ສອງລັດຖະສະພາ ລາວ-ຫວຽດນາມ ສືບຕໍ່ຈັດຕັ້ງ ແລະ ຊຸກຍູ້ການຮ່ວມມືໃຫ້ເປັນຮູບປະທໍາ

ພາຍຫຼັງທີ່ໄດ້ຕ້ອນຮັບຢ່າງເປັນທາງການ ທີ່ຫໍສະພາແຫ່ງຊາດ ແຫ່ງ ສປປ ລາວໃນວັນທີ 4 ທັນວາ ນີ້ ຄະນະຜູ້ແທນຂັ້ນສູງຂອງສະພາແຫ່ງຊາດ ແຫ່ງ ສປປ ລາວ ແລະ ສະພາແຫ່ງຊາດ ແຫ່ງ ສສ ຫວຽດນາມ ໄດ້ມີພິທີພົບປະສອງຝ່າຍ ຊຶ່ງສອງຝ່າຍຈະສືບຕໍ່ຈັດຕັ້ງປະຕິບັດ ແລະ ຊຸກຍູ້ບັນດາວຽກງານໃນການຮ່ວມມືຕ່າງໆ ຂອງສອງລັດຖະສະພາ ລາວ-ຫວຽດນາມ ໂດຍສະເພາະ ວຽກງານໃນທິດທາງການຮ່ວມມືໃນຕໍ່ໜ້າ ທີ່ຝ່າຍລາວໄດ້ສະເໜີ ເພື່ອໃຫ້ເປັນຮູບປະທໍາ.
    ພິທີພົບປະສອງຝ່າຍຂອງຄະນະຜູ້ແທນຂັ້ນສູງ ສອງລັດຖະສະພາ ລາວ-ຫວຽດນາມ ໄດ້ດຳເນີນດ້ວຍບັນຍາກາດ ທີ່ເຕັມໄປດ້ວຍໄມຕີຈິດມິດຕະພາບອັນດູດດື່ມ ຕໍ່ສາຍພົວພັນມິດຕະພາບແບບພິເສດ ລະຫວ່າງ ສອງພັກ, ສອງລັດ ແລະ ປະຊາຊົນສອງປະເທດ ກໍຄື ລະຫວ່າງ ສອງສະພາແຫ່ງຊາດ ພວກເຮົາ; ໂດຍ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ ປະທານສະພາແຫ່ງຊາດ ແຫ່ງ ສປປ ລາວ ແລະ ສະຫາຍ ເວືອງ ດິງ ເຫວ້ ກໍາມະການກົມການເມືອງສູນກາງພັກກອມມູນິດຫວຽດນາມ ປະທານສະພາແຫ່ງຊາດ ແຫ່ງ ສສ ຫວຽດນາມ ໄດ້ພ້ອມກັນນໍາພາບັນດາຜູ້ແທນຂັ້ນສູງ ທົບທວນ ແລະ ຕີລາຄາຄືນຕໍ່ການຮ່ວມມື ສອງຝ່າຍ ເວົ້າສະເພາະ, ເວົ້າລວມ ກໍຍັງມີການຮ່ວມມືກັນ ລະຫວ່າງ ສາມປະເທດ ລາວ, ຫວຽດນາມ ແລະ ກຳປູເຈຍ. 
