 |
ສະຫາຍ ບຸນຍະລິດ ສຸກຈະເລີນ ຜູ້ອຳນວຍການ ບໍລິສັດສຸກຈະເລີນຟາມ ໄດ້ຂຶ້ນປະກອບຄໍາເຫັນ ຕໍ່ກອງປະຊຸມໃຫຍ່ຜູ້ແທນອົງຄະນະພັກກະຊວງກະສິກຳ ແລະ ສິ່ງແວດລ້ອມ ຄັ້ງທີ VII ທີ່ຫ້ອງວ່າການສູນກາງພັກ ເມື່ອບໍ່ດົນມານີ້ວ່າ: ບໍລິສັດສຸກຈະເລີນຟາມ ເລີ່ມລົງທຶນສ້າງຟາມລ້ຽງໄກ່ພັນໄຂ່ຢູ່ແຂວງຈຳປາສັກ ປີ 2008, ມີໄກ່ພັນໄຂ່ ຈໍານວນ 3 ແສນໂຕ. ມາຮອດປີ 2022 ໂດຍໄດ້ຮັບຄໍາປຶກສາ ແລະ ແນະນໍາດ້ານວິຊາການ ຈາກກົມລ້ຽງສັດ ແລະ ການປະມົງ ໃນການຈັດຕັ້ງປະຕິບັດແຜນງານການຄໍ້າປະກັນສະບຽງອາຫານ ແລະ ແຜນງານການຜະລິດກະສິກຳເປັນສິນຄ້າ ຂອງກະຊວງກະສິກຳ ແລະ ສິ່ງ ແວດລ້ອມ, ບໍລິສັດ ສຸກຈະເລີນຟາມ ໄດ້ຮ່ວມກັບ ທະນາຄານພັດທະນາລາວ ລົງທຶນກໍ່ສ້າງຟາມໄກ່ພັນໄຂ ແຫ່ງທີ 2 ຢູ່ບ້ານອີ່ໄລນາຂ່າ ເມືອງນາຊາຍທອງ ນະຄອນຫຼວງວຽງຈັນ, ເນື້ອທີ່ດິນທັງໝົດ 44 ເຮັກຕາ ເພື່ອລ້ຽງໄກ່ພັນໄຂ່ ຈໍານວນ 1 ລ້ານໂຕ. ການກໍ່ສ້າງໄດ້ແບ່ງອອກເປັນ 2 ໄລຍະ ຄື: ໄລຍະທີ 1 ໄດ້ກໍ່ສ້າງ ແລະ ລ້ຽງໄກ່ພັນໄຂ່ ໃນປີ 2023 ຈໍານວນ 5 ແສນໂຕ ແລະ ໄລຍະທີ 2 ຈະກໍ່ສ້າງ ແລະ ລ້ຽງໄກ່ພັນໄຂ່ເພີ່ມຕື່ມ ຈໍານວນ 5 ແສນໂຕ ໃນປີ 2026 ແລະ ຈະກາຍເປັນຟາມລ້ຽງໄກ່ພັນໄຂ່ແບບລະບົບປິດ ຫຼື EVAP (Evaporative Cooling System) ທີ່ໃຫຍ່ທີ່ສຸດໃນ ສປປ ລາວ.
