 |
ກອງປະຊຸມຄັ້ງນີ້, ຈັດຂຶ້ນເພື່ອເປັນການກວດຜ່ານຮັບຮອງເນື້ອໃນປຶ້ມປະຫວັດວັນນະຄະດີໃນໄລຍະປີ 1986-2025 ແລະ ພິຈາລະນາປັບແກ້ເນື້ອໃນຕາມຄຳເຫັນຂອງຄະນະກຳມະການຮັບຮອງ. ໂອກາດນີ້, ທ່ານ ຮອງລັດຖະມົນຕີ ກ່າວວ່າ: ວຽກງານຄົ້ນຄວ້າປະຫວັດວັນນະຄະດີລາວ ໄລຍະປີ 1986-2025 ສະບັບນີ້ເລີ່ມດຳເນີນການມາແຕ່ທ້າຍປີ 2022 ເປັນຕົ້ນມາ ຊຶ່ງພວກເຮົາໄດ້ເຫັນຜົນສຳເລັດເປັນກ້າວໆມາ ພ້ອມທັງໄດ້ປຶກສາຫາລືແລກປ່ຽນຄວາມຄິດຄວາມເຫັນຮ່ວມກັນຫຼາຍຫຼົບຫຼາຍຕ່າວ ໂດຍເລີ່ມຈາກການກຳນົດໂຄງຮ່າງລວມເກັບກຳຂໍ້ມູນ ແລະ ເອກະສານອ້າງອີງທີ່ກ່ຽວຂ້ອງຕ່າງໆ, ໄດ້ມອບໝາຍແບ່ງຄວາມຮັບຜິດຊອບໃຫ້ຄະນະຮຽບຮຽງແຕ່ລະຄົນ ຈາກເຫດຈຳເປັນໃນການປ່ຽນແປງຕາມສະພາບຕົວຈິງຂອງບຸກຄົນ ແລະ ການດຳເນີນງານຜ່ານມາ ເຮັດໃຫ້ຕ້ອງໄດ້ຈັດແບ່ງຄວາມຮັບຜິດຊອບ ໃນການຂຽນຮຽບຮຽງເນື້ອໃນຄືນໃໝ່ ໂດຍມີການເພີ່ມ ແລະ ປັບປ່ຽນຜູ້ຂຽນສຳລັບເນື້ອໃນບາງພາກຂອງປຶ້ມຫຼາຍຄັ້ງ, ເພື່ອໃຫ້ການດຳເນີນງານມີປະສິດທິພາບສູງ, ເຖິງຢ່າງໃດກໍຕາມ ປັດຈຸບັນພວກເຮົາໄດ້ເຮັດສຳເລັດການສ້າງຕົ້ນສະບັບທີ່ສາມາດຜ່ານຄະນະກຳມະການຮັບຮອງທີ່ມີເນື້ອໃນຫຼັກຈຳນວນ 183 ໜ້າ. ນອກນັ້ນ, ຍັງມີເອກະສານພາກຜະໜວກ, ພາກເພີ່ມເຕີມທີ່ສຳຄັນປະກອບຕື່ມພາຍຫຼັງອີກຈຳນວນໜຶ່ງ. ຜົນສຳເລັດທີ່ຜ່ານມາ, ສະແດງໃຫ້ເຫັນເຖິງຄວາມຕັ້ງໃຈອັນໜັກແໜ້ນຂອງຄະນະຮັບຜິດຊອບທຸກທ່ານ ໃນການມຸ່ງໝັ້ນສ້າງຜົນງານທີ່ຊົງຄຸນຄ່າ ອັນເປັນປະໂຫຍດຕໍ່ຂົງເຂດວິຊາການ ແລະ ວັດທະນະທຳລາວຢ່າງຍິ່ງ. ສະນັ້ນ, ຮຽກຮ້ອງມາຍັງບັນດາຄະນະຜູ້ຮັບຜິດຊອບ ຈົ່ງສຸມຈິດສຸມໃຈທຸ້ມເທສະຕິປັນຍາ ສົນທະ ນາປະກອບຄຳຄິດຄຳເຫັນ ແລະ ປຶກສາຫາລືຮ່ວມກັນ ເພື່ອໃຫ້ໄດ້ຄຳເຫັນທີ່ເປັນເອກະພາບກັນໃນຈຸດທີ່ຕ້ອງໄດ້ປັບປຸງແກ້ໄຂດ້ານເນື້ອໃນຕໍ່ໄປ ເພື່ອໃຫ້ໄດ້ສະບັບສົມບູນ ທີ່ສາມາດພິມເຜີຍແຜ່ໃນຕໍ່ໜ້າ.
ກອງປະຊຸມຍັງໄດ້ນຳສະເໜີສະພາບລວມກ່ຽວກັບການຮຽບຮຽງປຶ້ມປະຫວັດວັນນະຄະດີລາວ ໄລຍະປີ 1986-2025 ພ້ອມທັງປະກອບຄຳຄິດຄຳເຫັນຢ່າງກົງໄປກົງມາ ແລະ ພິຈາລະນາຮັບຮອງເອົາເນື້ອໃນປຶ້ມດັ່ງກ່າວ. ນອກນັ້ນ, ຍັງຈະໄດ້ທົບທວນຄືນຄວາມເຫັນຂອງຄະນະກຳມະການຮັບຮອງ ແລະ ຜູ້ເຂົ້າຮ່ວມກອງປະຊຸມຮັບຮອງເນື້ອໃນປຶ້ມຕື່ມອີກ.
ຂ່າວ: ສສກ
ຄໍາເຫັນ