ສສຂ ຈັດກອງປະຊຸມຫາລືກົນໄກປະສານງານ ການຮ່ວມມື

ສູນສະຖິຕິ ແລະ ຂ່າວສານສາທາລະນະສຸກ (ສສຂ), ກະຊວງສາທາລະນະສຸກ ຈັດກອງປະຊຸມປຶກສາຫະລືກົນໄກການປະສານງານ ແລະ ການຮ່ວມມື ລະຫວ່າງຂະແໜງການສາທາລະນະສຸກ ແລະ ຂະແໜງວັດທະນະທຳ ແລະ ທ່ອງທ່ຽວຂຶ້ນໃນວັນທີ 6-8 ທັນວານີ້ ທີ່ພັດທະຄານ ແລະ ສ່ວນອາຫານຊົມວິວ (ວັງວຽງ) ເມືອງວັງວຽງ ແຂວງວຽງຈັນ, ໂດຍການເປັນປະທານຂອງທ່ານ ວິສິດ ຄໍາລືຊາ ຫົວໜ້າສູນສະຖິຕິ ແລະ ຂ່າວສານສາທາລະນະສຸກກະຊວງສາທາລະນະສຸກ, ມີຮອງຫົວໜ້າສູນສະຖິຕິ, ວິຊາການສູນ ແລະ ບັນດາພະນັກງານຈາກຂະແໜງສາທາແຂວງ, ພະນັກງານ ຖວທແຂວງທົ່ວປະເທດ ແລະສື່ມວນຊົນເຂົ້າຮ່ວມ.
ທ່ານ ວິສິດ ຄໍາລືຊາ ໄດ້ກ່າວວ່າ: ຈຸດປະສົງຂອງກອງປະຊຸມເພື່ອປຶກສາຫາລືກົນໄກການປະສານງານໃນໄລຜ່ານມາ ກໍຄືໄລຍະທີ່ມີການລະບາດ ຂອງພະຍາດໂຄວິດ-19, ຈຸດດີ, ຈຸດອ່ອນ, ຂໍ້ຄົງຄ້າງຂອງການຈັດຕັ້ງປະຕິບັດ ແລະ ກອບຂອງການຮ່ວມມືກັນໃນຕໍ່ໜ້າ ໂດຍສະເພາະສຸມໃສ່ການລະບາດຂອງພະຍາດທີ່ອາດຈະເກີດຂຶ້ນໃນອະນາຄົດ.
ໃນກອງປະຊຸມຍັງໄດ້ນໍາສະເໜີການຈັດຕັ້ງປະຕິບັດວຽກງານການສື່ສານຄວາມສ່ຽງໃນໄລຍະການລະບາດພະຍາດໂຄວິດ-19 ຂອງສູນສະຖິຕິ ແລະ ຂ່າວສານສາທາລະນະສຸກ,ໂດຍສະເພາະການສື່ສານ, ອົງປະກອບຄວາມສ່ຽງ, ພາລະບົດບາດຂອງສູນ, ການເຮັດວຽກຮ່ວມກັບສື່ມວນຊົນ, ຂໍ້ສະດວກ,ຂໍ້ຍຸ້ງຍາກ ແລະ ບົດຮຽນທີ່ຖອນຖອນໄດ້, ການຈັດຕັ້ງປະຕິບັດວຽກງານ ແລະ ຮັບຟັງຄຳຄິດເຫັນຂອງສັງຄົມ ໃນໄລຍະຜ່ານມາ.
ການເຊື່ອມສານວຽກງານສື່ມວນຊົນກັບການຄວບຄຸມ, ປ້ອງກັນພະຍາດໂຄວິດ-19,ການເຮັດວຽກຮ່ວມກັນລະຫວ່າງຂະແໜງ ສາທາລະນະສຸກ ແລະ ຂະແໜງຖະແຫຼງຂ່າວ,ວັດທະນະທຳ ແຕ່ສູນກາງຮອດທ້ອງຖິ່ນ), ການມີສ່ວນຮ່ວມ ແລະ ເປັນເຈົ້າການໃນວຽກງານໂຄສະນາ ແລະ ຄວບຄຸມການລະບາດຂອງ ພະຍາດໂຄວິດ-19ຜ່ານທາງໂທລະພາບແຫ່ງຊາດລາວ, ວິທະຍຸກະຈາຍສຽງແຫ່ງຊາດລາວ  ສື່ສິ່ງພິມ ແລະ ອື່ນໆ.
ການຈັດຕັ້ງປະຕິບັດການສື່ສານເພື່ອຫຼຸດຜ່ອນຄວາມສ່ຽງ ແລະ ການເຮັດວຽກຮ່ວມກັນລະຫວ່າງຂະແໜງສາທາລະນະສຸກ ແລະ ຂະແໜງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ ຢູ່ໃນຂັ້ນແຂວງ, ເມືອງ ແລະ ບ້ານ  ຢູ່ແຂວງຫຼວງພະບາງ, ນະຄອນຫຼວງວຽງຈັນ ແລະ ແຂວງຈຳປາສັກ.
ຂ່າວ-ພາບ: ບຸນອູ້ມ