 |
ທ່ານນາງ ວຽງມາລີ ດາລາກອນ ຮອງຫົວໜ້າຫ້ອງການ ສສຍລ ໄດ້ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອກະກຽມຄວາມພ້ອມຮອບດ້ານໃຫ້ແກ່ການດໍາເນີນກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ IX ໂດຍສະເພາະຄວາມພ້ອມທາງດ້ານເນື້ອໃນ ແລະ ດ້ານບຸກຄະລາ ກອນ, ຈຸດປະສົງ ເພື່ອປະກອບຄໍາຄິດຄໍາເຫັນຕໍ່ຮ່າງບົດລາຍງານການເມືອງທັງສອງພາກ, ແຜນພັດທະນາແມ່ຍິງ ແລະ ກົດລະບຽບຂອງສະຫະພັນແມ່ຍິງສະໄໝທີ IX ແລະ ເອກະສານອື່ນໆ; ພ້ອມທັງລາຍງານຫຍໍ້ກ່ຽວກັບການປັບປຸງຮ່າງບົດລາຍງານການເມືອງທັງສອງພາກທີ່ໄດ້ມີການປັບປຸງຕາມຄໍາເຫັນທີ່ໄດ້ປະກອບໃນກອງປະຊຸມທາບທາມຮອບໜຶ່ງຜ່ານມາ ເພື່ອເປັນຂໍ້ມູນໃຫ້ບັນດາຜູ້ເຂົ້າຮ່ວມໄດ້ສືບຕໍ່ຄົ້ນຄວ້າພິຈາລະນາ ເພື່ອເຮັດໃຫ້ບົດລາຍງານດັ່ງກ່າວມີເນື້ອໃນສົມບູນ.
ກອງປະຊຸມດັ່ງກ່າວມີສາມວາລະໃຫຍ່ຄື: ໜຶ່ງ. ບັ້ນດໍາເນີນຊີວິດການເມືອງທ້າຍສະໄໝທີ VIII ຂອງຄະນະບໍລິຫານງານ ສສຍລ ຊຶ່ງຈະມີແຕ່ສະເພາະຄະນະບໍລິຫານງານ ສສຍລ; ສອງ. ເພື່ອປັບປຸງບັນດາເນື້ອໃນທີ່ຈະຜ່ານຕໍ່ກອງປະຊຸມໃຫຍ່ຂອງ ສສຍລ ໃຫ້ມີຄວາມສົມບູນ ແລະ ສາມ. ພິທີສະຫຼຸບການຈັດຕັ້ງປະຕິບັດຄໍາຂວັນຂໍ້ແຂ່ງຂັນສາມດີ ແລະ ມອບທຸງໄຊສາມດີ ໃບຢັ້ງຢືນຮັກສານາມມະຍົດໃຫ້ແກ່ສະຫະພັນແມ່ຍິງສໍາລັບພາກສ່ວນທີ່ໄດ້ຮັບການປະເມີນ.
ຂ່າວ: ຍຸພິນທອງ
ຄໍາເຫັນ