 |
ໃນກອງປະຊຸມ, ທ່ານ ເພັດໃສ ເພຍເທບ ຫົວໜ້າຫ້ອງການ ສວສສຊ ໄດ້ຂຶ້ນຜ່ານຮ່າງບົດສະຫຼຸບວຽກງານປະຈໍາປີ 2025 ແລະ ທິດທາງແຜນການວຽກງານປະຈໍາປີ 2026 ຊຶ່ງໄດ້ຍົກໃຫ້ເຫັນບັນດາຜົນງານ, ຈຸດດີ, ຈຸດອ່ອນ, ຂໍ້ຄົງຄ້າງ ຕະຫຼອດໄລຍະໜຶ່ງປີຜ່ານມາ ພ້ອມທັງກຳນົດທິດທາງແຜນການໃນປີ 2026. ຈາກນັ້ນ, ກອງປະຊຸມຍັງຮັບຟັງການຜ່ານບົດສະຫຼຸບ ຕີລາຄາວຽກງານແຂ່ງຂັນ-ຍ້ອງຍໍ ຮັັກຊາດ ແລະ ພັດທະນາ ປະຈໍາປີ 2025 ແລະ ທິດທາງແຜນການປີ 2026 ໂດຍທ່ານ ບຸນລັດ ແກ້ວອາສາ ຫົວໜ້າກົມຈັດຕັ້ງ-ພະນັກງານ ແລະ ມອບໃບຍ້ອງຍໍໃຫ້ແກ່ບຸກຄົນດີເດັ່ນ ແລະ ການຈັດຕັ້ງດີເດັ່ນປະຈໍາປີ 2025, ປະກອບມີ ຍ້ອງຍໍບຸກຄົນທີ່ມີຜົນງານປະກອບສ່ວນໃນບັ້ນຮັບໃຊ້ກອງປະຊຸມໃຫຍ່ສະມາຊິກພັກ ຄັ້ງທີ II ຂອງອົງຄະນະພັກ ສວສສຊ ຈໍານວນ 103 ທ່ານ, ຍ້ອງຍໍບຸກຄົນທີ່ມີຜົນງານປະກອບສ່ວນໃນບັ້ນຮັບໃຊ້ສວນສະໜາມ ວັນຊາດທີ 2 ທັນວາ ຄົບຮອບ 50 ປີ ຈໍານວນ 65 ທ່ານ, ຍ້ອງຍໍບຸກຄົນດີເດັ່ນ ປະຈໍາປີ 2025 ຈໍານວນທັງໝົດ 182 ທ່ານ, ໃນນັ້ນ ມີປະເພດ I ຈໍານວນ 153 ທ່ານ, ປະເພດ II ຈໍານວນ 29 ທ່ານ ແລະ ຍ້ອງຍໍການຈັດຕັ້ງທີ່ມີຜົນງານດີເດັ່ນ ຈໍານວນ 11 ພາກສ່ວນ.
 |
ໂອກາດດັ່ງກ່າວ, ທ່ານ ກອງແກ້ວ ໄຊສົງຄາມ ໄດ້ກ່າວຍ້ອງຍໍຊົມເຊີຍຄະນະພັກ, ຄະນະນໍາແຕ່ລະຂັ້ນ ແລະ ອົງການຈັດຕັ້ງມະຫາຊົນ, ບຸກຄົນດີເດັ່ນພາຍໃນ ສວສສຊ ທີ່ສາມາດຍາດໄດ້ຜົນສຳເລັດໃນຄັ້ງນີ້. ພ້ອມນັ້ນ ທ່ານຍັງໄດ້ເນັ້ນໜັກວ່າ: ໃນປີ 2026 ສວສສຊ ຕ້ອງໄດ້ອອກແຮງປຸກລະດົມກຳລັງແຮງຂອງທຸກພາກສ່ວນ, ເຊີດຊູຈິດໃຈຮັກຊາດ, ເອກະພາບ, ເປັນເຈົ້າຕົນເອງ ແລະ ຈົ່ງພ້ອມກັນເອົາໃຈໃສ່ບາງບັນຫາສໍາຄັນ ຄື: ຕ້ອງເຊື່ອມຊຶມ ແລະ ກຳແໜ້ນແນວທາງຂອງພັກ, ມະຕິ, ຄຳສັ່ງຂອງຂັ້ນເທິງ, ຕ້ອງສືບຕໍ່ປ່ຽນແປງຕົນເອງຢ່າງບໍ່ຢຸດຢັ້ງ ຕາມຈິດໃຈສ້າງການຫັນປ່ຽນທີ່ແຂງແຮງ, ເລິກເຊິ່ງ ແລະ ຮອບດ້ານ ຕອບສະໜອງຄວາມຮຽກຮ້ອງຕ້ອງການ ໃນການຍົກສູງຄວາມສາມາດ ແລະ ຄຸນນະພາບໃນການນຳພາ ໃນໄລຍະໃໝ່, ຕ້ອງຕັ້ງໜ້າເປັນເຈົ້າການ ແລະ ມີຄວາມຮັບຜິດຊອບສ້າງບັນດາຕົວແບບດີເດັ່ນດ້ານຕ່າງໆ ເພື່ອສົ່ງເສີມຂະບວນການວຽກງານໃຫ້ກວ້າງຂວາງ, ແຂງແຮງ, ຟົດຟື້ນ ແລະ ຫ້າວຫັນ, ຖືເປັນຫຼັກການ ແລະ ເປັນຄວາມຮັບຜິດຊອບໜ້າທີ່ການເມືອງຂອງຕົນ, ຖືເອົາການຕິດຕາມຊຸກຍູ້, ກວດກາ ແລະ ຕີລາຄາວຽກງານ, ວຽກດີຄົນເດັ່ນ ທັງຍ້ອງຍໍໃຫ້ຖືກຄົນ, ເພື່ອຊຸກຍູ້ສົ່ງເສີມຂະບວນການໃຫ້ຂະຫຍາຍຕົວກວ້າງຂວາງ ແລະ ເອົາໃຈໃສ່ວຽກງານອື່ນໆ.
(ຂ່າວ: ແສງຈັນ)
ຄໍາເຫັນ