ສນຊ ມີຫຼາຍຄາດໝາຍສູ້ຊົນໃນຕໍ່ໜ້າ

ໂດຍສະເພາະຄາດໝາຍສູ້ຊົນຂອງຄະນະກໍາມະການ ສນຊ ໄລຍະ ປີ 2026-2030 ຄື: 1) ເພີ່ມທະວີການເຕົ້າໂຮມຄວາມສາມັກຄີເປັນປຶກແຜ່ນແໜ້ນໜາຂອງປວງຊົນທັງຊາດ, ສືບທອດ ແລະ ເສີມຂະຫຍາຍມູນເຊື້ອອັນດີງາມຂອງແນວລາວອິດສະຫຼະ, ແນວລາວຮັກຊາດ ໃກ້ຊິດຕິດແທດກັບປະຊາຊົນ ແລະ ເປັນຫຼັກແຫຼ່ງໃນການເສີມສ້າງຄວາມສາມັກຄີ ເປັນຈິດໜຶ່ງໃຈດຽວຂອງກ້ອນກຳລັງສາມັກຄີບັນດາເຜົ່າ, ກ້ອນກຳລັງສາມັກຄີບັນດາຊັ້ນຄົນ ແລະ ອົງການຈັດຕັ້ງສັງຄົມ, ກ້ອນກໍາລັງສາມັກຄີບັນດາຜູ້ເຊື່ອຖືສາສະໜາຕ່າງໆ ແລະ ກ້ອນກຳລັງສາມັກຄີ ຂອງພີ່ນ້ອງຄົນລາວຢູ່ຕ່າງປະ ເທດໃຫ້ເປັນກຳລັງແຮງຂອງຊາດ ພ້ອມກັນຕັ້ງໜ້າຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XII ຂອງພັກ, ມະຕິກອງປະຊຸມໃຫຍ່ ຄັ້ງທີ XII ຂອງແນວລາວສ້າງຊາດ ໂດຍຫັນເປັນແຜນການ, ແຜນງານ ແລະ ໂຄງການ ໃຫ້ຖືກຕ້ອງສອດຄ່ອງ ແລະ ສາມາດຈັດຕັ້ງປະຕິບັດໃຫ້ປະກົດຜົນເປັນຈິງ; 2) ເປັນເຈົ້າການສົມທົບກັບອົງການຈັດຕັ້ງຂອງພັກ-ລັດ, ນໍາພາ-ຊີ້ນໍາອົງການພາຄີ, ບັນດາການຈັດຕັ້ງສັງຄົມ ເພື່ອຊ່ວຍໜູນ ຊຶ່ງກັນ ແລະ ກັນ, ພ້ອມກັນຈັດຕັ້ງປະຕິບັດແນວທາງ, ນະໂຍບາຍ, ມະຕິ, ຄໍາສັ່ງຕ່າງໆຂອງພັກ, ລະບຽບກົດໝາຍ ໃນການແກ້ໄຂບັນດາປະກົດການຫຍໍ້ທໍ້ໃນສັງຄົມ, ການປັບປຸງກໍ່ສ້າງຮາກຖານການເມືອງ, ຍູ້ແຮງຂະບວນການແຂ່ງຂັນຮັກຊາດ ແລະ ພັດທະນາ, ຂະບວນການຮັກບ້ານເກີດ, ສ້າງຊົນນະບົດໃໝ່, ບ້ານສາມັກຄີປອງດອງ, ຂະບວນການສ້າງຕົວເມືອງໜ້າຢູ່, ຂະບວນການແກ້ໄຂຄວາມທຸກຍາກ, ຂະບວນການຕ້ານຢາເສບຕິດ ແລະ ອື່ນໆ; 3) ປັບປຸງກົດໝາຍ ແລະ ນິຕິກຳກ່ຽວຂ້ອງຂອງແນວລາວສ້າງຊາດ ໃຫ້ສອດຄ່ອງກັບມະຕິຂອງພັກ, ລັດຖະທຳມະນູນ ແລະ ຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່, ເປັນບ່ອນອີງໃຫ້ແກ່ແນວໂຮມແຕ່ລະຂັ້ນໄດ້ເຄື່ອນໄຫວຢ່າງມີປະສິດຕິຜົນ ເປັນຕົ້ນແມ່ນການເຕົ້າໂຮມຄວາມສາມັກຄີຂອງປະຊາຊົນບັນດາເຜົ່າ, ຊັ້ນຄົນ, ເພດໄວ, ສາສະໜາ ເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໃຫ້ມີຄວາມຈະເລີນກ້າວໜ້າ, ປະຊາຊົນມີຄວາມຜາສຸກ, ສັງຄົມຍຸຕິທຳ ແລະ ສີວິໄລ; 4) ຜັນຂະຫຍາຍເນື້ອໃນຄໍາຂວັນ 4 ເສີມສ້າງຂອງແນວລາວສ້າງຊາດ ໃຫ້ປະກົດຜົນເປັນຈິງຍິ່ງຂຶ້ນ: ເສີມສ້າງຄວາມສາມັກຄີ, ຄຸນງາມຄວາມດີ, ຄຸນວຸດທິ ແລະ ເສີມສ້າງຄຸນນະທໍາຂອງການຈັດຕັ້ງ, ບຸກຄົນນິຕິບຸກຄົນ ທັງຢູ່ພາຍໃນ ແລະ ຕ່າງປະເທດ ໃຫ້ເປັນຂະບວນກວ້າງ ຂວາງ, ມີຜົນສໍາເລັດຕົວຈິງ ແລະ ມີນິຕິກຳຮອງຮັບ ທີ່ສອດຄ່ອງກັບລະບຽບກົດໝາຍ ເພື່ອສັງລວມໄດ້ກຳລັງແຮງປະກອບສ່ວນເຂົ້າໃນການສ້າງສາພັດທະນາ ແລະ ແກ້ໄຂຄວາມທຸກຍາກຂອງປະຊາຊົນບັນ ດາເຜົ່າໃຫ້ຫຼຸດລົງເປັນກ້າວໆ; 5) ປຸກລະດົມຂົນຂວາຍ ສ້າງເສດຖະກິດເພີ່ມລາຍຮັບໃຫ້ແກ່ອົງການແນວລາວສ້າງຊາດ ຕາມມະຕິ 04/ກມສພ ແລະ ມະຕິ 05/ລບ, ມະຕິ 20/ລບ ແລະ ມະຕິ 12/ຄປຈ ຂອງສູນກາງແນວລາວສ້າງຊາດ ໂດຍຊຸກຍູ້ການເຄື່ອນໄຫວຂອງມູນນິທິສາມັກຄີ ແລະ ພັດທະນາແນວລາວສ້າງຊາດໃຫ້ແຂງແຮງ ເພື່ອຊ່ວຍເຫຼືອສັງຄົມ ຕິດພັນກັບການສ້າງຄວາມເຂັ້ມແຂງໃຫ້ອົງການແນວໂຮມແຕ່ລະຂັ້ນ; 6) ເອົາໃຈໃສ່ເກັບກຳສຽງສະທ້ອນຂອງສັງຄົມກ່ຽວກັບການປະຕິບັດແນວທາງ, ນະໂຍບາຍ, ລະບຽບກົດໝາຍ ແລະ ຕໍ່ການເຄື່ອນໄຫວປະຕິບັດພາລະບົດບາດ, ໜ້າທີ່, ຂອບເຂດສິດ ຂອງອົງການຈັດຕັ້ງພັກ-ລັດ ແລະ ສະມາຊິກສະພາແຫ່ງຊາດ, ພະນັກງານ-ລັດຖະກອນ ເພື່ອເສີມຂະຫຍາຍສິດເປັນເຈົ້າຂອງປະຊາຊົນ ແລະ ສ້າງເງື່ອນໄຂຊຸກຍູ້ໃຫ້ປະຊາຊົນ ໄດ້ມີສ່ວນຮ່ວມໃນການຄຸ້ມຄອງລັດ, ຄຸ້ມຄອງສັງຄົມ ໃຫ້ຫຼາຍຂຶ້ນຕາມທິດຫຼັກການ: “ໃຫ້ປະຊາຊົນຮູ້, ປະຊາຊົນປຶກສາ, ປະຊາຊົນເຂົ້າຮ່ວມຈັດຕັ້ງປະຕິບັດ, ປະຊາຊົນຕິດຕາມກວດກາ ແລະ ປະຊາຊົນ ໄດ້ຮັບຜົນປະໂຫຍດຢ່າງຊອບທຳ”.