 |
ສະຫາຍ ຄໍາມອນ ຈັນທະຈິດ ຮອງຫົວໜ້າ ຄອສພ ຮອງປະທານຜູ້ປະຈຳການ ສພທ ໄດ້ຜ່ານບົດສະຫຼຸບຕີລາຄາການຈັດຕັ້ງປະຕິບັດວຽກງານປະຈໍາ 6 ເດືອນຕົ້ນປີ ແລະ ທິດທາງ 6 ເດືອນທ້າຍປີ 2025 ໂດຍຍົກໃຫ້ເຫັນບັນດາຜົນງານໃນ 6 ເດືອນຜ່ານມາ ເປັນຕົ້ນ: ວຽກຄົ້ນຄວ້າທິດສະດີ ແລະ ພຶດຕິກຳ ໃນປີ 2025; ໄດ້ຮັບຮອງບົດວິພາກໂຄງການ ຈໍານວນ 4 ໂຄງການ ຄື: ໜຶ່ງ, ຫົວຂໍ້: “ຍຸດທະສາດການພັດທະນາເສດຖະກິດແບບຍືນຍົງ ເປັນມິດກັບສິ່ງແວດລ້ອມ ຢ່າງຍາວນານ ແນໃສ່ນຳພາປະເທດ ບໍ່ຕົກເຂົ້າໃນແຮ້ວ ຂອງປະເທດລາຍຮັບປານກາງ” ໂດຍມອບໃຫ້ຄະນະກຳມະການດ້ານເສດຖະກິດ-ການເງິນ ເປັນຜູ້ຮັບຜິດຊອບ; ສອງ, ຫົວຂໍ້: “ດຳເນີນນະໂຍບາຍການຕ່າງປະເທດ ແຫ່ງສັນຕິພາບ ແລະ ການຮ່ວມມື ເພື່ອການພັດທະນາໃນໂລກຫຼາຍຂົ້ວ” ໂດຍມອບໃຫ້ຄະນະກຳມະການດ້ານການເມືອງ-ຄວາມໝັ້ນຄົງ ເປັນຜູ້ຮັບ ຜິດຊອບ; ສາມ, ຫົວຂໍ້: “ສືບຕໍ່ປົກປັກຮັກສາ ແລະ ເສີມຂະຫຍາຍວັດທະນະທຳແຫ່ງຊາດ ສົມທົບກັບການຮັບເອົາຄວາມກ້າວໜ້າຈາກວັດທະນະທຳຂອງໂລກ” ໂດຍມອບໃຫ້ຄະນະກຳມະການດ້ານວັດທະນະທຳ-ສັງຄົມ ເປັນຜູ້ຮັບຜິດຊອບ; ສີ່, ຫົວຂໍ້: “ພັກນຳພາໂດຍກົງ, ເດັດຂາດ ແລະ ຮອບດ້ານ” ໂດຍມອບໃຫ້ຄະນະເລຂາທິການວິທະຍາສາດ ເປັນຜູ້ຮັບຜິດຊອບ. ນອກຈາກນີ້, ໄດ້ຮັບຮອງເອົາຫົວຂໍ້ໃຫຍ່, ຫົວຂໍ້ຍ່ອຍ ຂອງກອງປະຊຸມສຳມະນາທິດສະດີ ສອງພັກ ລາວ-ຫວຽດນາມ XII, ລາວ-ຈີນ ຄັ້ງທີ XIII ປີ 2025 ແລະ ລາວ-ກູບາ ຄັ້ງທີ III ປີ 2026.
ສໍາລັບການຄົ້ນຄວ້າທິດສະດີ ແລະ ສະຫຼຸບພຶດຕິກໍາ ຮັບໃຊ້ແນວທາງຂອງພັກ ໄດ້ສໍາເລັດການຮຽບຮຽງຮັບຮອງ ແລະ ຈັດພິມເປັນປື້ມ ກ່ຽວກັບການສ້າງປະຖົມປັດໄຈຕາມເສັ້ນທາງກ້າວຂຶ້ນສັງຄົມນິຍົມ ຢູ່ ສປປ ລາວ; ການຄົ້ນຄວ້າສ້າງໂຄງການ ການເມືອງຂອງພັກປະຊາຊົນປະຕິວັດລາວ ໄດ້ສໍາເລັດການປັບປຸງ ແລະ ຈັດພິມເປັນສະບັບທີ 9, ລົງວັນທີ 31 ກໍລະກົດ 2025; ການກະກຽມສະຫຼຸບ 40 ປີ ແຫ່ງການປ່ຽນແປງໃໝ່ ຢູ່ ສປປ ລາວ ຊຶ່ງມາຮອດປັດຈຸບັນ ໄດ້ສໍາເລັດການກວດແກ້, ຮຽບຮຽງເນື້ອໃນເປັນສະບັບທີ 3 ເພື່ອກະກຽມລາຍງານ ຕໍ່ກອງປະຊຸມສູນກາງຄັ້ງທີ 11 ສະໄໝທີ XI.
 |
ໃນກອງປະຊຸມ, ກໍໄດ້ຍົກໃຫ້ເຫັນດ້ານດີ, ດ້ານອ່ອນ, ບົດຮຽນທີີ່ຖອດຖອນໄດ້; ພ້ອມກັນນັ້ນ, ກໍກຳນົດທິດທາງແຜນການຈັດຕັ້ງເຄື່ອນໄຫວວຽກງານໃນ 6 ເດືອນທ້າຍ ປີ 2025 ໂດຍສະເພາະຄາດໝາຍສູ້ຊົນ ຂອງວຽກງານຕ່າງໆ ໃຫ້ສຳເລັດຜົນ ແລະ ມີປະສິດທິພາບ ຊຶ່ງບັນດາຜົນສຳເລັດ ແລະ ຜົນງານທີ່ຍາດມາໄດ້ຕະຫຼອດ 6 ເດືອນຜ່ານມາໄດ້ສະແດງເຖິງຄວາມເປັນເອກະພາບ ແລະ ຄວາມຮັບຜິດຊອບການເມືອງສູງ ຂອງບັນດາສະມາຊິກ ສພທ; ແມ່ນການປະກອບສ່ວນອັນສຳຄັນ ແລະ ສົມກຽດ ເຂົ້າໃນການປັບປຸງບູລະນະລັດປະຊາທິປະໄຕ ປະຊາຊົນໃຫ້ມີຄວາມເຂັ້ມແຂງ ແລະ ໜັກແໜ້ນຂຶ້ນຕື່ມ ເພື່ອສາມາດປະກອບສ່ວນເຂົ້າໃນພັດທະນາເສດຖະກິດ-ສັງຄົມ ຂອງປະເທດຊາດ ແລະ ການຄົ້ນຄວ້າກຳນົດແນວທາງ, ແຜນນະໂຍບາຍຂອງພັກ-ລັດ ຢ່າງມີປະສິດທິພາບ.
(ຂ່າວ: ສພທ, ພາບ: ສຸກສະຫວັນ)
ຄໍາເຫັນ