 |
ປັດຈຸບັນ, ຟາມລ້ຽງໄກ່ພັນໄຂ່ ຂອງບໍລິສັດ ຢູ່ນະຄອນຫຼວງວຽງຈັນ ມີໂຮງເຮືອນລ້ຽງໄກ່ພັນໄຂ່ ຈໍານວນ 8 ຫຼັງ, ລ້ຽງໄກ່ພັນໄຂ່ ຈໍານວນ 5 ແສນໂຕ ແລະ ມີໂຮງເຮືອນອະນຸບານໄກ່ ຈໍານວນ 2 ຫຼັງ, ອະນຸບານໄກ່ 130 ພັນໂຕ. ລະບົບການລ້ຽງ ແລະ ການຈັດການຟາມທັງໝົດ ແມ່ນແບບອຸດສາຫະກຳ ແລະ ນໍາໃຊ້ເຕັກໂນໂລຊີທີ່ທັນສະໄໝ ນັບແຕ່ການຈັດລະບົບແຜນຜັງຟາມ, ການອອກແບບໂຮງເຮືອນ, ລະບົບການໃຫ້ອາຫານ, ການຈັດການສິ່ງເສດເຫຼືອ, ການຄວບຄຸມອຸນຫະພູມໃນໂຮງເຮືອນ, ລະບົບການປ້ອງກັນພະຍາດ, ການເກັບໄຂ່, ການຄັດແຍກໄຂ່ ແລະ ອື່ນໆ. ຊຶ່ງເຮັດໃຫ້ຫຼຸດຜ່ອນຕົ້ນທຶນ ແລະ ການ ນໍາໃຊ້ແຮງງານຄົນ, ທັງໃຫ້ຜົນຜະລິດຫຼາຍມີຄຸນນະພາບສູງ. ສໍາລັບແນວພັນໄກ່ທີ່ນໍາມາລ້ຽງ ແມ່ນນໍາເຂົ້າມາຈາກ ສສ ຫວຽດນາມ ມີ 2 ສາຍພັນ ຄື: ສາຍພັນ Isa ແລະ ສາຍພັນ Hy-Line brown; ສ່ວນຫົວອາຫານ ແມ່ນນໍາໃຊ້ຫົວອາຫານ ຂອງໂຮງງານຜະລິດຫົວອາຫານສັດທີ່ຜະລິດຢູ່ພາຍໃນປະເທດ.
 |
ສ່ວນຜົນຜະລິດ ໄລຍະ 3 ປີ (2023-2025) ສາມາດຜະລິດໄຂ່ໄດ້ 8 ລ້ານກວ່າແຕະ ຫຼື 263 ລ້ານກວ່າໜ່ວຍ, ໄຂ່ໄກ່ທີ່ຜະລິດ ມີ 5 ເບີ (ໄຂ່ເບີ 0-ເບີ 4), ໄຂ່ທີ່ຜະລິດໄດ້ຫຼາຍ ແມ່ນໄຂ່ໄກ່ ເບີ 3 ແລະ ເບີ 2 ກວມຫຼາຍກວ່າ 60%. ຕະຫຼາດຈໍາໜ່າຍໄຂ່ໄກ່ ແມ່ນສະໜອງໃຫ້ບັນດາແຂວງພາກກາງ ແລະ ພາກໃຕ້ ເປັນຕົ້ນນະຄອນຫຼວງວຽງຈັນ, ແຂວງວຽງຈັນ, ໄຊສົມບູນ, ບໍລິຄໍາໄຊ, ຄໍາມ່ວນ, ສະ ຫວັນນະເຂດ, ສາລະວັນ, ຈໍາປາສັກ, ເຊກອງ ແລະ ແຂວງອັດຕະປື. ລາຍຮັບຈາກການຂາຍໄຂ່ໄກ່ ແຕ່ປີ 2023 ຮອດເດືອນ 8 ປີ 2025 ທັງໝົດ 621 ຕື້ກວ່າກີບ, ສາມາດຊຳລະຕົ້ນທຶນເງິນກູ້ໃຫ້ແກ່ທະນາ ຄານ ໄດ້ແລ້ວ ຈໍານວນ 58 ຕື້ກີບ.
