ທີ່ ຫໍສະພາແຫ່ງຊາດ ພາຍໃຕ້ການເປັນປະທານຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ.ຈາກນັ້ນ, ບັນດາ ສສຊ ກໍໄດ້ສຸມໃສ່ປະກອບຄໍາເຫັນຕໍ່ຮ່າງກົດໝາຍດັ່ງກ່າວໃນບາງມາດຕາ ເພື່ອໃຫ້ໃຊ້ຄໍາສັບມີຄວາມກົມກຽວກັນ, ຮັດກຸມແລະ ສອດຄ່ອງ.
ທ່ານ ປະເດີມພອນ ສົນທະນີ ສສຊ ເຂດເລືອກຕັ້ງທີ 14 ແຂວງສາລະວັນ ມີຄໍາເຫັນວ່າ:ຕໍ່ມາດຕາ 3 ກ່ຽວກັບຫຼັກການຈັດຕັ້ງ ແລະ ການເຄື່ອນໄຫວ ໂດຍມີ 3 ຫຼັກການ ຊຶ່ງການຂຽນຢາກໃຫ້ຕື່ມຄໍາສັບ ໃນຫຼັກການທີ 1 ເວົ້າຮອດແຕ່ຂັ້ນແຂວງບໍ່ຮອດນະຄອນ ຄວນຕື່ມຄໍາວ່າ: ມີການແບ່ງຂັ້ນຄຸ້ມຄອງຕາແສງຂຶ້ນກັບເມືອງ, ຂັ້ນເມືອງຂຶ້ນກັບແຂວງ, ນະຄອນເນື່ອງຈາກນະຄອນກັບແຂວງຂຶ້ນກັບລັດຖະບານ. ສໍາລັບຂໍ້ 2 ໃນຫຼັກການ “ເສີມຂະຫຍາຍສິດເປັນເຈົ້າຂອງປະຊາຊົນ ເພີ່ມຄວາມຮັບຜິດຊອບຂອງອົງການປົກຄອງທ້ອງຖິ່ນຢາກໃຫ້ປ່ຽນຄໍາວ່າ: ເພີ່ມຄວາມຮັບຜິດຊອບຂອງອົງການປົກຄອງທ້ອງຖິ່ນ ເປັນຍົກສູງຂອງອົງການປົກຄ້ອງທ້ອງຖິ່ນ ຈະສອດຄ່ອງກວ່າ,ເຮົາບໍ່ໄດ້ວັດກັນດ້ວຍປະລິມານ ເຮົາເວົ້າເລື່ອງຄຸນນະພາບ. ສໍາລັບຂໍ້ 3 “ຮັບຜິດຊອບບົນພື້ນຖານລັດຖະທໍາມະນູນ ແລະ ກົດໝາຍ” ຢາກປ່ຽນມາເປັນເຄື່ອນໄຫວບົນພື້ນຖານລັດຖະທໍາມະນູນ ແລະ ກົດໝາຍ.
