ໂດຍການເປັນປະທານ ຂອງ ທ່ານ ນາງ ນາລີ ສີສຸລິດພັນລະຍາຂອງທ່ານປະທານປະເທດ ແຫ່ງ ສປປລາວ ຊຶ່ງມີ ສົມເດັດພະລາຊິນີແຫ່ງ ລັດປະຮັງ,ມາເລເຊຍ - ອາຊີຊ່າ ອີດສະການດ້າ, ຜູ້ກໍ່ຕັ້ງ,ຜູ້ອຸປະຖໍາ ແລະປະທານມູນນິທິຕໍ່າຫູກ ແຫ່ງ ຣາຊະວົງ ປະຮັງ,ທ່ານ ນາງ ໂງ ເຟືອງ ລີ ພັນລະຍາ ຂອງ ທ່ານເລຂາທິການໃຫຍ່ ພັກກອມມູນິດ ຫວຽດນາມ,ທ່ານ ນາງ GKBRAA Paku Alam ປະທານສະມາຄົມສິລະປະແຜ່ນແພພື້ນເມືອງແຫ່ງອາຊີຕາເວັນອອກສ່ຽງໃຕ້,ມີທູຕານຸທູດ, ວິທະຍາກອນ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ນາງ ນາລີ ສີສຸລິດກ່າວເປີດກອງປະຊຸມວ່າ: ກອງປະຊຸມສຳມະນາແຜ່ນແພພື້ນເມືອງອາຊຽນຄັ້ງທີ9,ເປັນເທື່ອທໍາອິດ ທີ່ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມທີ່ມີຄວາມສຳຄັນນີ້.ພວກເຮົາຮູ້ສຶກເປັນກຽດທີ່ໄດ້ນໍາເອົາສິລະປະແຜ່ນແພພື້ນເມືອງທີ່ມີຄວາມງົດງາມ ແລະ ຫຼາກຫຼາຍຂອງອາຊຽນມາສູ່ດິນແດນຂອງ ລາວ, ພ້ອມດຽວກັນນັ້ນ, ກໍມີຄວາມພູມໃຈທີ່ຈະນໍາສະເໜີມໍລະດົກທາງວັດທະນະທໍາຂອງລາວ ຕໍ່ບັນດາທ່ານ,ຫົວຂໍ້ຂອງກອງປະຊຸມໃນປີນີ້ແມ່ນ“ຮັດແໜ້ນສາຍພົວພັນປະຊາຄົມອາຊຽນ ຜ່ານມໍລະດົກ ວັດທະນະທໍາແລະແຜ່ນແພ”ສະແດງໃຫ້ເຫັນເຖິງສາຍພົວພັນອັນເລິກເຊິ່ງທາງດ້ານວັດທະນະທຳລະຫວ່າງບັນດາປະເທດອາຊຽນພວກເຮົາ.
ທ່ານກ່າວຕື່ມວ່າ:ກອງປະຊຸມສຳມະນາຄັ້ງນີ້ບໍ່ພຽງແຕ່ເປັນການປະກອບສ່ວນເຂົ້າໃນການອະນຸລັກສິລະປະແຜ່ນແພພື້ນເມືອງເທົ່ານັ້ນ,ແຕ່ຍັງເປັນການໃຫ້ກຽດ,ເຊີດຊູພູມປັນຍາ,ຄວາມມານະພະຍາຍາມແລະຄວາມຄິດສ້າງສັນຂອງແມ່ຍິງຜູ້ທີ່ໄດ້ອະນຸລັກຮັກສາປະເພນີທີ່ງົດງາມລໍ້າເລິກ ແລະ ມີຄຸນຄ່າສູງສົ່ງໃຫ້ຄົງຢູ່ກັບສັງຄົມຂອງພວກເຮົາຕະຫຼອດມາແລະ ຕະຫຼອດໄປ,ການຕໍ່າແຜ່ນແພໃນອະດີດ, ແຕ່ລະປະເທດແມ່ນເຮັດພໍໃຜພໍລາວຕາມທ່າແຮງບົ່ມຊ້ອນທາງດ້ານວັດຖຸດິບເພື່ອນໍາໃຊ້ເຂົ້າໃນຊີວິດປະຈໍາວັນຂອງຕົນ,ແຕ່ມາເຖິງປັດຈຸບັນວຽກງານຕໍ່າແຜ່ນແພມີການເຊື່ອມໂຍງເຂົ້າຫາກັນ,ມີການສະໜອງວັດຖຸດິບ, ມີຕະຫຼາດຈໍາໜ່າຍຜະລິດຕະພັນທີ່ຫຼາກຫຼາຍ ແລະ ກວ້າງຂວາງຂຶ້ນເຮັດໃຫ້ພວກເຮົາມີສິນຄ້າທີ່ຫຼາກຫຼາຍເພື່ອແລກປ່ຽນກັນ.