ສະຫາຍ ບຸນຍະລິດ ສຸກຈະເລີນ ກ່າວຕື່ມວ່າ: ຄຽງຄູ່ກັບຂໍ້ສະດວກ ແລະ ຜົນໄດ້ຮັບທີ່ກ່າວມານັ້ນ ບໍລິສັດສຸກຈະເລີນຟາມ ຍັງມີສິ່ງທ້າທາຍຈໍານວນໜຶ່ງ ເປັນຕົ້ນ: 1) ບັນຫາການເພີ່ມຂຶ້ນ ຂອງອັດຕາແລກ ປ່ຽນ, ເງິນເຟີ້, ລາຄາສິນຄ້າ, ຄ່າຄອງຊີບ ເຮັດໃຫ້ຕົ້ນທຶນການຜະລິດສູງຂຶ້ນ; 2) ວັດຖຸອຸປະກອນ ແລະ ເຄື່ອງອາໄຫຼ່ ເພື່ອບໍາລຸງ ຮັກສາຈໍານວນໜຶ່ງມີຄວາມຈໍາເປັນຕ້ອງນໍາເຂົ້າຈາກຕ່າງປະເທດ; 3) ແຮງງານກະສິກຳ ທີ່ເປັນມືອາຊີບ ດ້ານການລ້ຽງ ຢູ່ພາຍໃນປະເທດ ມີຈຳກັດ; 4) ມີການລັກລອບນໍາເຂົ້າໄຂ່ໄກ່ແບບບໍ່ຖືກຕ້ອງຕາມລະບຽບກົດໝາຍ ຢູ່ຕາມທ້ອງຖິ່ນຕ່າງໆລຽງຕາມຊາຍແດນ ຊຶ່ງພາໃຫ້ມີຜົນກະທົບຕໍ່ລາຄາ ແລະ ຕະຫຼາດຈໍາໜ່າຍ.
ແຜນການພັດທະນາຟາມໃນຕໍ່ໜ້າ ບໍລິສັດ ສຸກຈະເລີນຟາມ ຈະສືບຕໍ່ກໍ່ສ້າງໂຮງເຮືອນລ້ຽງໄກ່ພັນໄຂ່ເພີ່ມຕື່ມ ຈໍານວນ 5 ແສນໂຕ ຕາມແຜນການທີ່ກຳນົດໄວ້ ເພື່ອໃຫ້ກາຍເປັນຟາມລ້ຽງໄກ່ພັນໄຂ່ແບບລະບົບປິດ ຫຼື EVAP ທີ່ ໃຫຍ່ທີ່ສຸດໃນ ສປປ ລາວ, ສືບຕໍ່ປຶກສາຫາລືກັບໂຮງງານຜະລິດຫົວອາຫານສັດ ຢູ່ພາຍໃນປະເທດ ເພື່ອຮ່ວມກັນພັດທະນາສູດຫົວອາຫານສັດທີ່ເໝາະສົມ ແລະ ເງື່ອນໄຂການລົງ ທຶນຮ່ວມກັນ; ຄົ້ນຄວ້າຂະຫຍາຍ ພໍ່ພັນ-ແມ່ພັນໄກ່ພັນໄຂ່ໃຫ້ສາມາດກຸ້ມຕົນເອງ; ຂະຫຍາຍຕະຫຼາດຈໍາໜ່າຍໄຂ່ໄກ່ ໄປສູ່ບັນດາແຂວງໃນທົ່ວປະເທດ ຕິດພັນກັບການສ້າງໂຮງງານປຸງແຕ່ງຜະລິດຕະພັນໄຂ່ໄກ່ສໍາເລັດຮູບ ເພື່ອເພີ່ມມູນຄ່າ.
ເພື່ອບັນລຸຕາມແຜນການດັ່ງກ່າວນັ້ນ, ສະຫາຍ ບຸນຍະລິດ ສຸກຈະເລີນ ໄດ້ສະເໜີໃຫ້ພາກສ່ວນກ່ຽວຂ້ອງ ເພີ່ມທະວີປະຕິບັດມາດຕະການເກືອດຫ້າມນໍາເຂົ້າສິນຄ້າທີ່ສາມາດຜະລິດໄດ້ຢູ່ພາຍໃນປະເທດ ແລະ ປະຕິບັດມາດຕະການປ້ອງກັນ, ສະກັດກັ້ນການລັກລອບນໍາເຂົ້າແບບບໍ່ຖືກຕ້ອງຕາມລະບຽບກົດໝາຍຢ່າງເຂັ້ມງວດ ເພື່ອປົກປ້ອງສິດຜົນປະໂຫຍດ ຂອງຜູ້ຜະລິດພາຍໃນ, ພ້ອມທັງໃຫ້ການສະໜັບສະໜູນແຫຼ່ງທຶນອັດຕາດອກເບ້ຍຕໍ່າທີ່ມີປະສິດທິຜົນ.
ຄໍາເຫັນ