ສູນຝຶກອົບຮົມກອງພົນທີ 3 ປາຖະກະຖາວັນແມ່ຍິງສາກົນ

ໃນຕອນເຊົ້າວັນທີ 6 ມີນານີ້, ສູນຝຶກອົບຮົມກອງພົນທີ 3 ໄດ້ຈັດຕັ້ງພິທີປາຖະກະຖາວັນແມ່ຍິງສາກົນຄົບຮອບ 114 ປີຄຶ: (8/3/1910-8/3/2024) ຂຶ້ນຢູ່ທີ່ສະໂມສອນກົມກອງ ໂດຍການເຂົ້າຮ່ວມເປັນປະທານຂອງສະຫາຍ ພັນໂທ ທອງຄໍາ ວົງນະຄອນ ຄະນະປະຈໍາພັກ ປະທານກວດກາຫົວໜ້າພະແນກການເມືອງສູນຝຶກອົບຮົມກອງພົນທີ 3, ມີຂະແໜງການກ່ຽວຂ້ອງເຂົ້າຮ່ວມ.
    ສະຫາຍ ພັນຕີ ນາງ ບົວລອຍ ແສງຄໍາ ຊ່ວຍວຽກຂະແໜງຊາວໜຸ່ມ-ສະຫະພັນແມ່ຍິງຜູ້ຮັບຜິດຊອບວຽກງານ ສະຫະພັນແມ່ຍິງ ສູນຝຶກອົບຮົມກໍໄດ້ທົບທວນຫວນຄືນ ແລະ ຍົກໃຫ້ເຫັນປະຫວັດມູນເຊື້ອການກຳເນີດຂອງວັນແມ່ຍິງສາກົນ ວັນທີ 8 ມີນາປີ 1910 ທີ່ໂກເປນຮາກນະຄອນຫຼວງຂອງປະເທດເດນມາກ.
ໂອກາດດັ່ງກ່າວ. ສະຫາຍ ພັນໂທ ທອງຄໍາ ວົງນະຄອນ ໄດ້ຮຽກຮ້ອງມາຍັງເອື້ອຍນ້ອງສະຫະພັນແມ່ຍິງທົ່ວສູນຝຶກອົບຮົມໃຫ້ກຳແໜ້ນພາລະບົດບາດ, ສິດ ແລະ ໜ້າທີ່ຂອງຕົນ, ຍົກສູງຄວາມຮັບຜິຊອບຕໍ່ໜ້າທີວຽກງານການເມືອງຂອງຕົນ, ຕ້ານ ແລະ ສະກັດກັ້ນປະກົດການຫຍໍ້ທໍ້ຕ່າງໆ, ເພີ່ມທະວີພາລະບົດບາດໃນການຊີ້ນໍາ-ນຳພາເຂົ້າໃນຂົງເຂດວຽກງານສະຫະພັນແມ່ຍິງ, ນຳເອົາເນື້ອໃນ ຈິດໃຈຂອງການປາຖະກະຖາໃນຄັ້ງນີ້ໄປໝູນໃຊ້ເຂົ້າໃນໜ້າທີວຽກງານຕົວຈິງຂອງກົມກອງຕົນໃຫ້ມີບາດກ້າວຫັນປ່ຽນອັນໃໝ່, ຕັ້ງໜ້າສຶກສາອົບຮົມເອື້ອຍນ້ອງສະຫະພັນແມ່ຍິງໃຫ້ເປັນເຈົ້າການໃນການປະຕິບັດໜ້າທີ່ວຽກງານ, ສືບຕໍ່ເຝິກຝົນຫຼໍຫຼອມຕົນເອງທາງດ້ານຄວາມຮູ້, ຄວາມສາມາດ, ມີຄຸນສົມບັດສິນທຳປະຕິວັດ, ມີຄວາມສາມັກຄີເປັນເອກະພາບພາຍໃນໜ່ວຍ, ສາມັກຄີກັບປະຊາຊົນບັນດາເຜົ່າ, ຊຸກຍູ້ໃຫ້ພະນັກງານ-ສະຫະພັນແມ່ຍີງໃນທົ່ວກົມກອງໃຫ້ມີຄວາມຫ້າວຫັນອຸ່ນອ່ຽນທຸ່ນທຽງ, ມີຈິດໃຈອົດທົນຜ່ານຜ່າທຸກອຸປະສັກນາໆປະການ, ຕັ້ງໜ້າສ້າງແມ່ຍິງ 3 ດີ, ສ້າງຂະບວນການຄອບຄົວວັດທະນາທຳ, ສ້າງເຖດຖະກິດແກ້ໄຂຊີວິດການເປັນຢູ່ຂອງຄອບຄົວໃຫ້ນັບມື້ນັບດີຂຶ້ນກວ່າເກົ່າ.
    (ຂ່າວ-ພາບ: ສົມພົງ ອິນຕະວັນ).