ສອງຝ່າຍ ໄດ້ແຈ້ງສະພາບການພົ້ນເດັ່ນຂອງປະເທດຕົນ ແລະ ການເຄື່ອນໄຫວໂດຍຫຍໍ້ດ້ານວຽກງານສະພາແຫ່ງຊາດ ໃຫ້ກັນ ແລະ ກັນຊາບ; ພ້ອມນີ້, ກໍໄດ້ຕີລາຄາການພົວພັນ ແລະ ຮ່ວມມື ລະຫວ່າງ ສອງປະເທດລາວ-ຫວຽດນາມ ຊຶ່ງກໍໄດ້ຄວາມພາກພູມໃຈທີ່ເຫັນວ່າ ເຖິງວ່າສະພາບການໃນໂລກ, ພາກພື້ນ ມີຄວາມສັບສົນ, ສະຫຼັບສັບຊ້ອນ, ສອງປະເທດຍັງມີຄວາມຫຍຸ້ງຍາກ ແຕ່ສາຍພົວພັນ ແລະ ການຮ່ວມມື ລະຫວ່າງ ສອງປະເທດ ຍັງສືບຕໍ່ນັບມື້ນັບຮັດແໜ້ນ ແລະ ເສີມຂະຫຍາຍຂຶ້ນຢ່າງບໍ່ຢຸດຢັ້ງ ຊຶ່ງສະແດງອອກ ໃນການແລກປ່ຽນການຢ້ຽມຢາມ ຂອງຄະນະຜູ້ແທນການນໍາຂັ້ນສູງ ລະຫວ່າງ ສອງພັກ, ສອງລັດ ນັບທັງສູນກາງ ແລະ ທ້ອງຖິ່ນ ຢ່າງເປັນປົກກະຕິ ແລະ ຕໍ່ເນື່ອງ. ສອງຝ່າຍ ໄດ້ເພີ່ມທະວີຮັດແໜ້ນສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ທີ່ໄດ້ຮັບການສ້າງຕັ້ງ ແລະ ທະນຸຖະໜອມໂດຍຮຸ່ນການນໍາທຳອິດ ຂອງສອງປະເທດ ແລະ ປັດຈຸບັນ ກາຍເປັນປັດໃຈຕັດສິນແຫ່ງການຄົງຕົວຂະຫຍາຍຕົວ ແລະ ຂະຫຍາຍຕົວຂອງແຕ່ລະປະເທດ ໄດ້ມີການຊຸກຍູ້ສົ່ງເສີມ ແລະ ອຳນວຍຄວາມສະດວກຕ່າງໆ ໃຫ້ແກ່ການຮ່ວມມືດ້ານການຄ້າ, ການລົງທຶນ, ຄົມມະນາຄົມຂົນສົ່ງ ຊຶ່ງສະແດງອອກໃນມູນຄ່າການຄ້າສອງຝ່າຍ ໃນ 9 ເດືອນຕົ້ນປີ 2023 ບັນລຸ 1,2 ຕື້ ໂດລາ, ຫວຽດນາມ ກໍຈັດຢູ່ໃນອັນດັບແຖວໜ້າຂອງຜູ້ລົງທຶນຕ່າງປະເທດຢູ່ ສປປ ລາວ ລວມມີ 241 ໂຄງການ, ມູນຄ່າທຶນຈົດທະບຽນທັງໝົດ 5,47 ຕື້ໂດລາ.
ຂະນະດຽວກັນ, ການພົວພັນຮ່ວມມື ລະຫວ່າງ ສະພາແຫ່ງຊາດລາວ ແລະ ຫວຽດນາມ ກໍໄດ້ຮັບການເສີມຂະຫຍາຍທາງກວ້າງ ແລະ ທາງເລິກສະເໝີມາຊຶ່ງສະແດງອອກໃນການແລກປ່ຽນການຢ້ຽມຢາມ ຊຶ່ງກັນ ແລະ ກັນ, ຈັດກອງປະຊຸມສໍາມະນາແລກປ່ຽນບົດຮຽນຕ່າງໆຮ່ວມກັນ, ສົ່ງຊ່ຽວຊານຫວຽດນາມ ມາໃຫ້ບົດຮຽນແກ່ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ແລະ ພະນັກງານສະພາແຫ່ງຊາດລາວ, ມີການພົວພັນຮ່ວມມື ແລະ ສະໜັບສະໜູນຊຶ່ງກັນ ແລະ ກັນ ຢ່າງໜັກແໜ້ນ ໃນເວທີລັດຖະສະພາພາກພື້ນ ແລະສາກົນ.
ໃນພິທີພົບປະ, ສະຫາຍ ໄຊສົມພອນ ພົມວິຫານ ກໍໄດ້ຕີລາຄາສູງຕໍ່ ສະຫາຍ ເວືອງ ດິງ ເຫວ້ ທີ່ໄດ້ນໍາພາຄະນະຜູ້ແທນຂັ້ນສູງ ເຂົ້າຮ່ວມກອງປະຊຸມສຸດຍອດລັດຖະສະພາ CLV ຄັ້ງທີ 1 ທີ່ ສະພາແຫ່ງຊາດລາວ ເປັນເຈົ້າພາບ ຊຶ່ງເປັນການສະໜັບສະໜູນ ແລະ ໃຫ້ກໍາລັງໃຈ ສະພາແຫ່ງຊາດລາວ ຈະສາມາດເຮັດສໍາເລັດການເປັນເຈົ້າພາບກອງປະຊຸມດັ່ງກ່າວ ຢ່າງຈົບງາມ. ພ້ອມນີ້, ປະທານສະພາແຫ່ງຊາດ ແຫ່ງ ສປປ ລາວ ກໍໄດ້ຕີລາຄາສູງ ຕໍ່ຜົນການຕິດຕາມກວດກາຮ່ວມ ລະຫວ່າງ ສະພາແຫ່ງຊາດ ສາມ ປະເທດ CLV ໃນເດືອນຕຸລາ ຜ່ານມາ ຊຶ່ງເຫັນໄດ້ຄວາມພະຍາຍາມໃນການພົວພັນຮ່ວມມືກັນ ຢ່າງໃກ້ຊິດຂອງສາມປະເທດ ໃນການຈັດຕັ້ງປະຕິບັດຂໍ້ຕົກລົງ, ແຜນປະຕິບັດງານໂຄງການຮ່ວມມືຕ່າງໆ ທີ່ໄດ້ຮ່ວມລົງນາມກັນຢ່າງຕັ້ງໜ້າ ເພື່ອສົ່ງເສີມສາຍພົວພັນມິດຕະພາບ, ຄວາມສາມັກຄີ ແລະ ການຮ່ວມມືເພື່ອການພັດທະນາ ລະຫວ່າງ ປະເທດຊາດ ກໍຄື ປະຊາຊົນສາມປະເທດ ໃຫ້ເຂັ້ມແຂງ ແລະ ຍືນຍົງ.