ຕໍ່ມາດຕາ 4ທີ່ຕັ້ງ“ອົງການປົກຄອງທ້ອງຖິ່ນ ແມ່ນອົງການບໍລິຫານຂັ້ນທ້ອງຖິ່ນ” ເຫັນວ່າມີຄໍາສັບອົງການຊໍ້າກັນ. “ອົງການປົກຄອງທ້ອງຖິ່ນ ແມ່ນອົງກອນ ຫຼືການຈັດຕັ້ງການບໍລິຫານຂັ້ນທ້ອງຖິ່ນຈະມີຄວາມສອດຄ່ອງກວ່າ. ສໍາລັບມາດຕາ 6 ສິດ ແລະ ໜ້າທີ່ ຂອງອົງການປົກຄອງທ້ອງຖິ່ນ ເຫັນວ່າວຽກໜຶ່ງຂາດໄປ ວຽກຈັດຕັ້ງຜັນຂະຫຍາຍນະໂຍບາຍຂອງພັກ, ຂອງລັດກໍມີຄວາມຈໍາເປັນຢາກໃຫ້ໄປໃສ່ຂໍ້ 1. ຕໍ່ມາດຕາ 40 ເຮົາໃຊ້ຄໍາວ່າ: ສິດຂອງປະທານຄະນະກໍາມະການປົກຄອງເມືອງ ແລະ ມາດຕາ 48 ສິດ ແລະ ໜ້າທີ່ຂອງຄະນະກໍາມະການປົກຄອງນະຄອນ ເຫັນວ່າມີຄວາມແຕກຕ່າງວິທີການຂຽນຂອງປະໂຫຍກ ຖ້າປະທານກໍໃຫ້ໃສ່ປະທານ ຫຼືຄະນະກໍາມະການກໍຢາກໃສ່ໃຫ້ຄະນະກໍາມະການນໍາກັນ.ໃນນັ້ນ, ສິດ ແລະ ໜ້າທີ່ຂອງເມືອງກໍຍັງມີແຕ່ 13 ຂໍ້ເຫັນວ່າຍັງມີໜ້ອຍກວ່າສິດ ແລະ ໜ້າທີ່ຂອງນະຄອນມີ 27 ຂໍ້. ສະນັ້ນ, ໃຫ້ຮຽບຮຽງຄືນໃໝ່ ເພື່ອໃຫ້ສອດຄ່ອງ ແລະ ກົມກຽວກັນ.
ທ່ານນາງ ພອນເພັດ ອຸ່ນແກ້ວ ສສຊ ເຂດເລືອກຕັ້ງທີ 14 ແຂວງສາລະວັນ ຍັງມີຄໍາເຫັນວ່າ: ໂດຍລວມເຫັນວ່າເນື້ອໃນປັບປຸງກົດໝາຍດັ່ງກ່າວແມ່ນມີຄວາມຮັດກຸມ, ຈະແຈ້ງເປັນສ່ວນຫຼາຍ, ຕໍ່ມາດຕາ 11, ສິດ ແລະ ໜ້າທີ່ຂອງຄະນະກໍາມະການປົກຄອງນະຄອນຫຼວງ, ແຂວງ. ໃນຂໍ້1: ສະເໜີໃຫ້ສັບຊ້ອນເນື້ອໃນຄືນ ເພື່ອໃຫ້ສອດຄ່ອງກັບກົດໝາຍວ່າດ້ວຍການສ້າງນິຕິກໍາ. ໃນນັ້ນ, ຂໍ້ 8 ທີ່ກໍານົດເນື້ອໃນວ່າ: ແບ່ງໜ້າທີ່ຮັບຜິດຊອບ, ສິດຕັດສິນບັນຫາ ແລະ ຜົນປະໂຫຍດແກ່ເມືອງ-ນະຄອນ ເນື່ອງຈາກການຂຽນເນື້ອໃນດັ່ງກ່າວໃນກົດໝາຍຍັງບໍ່ເໝາະສົມ. ສະນັ້ນ, ສະເໜີແລກປ່ຽນໃຫ້ແບ່ງໜ້າທີ່, ຂອບເຂດສິດ, ຄວາມຮັບຜິດຊອບ ແລະ ງົບປະມານຕາມແຜນງົບປະມານ ທີ່ກອງປະຊຸມສະພາຂັ້ນແຂວງພິຈາລະນາຮັບຮອງເອົາ.
ໂອກາດນີ້, ບັນດາ ສສຊ ຈາກເຂດເລືອກຕັ້ງຕ່າງໆ ກໍໄດ້ສຸມໃສ່ປະກອບຄໍາເຫັນໃນການໃຊ້ຄໍາສັບໃສ່ບາງມາດຕາຕື່ມອີກ ເພື່ອໃຫ້ກົດໝາຍສະບັບນີ້ ມີເນື້ອໃນຮັດກຸມ, ກົມກຽວ ແລະ ສອດຄ່ອງຂຶ້ນຕື່ມ.
(ຂ່າວ: ວັນເພັງ, ພາບ: ຕຸໄລເພັດ)
ຄໍາເຫັນ