 |
ສະຫາຍ ນາງ ສຸດສາຍໃຈ ດວງສະຫວັນ ກ່າວວ່າ: ພິທີສະເຫຼີມສະຫຼອງວັນແມ່ຍິງສາກົນ ຄົບຮອບ 116 ປີ ສະແດງເຖິງມູນເຊື້ອປະຫວັດຄວາມເປັນມາຂອງວັນແມ່ຍິງສາກົນ ແລະ ຜົນງານການເຄື່ອນໄຫວວຽກງານຂອງສະຫະພັນແມ່ຍິງກະຊວງ ສສກ ປະຈຳປີ 2025. ພາຍຫຼັງສຳເລັດກອງປະຊຸມໃຫຍ່ຜູ້ແທນສະຫະພັນແມ່ຍິງກະຊວງ ສສກ ຄັ້ງທີ XI ໃນເດືອນມີນາ 2025, ຄະນະບໍລິຫານງານສະຫະພັນແມ່ຍິງກະຊວງ ສສກ ປະກອບມີ 19 ສະຫາຍ, 41 ຮາກຖານ, 1 ສະຫະພັນແມ່ຍິງມະຫາວິທະຍາໄລແຫ່ງຊາດມີ 2 ສະຫາຍ ໄດ້ປະກອບເປັນຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ). ປັດຈຸບັນ, ສະຫະພັນແມ່ຍິງມີສະມາຊິກທັງໝົດ 6 ພັນກວ່າສະຫາຍ, ສະມາຊິກແມ່ຍິງທີ່ເປັນນັກສຶກສາ 4 ພັນກວ່າສະຫາຍ. ສະຫະພັັນແມ່ຍິງກະຊວງໄດ້ປະຕິບັດຕາມບົດບາດໜ້າທີ່ຂອງຕົນ ຕາມລະບຽບກົດໝາຍຂອງ (ສສຍລ) ແລະ ສາຍຕັ້ງຂຶ້ນກັບ ສສຍລ. ຄຽງຄູ່ກັນນັ້ນ, ຍັງໄດ້ຮັບການນຳພາ-ຊີ້ນຳຢ່າງໃກ້ຊິດຈາກອົງຄະນະພັກກະຊວງ ສສກ ຕະຫຼອດມາ.
ໃນພິທີ, ສະຫາຍ ນາງ ດາລາວອນ ກິດຕິພັນ ກ່າວວ່າ: ວັນແມ່ຍິງສາກົນ 8 ມີນາ ເປັນວັນປະຫວັດສາດໜຶ່ງທີ່ສໍາຄັນຂອງສາກົນ ກໍຄືແມ່ຍິງລາວທັງຊາດ ແມ່ນເຫດການ-ການເມືອງທີ່ສໍາຄັນ, ເປັນຂີດໝາຍແຫ່ງໄຊຊະ ນະພື້ນຖານຂອງຂະບວນການແມ່ຍິງສາກົນ ໃນການຕໍ່ສູ້ທວງເອົາສິດຜົນປະໂຫຍດອັນຊອບທໍາໃຫ້ແມ່ຍິງຊາວຜູ້ອອກແຮງງານໃນທົ່ວໂລກ, ເປັນວັນລະນຶກເຖິງການຕໍ່ສູ້ຂອງແມ່ຍິງເພື່ອປົດປ່ອຍຕົນເອງ ແລະ ທວງໃຫ້ມີສິດສະ ເໝີພາບ ປະຊາທິປະໄຕ ຄືກັນກັບເພດຊາຍ. ພ້ອມກັນນີ້, ຍັງເປັນການລະນຶກເຖິງບົດບາດທີ່ສຳຄັນຂອງແມ່ຍິງໃນທົ່ວໂລກ ກໍຄືແມ່ຍິງລາວ ຊຶ່ງຍາມໃດກໍໄດ້ເປັນກໍາລັງແຮງ ປະກອບສ່ວນເຂົ້າໃນການປົກປັກຮັກສາ ແລະ ພັດທະ ນາປະເທດຊາດ ໂດຍສະເພາະໃນຂະແໜງການສຶກສາ, ວິທະຍາສາດ ແລະ ກິລາ.