ພ້ອມນີ້, ສະຫາຍ ໄຊສົມພອນ ພົມວິຫານ ກໍໄດ້ສະເໜີທິດທາງການພົວພັນຮ່ວມມື ໃນຕໍ່ໜ້າ ຊຶ່ງສະເໜີໃຫ້ສອງຝ່າຍ ສືບຕໍ່ຈັດຕັ້ງປະຕິບັດເນື້ອໃນຈິດໃຈ ຂອງບົດບັນທຶກ ວ່າດ້ວຍການຮ່ວມມື (MOU) ລະຫວ່າງ ສອງສະພາແຫ່ງຊາດ ລາວ-ຫວຽດນາມ, ລະຫວ່າງ ສອງຄະນະເລຂາທິການສະພາແຫ່ງຊາດລາວ ແລະ ລະຫວ່າງ ກໍາມາທິການທີ່ກ່ຽວຂ້ອງ ໃຫ້ເປັນຮູບປະທຳ; ສືບຕໍ່ຊຸກຍູ້ການຈັດຕັ້ງປະຕິບັດ ບັນດາສັນຍາ, ສົນທິສັນຍາ ແລະ ຂໍ້ຕົກລົງ ລະຫວ່າງ ສອງລັດຖະບານ ກໍຄື ຜົນຂອງກອງປະຊຸມຂອງ ການນໍາຂັ້ນສູງ ຂອງ ສອງພັກ, ສອງລັດ ແລະ ບັນດາໂຄງການຮ່ວມມືຂອງສອງປະເທດ ຊຶ່ງໃນຕໍ່ໜ້າຈະມີການສ້າງສະຖາບັນການສຶກສາ ແລະ ໂຮງໝໍທັນສະໄໝ ໃນເຂດສາມຫຼ່ຽມພັດທະນາ ໃຫ້ປະກົດຜົນເປັນຈິງ; ສືບຕໍ່ຊຸກຍູ້ ການພົວພັນຮ່ວມມື ທາງດ້ານເສດຖະກິດ, ການຄ້າ ແລະ ການລົງທຶນ ລະຫວ່າງ ສອງປະເທດ ໃຫ້ສືບຕໍ່ຂະຫຍາຍຕົວສູງຂຶ້ນ ສົມຄູ່ກັບການພົວພັນຮ່ວມມືດ້ານການເມືອງ. 
ນອກຈາກນີ້, ຝ່າຍລາວ ຍັງໄດ້ສະເໜີໃຫ້ມີການສືບຕໍ່ສະໜັບສະໜູນ ແລະ ຮ່ວມມືກັນ ໃນການເຄື່ອນໄຫວ ໃນອົງການລັດຖະສະພາພາກພື້ນ ແລະ ສາກົນ. ໃນນັ້ນ, ສະພາແຫ່ງຊາດລາວ ຈະເປັນເຈົ້າພາບຈັດກອງປະຊຸມໃຫຍ່ໄອປາ (AIPA) ຄັ້ງທີ 45 ໃນປີ 2024 ຫວັງຢ່າງຍິ່ງວ່າ ສະພາແຫ່ງຊາດຫວຽດນາມ ຈະສືບຕໍ່ໃຫ້ການຮ່ວມມື, ສະໜັບສະໜູນ ແລະ ຊ່ວຍເຫຼືອເຮັດສໍາເລັດໜ້າທີ່ດັ່ງກ່າວ.
(ຂ່າວ-ພາບ: ສຸກສະຫວັນ)