄັນ ແລະ ໃຫ້ການຮ່ວມມື ໃນການເຄື່ອນໄຫວວຽກງານກຳມະບານຫຼາຍຂຶ້ນ ໂດຍສະເພາະແມ່ນການເຂົ້າຮ່ວມເຄື່ອນໄຫວວຽກງານຂະບວນການຕ່າງໆ ຂອງສະຫະພັນກຳມະບານແຂວງຢ່າງເປັນເຈົ້າການ. ພ້ອມກັນນັ້ນ, ກໍເຮັດໃຫ້ສະພາບແນວຄິດຂອງຄະນະບໍລິຫານງານສະຫະພັນກຳມະບານແຕ່ລະຂັ້ນ, ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານພາຍໃນແຂວງ ມີທັດສະນະຫຼັກໝັ້ນການເມືອງໜັກແໜ້ນ ມີຄຸນສົມບັດສິນທຳປະຕິວັດ ມີແນວຄິດອຸ່ນອ່ຽນທຸ່ນທ່ຽງເຊື່ອໜັ້ນຕໍ່ການນໍາພາຂອງພັກ, ເຄົາລົບ ແລະ ປະຕິບັດລະບຽບກົດໜາຍຂອງລັດຢ່າງເຂັ້ມງວດ, ມີຄວາມສາມັກຄີເປັນປຶກແຜ່ນແໜ້ນໜາ, ມີຄວາມຫ້າວຫັນເຮັດສໍາເລັດໜ້າທີ່ວຽກງານທີ່ການຈັດຕັ້ງມອບໜາຍໃຫ້ສຳເລັດຜົນເປັນຢ່າງດີ.