 |
ສະມາຊິກແມ່ຍິງຫຼາຍສະ ຫາຍໄດ້ເປັນກໍາລັງແຮງໃນການປູກຝັງແນວຄິດ-ຄ່ານິຍົມ, ການຮຽນຮູ້, ການສົ່ງເສີມຄວາມຄິດສ້າງສັນ, ການຖ່າຍທອດຄວາມຮູ້ໃຫ້ຊັບພະຍາກອນມະນຸດຂອງຊາດ; ສົ່ງເສີມ ແລະ ຮັກສາມູນເຊື້ອທາງດ້ານວັດທະນະທໍາ-ຮີດຄອງປະເພນີອັນດີງາມຂອງຊາດໃຫ້ຄົງຢູ່ຄູ່ຊາດລາວຕະຫຼອດມາ. ການສະເຫຼີມສະຫຼອງວັນແມ່ຍິງສາກົນ ຄົບຮອບ 116 ປີໃນຄັ້ງນີ້ໄດ້ຕິດພັນກັບຜົນງານການເຄື່ອນໄຫວຕົວຈິງ ຂອງສະຫະພັນແມ່ຍິງກະຊວງ ສສກ ໃນຜ່ານມາ. ຮຽກຮ້ອງມາຍັງບັນດາສະຫາຍ ທີ່ເປັນຄະນະບໍລິຫານງານຂັ້ນກະຊວງ, ຮາກຖານ ແລະ ສະມາຊິກສະຫະພັນແມ່ຍິງທັງໝົດ ໃຫ້ຖືເອົາວຽກງານສຶກສາອົບຮົມການເມືອງ-ແນວຄິດເປັນບັນຫາສໍາຄັນຕົ້ນຕໍ, ຍົກສູງຄວາມສາມັກຄີພາຍໃນຢ່າງແໜ້ນແຟ້ນ, ມີສະຕິເຄົາລົບລະບຽບກົດໝາຍທີ່ວາງອອກຢ່າງເຂັ້ມງວດ; ພ້ອມທັງເອົາໃຈໃສ່ ເຜີຍແຜ່ເຊື່ອມຊຶມບັນດາເອກະສານສໍາຄັນຂອງພັກ, ລັດ ແລະ ອົງການຈັດຕັ້ງມະຫາຊົນໃຫ້ສະມາຊິກຢ່າງເປັນເຈົ້າການ ແລະ ຕໍ່ເນື່ອງ; ດ້ານແບບແຜນການນໍາພາ ແລະ ວິທີການເຮັດວຽກ ໃຫ້ເຮັດວຽກ ແລະ ເຄື່ອນໄຫວວຽກງານບົນຫຼັກການລວມສູນປະຊາທິປະໄຕ, ເຮັດວຽກເປັນໝູ່ຄະນະ, ເປັນລະບົບ, ມີການວາງແຜນທີ່ຊັດເຈນ ແລະ ປະຕິບັດລະບອບປະຊຸມສ່ອງແສງ, ການຮ່ວມຊີວິດການເມືອງ, ການລາຍງານໃຫ້ເປັນປົກກະຕິ; ເອົາໃຈໃສ່ ຍົກລະດັບຄວາມຮູ້-ຄວາມສາມາດທາງດ້ານວິຊາສະເພາະ, ວຽກອົງການຈັດຕັ້ງ, ຍົກລະດັບດ້ານທິດສະດີການ ເມືອງ, ເຕັກໂນໂລຊີທີ່ທັນສະໄໝ ແລະ ພາສາຕ່າງປະເທດ ເພື່ອສ້າງພະນັກງານສືບທອດປ່ຽນແທນໃນແຕ່ລະຂັ້ນ ໃຫ້ບັນລຸຕາມແຜນທີ່ກໍານົດໄວ້; ເປັນເຈົ້າການປົກປັກຮັກສາ, ເສີມຂະຫຍາຍມູນເຊື້ອວັດທະນະທໍາ ແລະ ຮີດຄອງປະເພນີອັນດີງາມຂອງຊາດ ກໍຄືລະບຽບການຂອງແມ່ຍິງລາວ ເປັນຕົ້ນ ດ້ານກິລິຍາ, ມາລະຍາດ ແລະ ການແຕ່ງກາຍທີ່ສຸພາບຮຽບຮ້ອຍ ໃຫ້ຖືກຕາມລະບຽບລັດຖະກອນ ກໍຄືວັດທະນະທໍາຂອງລາວ.
ຂ່າວ: ການຈະນາ ວົງປັນຍາ
ຄໍາເຫັນ