ສຳລັບບັນດາປະເທດອາຊຽນ,ເນື່ອງຈາກມີຄວາມໃກ້ຊິດທາງດ້ານທີ່ຕັ້ງພູມສາດເຮັດໃຫ້ມີການແລກປ່ຽນຄວາມຮູ້ແລະ ແລກປ່ຽນວັດຖຸດິບຊຶ່ງກັນແລະກັນຈຶ່ງເຮັດໃຫ້ຜະລິດຕະພັນຕໍ່າເເຜ່ນຂອງພວກເຮົາຈຶ່ງມີຮູບແບບຄ້າຍຄືກັນ,ເຖິງວ່າແຜ່ນແພພື້ນເມືອງຂອງແຕ່ລະປະເທດຈະມີຮູບແບບລວດລາຍທີ່ວິຈິດງົດງາມເປັນເອກະລັກສະເພາະຂອງໃຜລາວ, ແຕ່ສິ່ງທີ່ພວກເຮົາມີຄວາມພາກພູມໃຈ ແລະ ເຊີດຊູຮ່ວມກັນນັ້ນ ກໍຄື: ຄວາມຮັກ, ທັກສະ, ຫົວຄິດປະດິດສ້າງ, ຄວາມປານີດທີ່ມາຈາກພູມປັນຍາຂອງແມ່ຍິງອາຊຽນ ທີ່ຝັງຢູ່ໃນແຕ່ລະຜືນຜ້າທີ່ສວຍສົດງົດງາມ,ໃນປັດຈຸບັນ,ເນື່ອງຈາກການຫັນປ່ຽນວິຖີຊີວິດແບບດັ່ງເດີມໄປສູ່ວິຖີຊີວິດທີ່ທັນສະໄໝ ຕິດພັນກັບການຂະຫຍາຍຕົວທາງດ້ານເສດຖະກິດ-ສັງຄົມ, ເຖິງວ່າພວກເຮົາພວມປະເຊີນກັບສິ່ງທ້າທາຍໃນການປົກປັກຮັກສາວັດທະນະທໍາການຜະລິດ ແລະ ການນຸ່ງຖືທີ່ນຳໃຊ້ແຜ່ນແພພື້ນເມືອງໃຫ້ຄົງຢູ່ກໍຕາມ,ແຕ່ສັງເກດເຫັນວ່າຢູ່ບັນດາປະເທດອາຊຽນພວກເຮົາກໍໄດ້ມີຄວາມເອົາໃຈໃສ່ໃນການສົ່ງເສີມ ແລະ ປົກປັກຮັກສາແຜ່ນແພພື້ນເມືອງໄວ້ໄດ້ເປັນຢ່າງດີ. ສະເພາະ ຢູ່ສປປລາວ,ການຕໍ່າຫູກທໍໄໝໄດ້ຕິດແໜ້ນກັບວິຖີຊີວິດຂອງແມ່ຍິງລາວບັນດາເຜົ່າມາແຕ່ດຶກດໍາບັນ,ມາເຖິງປັດຈຸບັນ, ເຕັກໂນໂລຊີມີການຂະຫຍາຍຕົວແຕ່ພວກເຮົາກໍຍັງສືບຕໍ່ໃຫ້ຄ່ານິຍົມການຕໍ່າແຜ່ນແພແບບດັ່ງເດີມ,ທັງນີ້ກໍເພື່ອຮັກສາມູນເຊື້ອທາງດ້ານວັດທະນະທໍາອັນດີງາມຂອງຊາດໄວ້ໃຫ້ດໍາລົງຄົງຢູ່ຊົ່ວລູກຊົ່ວຫຼານສືບຕໍ່ໄປ. ນອກຈາກນັ້ນການນຸ່ງຖືຜ້າແພພື້ນເມືອງຍັງຄົງເປັນສ່ວນໜຶ່ງທີ່ສໍາຄັນ ໃນຊີວິດປະຈໍາວັນຂອງຄົນລາວບໍ່ວ່າຢູ່ໃນຕົວເມືອງໃຫຍ່ກໍຄືຢູ່ໃນເຂດຊົນນະບົດ.ແມ່ຍິງລາວແມ່ນຍັງນິຍົມນຸ່ງຜ້າໄໝບ່ຽງແພ,ສ່ວນຜູ້ຊາຍລາວກໍຍັງສືບຕໍ່ນິຍົມຊົມຊອບນຸ່ງເສື້ອຜ້າຝ້າຍ,ຜ້າໄໝທີ່ເປັນເອກະລັກຂອງລາວໃນງານປະເພນີທີ່ສໍາຄັນຂອງຄອບຄົວກໍຄືຂອງຊາດໄວ້ໄດ້ຢ່າງງົດງາມ.
ກອງປະຊຸມສໍາມະນາໃນຄັ້ງນີ້ເຊື່ອວ່າແຕ່ລະຜືນຜ້າທີ່ພວກເຮົາສຶກສາ,ແຕ່ລະເລື່ອງລາວທີ່ພວກເຮົາແບ່ງປັນແລະ ແຕ່ລະແນວຄິດທີ່ພວກເຮົາແລກປ່ຽນກັນຢ່າງສ້າງສັນນັ້ນລ້ວນແຕ່ເປັນການປະກອບສ່ວນເຂົ້າໃນການສ້າງປະຊາຄົມອາຊຽນທີ່ເຂັ້ມແຂງ,ປະຊາຄົມທີ່ມີຄວາມສາມັກຄີປອງດອງໃນຄວາມຫຼາກຫຼາຍ.
(ຂ່າວ-ພາບ:ສຳນານ)
ຄໍາເຫັນ