ພາຍໃຕ້ການເປັນປະທານຂອງທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ; ສະມາຊິກສະພາແຫ່ງຊາດ (ສສຊ) ຕາງກໍໄດ້ສຸມໃສ່ປະກອບຄໍາເຫັນຕໍ່ຮ່າງກົດໝາຍສະບັບດັ່ງກ່າວ,ໂດຍສ່ວນຫຼາຍແລ້ວ ສສຊ ກໍໄດ້ມີຄໍາເຫັນຕໍ່ກັບມາດຕາທີ່ມີການລະບຸການກຳນົດອາຍຸ ເຂົ້າເປັນລັດຖະກອນໃໝ່ ແລະ ອາຍຸກະສຽນຮັບອຸດໜູນບໍານານ ລວມເຖິງມາດຕາອື່ນໆທີ່ກ່ຽວຂ້ອງ.
ທ່ານ ລໍາໄມ ກຸດລາວົງ ສສຊ ເຂດເລືອກຕັ້ງທີ 10ແຂວງວຽງຈັນ ມີຄໍາເຫັນຕໍ່ມາດຕາ 18 ທີ່ໄດ້ກໍານົດເງື່ອນໄຂເຂົ້າເປັນລັດຖະກອນໃໝ່ ມີ 7 ຂໍ້, ໃນຂໍ້ 2 ກໍານົດອາຍຸໃນການເຂົ້າລັດຖະກອນໃໝ່ແຕ່ 18-35 ປີ ໃນກໍລະນີຈໍາເປັນກໍອາດຮັບເອົາຜູ້ທີ່ອາຍຸເກີນຕາມທີ່ໄດ້ກໍານົດໄວ້ ຊຶ່ງໄດ້ກ່າວວ່າ: ພື້ນຖານເຫັນດີ, ແຕ່ຖ້າວ່າກໍານົດຄືແນວນີ້ໃນການຈັດຕັ້ງປະຕິບັດຕົວຈິງຢ້ານບໍ່ເປັນເອກະພາບກັນອາດຈະເກີດມີຊ່ອງວ່າງໄປໃນທາງທີ່ບໍ່ດີ, ພາໃຫ້ເກີດຫາງສຽງຕໍ່ວ່າໃນສັງຄົມ ກໍຄືຢູ່ໃນຂັ້ນທ້ອງຖິ່ນ;ດັ່ງນັ້ນ, ຖ້າຈໍາເປັນແທ້ໆກໍຢາກໃຫ້ກໍານົດຢູ່ໃນກົດໝາຍສະບັບນີ້ເລີຍໄດ້ບໍ ວ່າຈໍາເປັນດ້ານໃດ ແລະ ຂົງເຂດໃດ. ຕໍ່ມາດຕາ 29 ໄດ້ກໍານົດມີ 11 ຂໍ້ ກ່ຽວກັບການລາພັກລັດຖະການ, ໃນຂໍ້ 2 ແລະ ຂໍ້ 4 ກ່ຽວກັບການລາພັກ ແລະ ອອກລູກ ກໍານົດຢູ່ໃນກົດໝາຍໃຫ້ພັກ3 ເດືອນເຄິ່ງ, ໃນຂໍ້ 4 ຜ່າຕັດໃຫ້ພັກ 4 ເດືອນ;ຖ້າກໍານົດຄືແນວນີ້, ໃນຄວາມເປັນຈິງຢູ່ປະເທດເຮົາຂ້າພະເຈົ້າຄິດວ່າຍັງບໍ່ເໝາະສົມ ໂດຍສະເພາະຢູ່ຊົນນະບົດ ເນື່ອງຈາກວ່າເວລາຖືພາການດູແລສຸຂະພາບ, ອາຫານການກິນ ເຫັນວ່າຍັງບໍ່ທັນໄດ້ຕາມມາດຕະຖານ, ຍ້ອນເງື່ອນໄຂຫຼາຍອັນຢູ່່ໃນຊົນນະບົດ; ອີກບັນໜຶ່ງ, ກໍລະນີເກີດລູກ, ຖ້າວ່າມີແຕ່ຜົວ-ເມຍແລະ ລູກນ້ອຍບໍ່ມີຜູ້ຊ່ວຍຈະເຮັດໃຫ້ມີຄວາມຫຍຸ້ງຍາກໃນການທຽວການ; ຕໍ່ມາດຕານີ້, ຢັ້ງຢືນວ່າ: ຖ້າວ່າເກີດເອງ (ເກີດທໍາມະຊາດ)ຢາກໃຫ້ພັກ5 ເດືອນຄືເກົ່າ ແລະ ຜ່າຕັດສະເໜີໃຫ້ກໍານົດໃສ່ 6 ເດືອນ. ຕໍ່ມາດຕາ 71 ການຮັບອູດໜູນບໍານານ ໃນຂໍ້ 1ກໍານົດຄ້າຍຄືມາດຕາ 18 ຂະແໜງທີ່ຈໍາເປັນອາດຈະຕໍ່ອາຍຸກະສຽນ ແຕ່ບໍ່ໃຫ້ເກີນ 65 ປີ, ຂ້າພະເຈົ້າຄິດວ່າຢ້ານເປັນຊ່ອງວ່າງ; ສະນັ້ນ, ເພື່ອເປັນເອກະພາບກັນນັ້ນໃຫ້ກໍານົດຢູ່ກົດໝາຍບັບນີ້ໄດ້ບໍ ເພື່ອໃຫ້ງ່າຍໃນການຈັດຕັ້ງປະຕິບັດ.
ທ່ານນາງ ສວຍເພັດ ທອງສົມບັດ ສສຊ ເຂດເລືອກຕັ້ງທີ 8 ແຂວງຫົວພັນ ມີຄໍາເຫັນວ່າ: ໂດຍລວມ, ຮ່າງກົດໝາຍສະບັບນີ້ເຫັນວ່າມີຄວາມລະອຽດພໍສົມຄວນ ແຕ່ມີຄຳເຫັນບາງຈຸດໂດຍສະເພາະຕໍ່ມາດຕາ 18ກໍານົດເງື່ອນໄຂລັດຖະກອນໃໝ່ ຂໍ້ 2 ເຫັນດີກໍານົດລັດຖະກອນໃໝ່ອາຍຸ 18-35 ປີ ສ່ວນປະໂຫຍກທີ່ວ່າກໍລະນີຈໍາເປັນອາດຈະເອົາຜູ້ທີ່ມີອາຍຸເກີນ 35 ປີ ແຕ່ບໍ່ເກີນ 40 ປີ ຂ້າພະເຈົ້າບໍ່ເຫັນດີ ເພາະວ່າຈະເປັນຊ່ອງວ່າງໃນການຈັດຕັ້ງປະຕິບັດ, ຢາກໃຫ້ກໍານົດຢ່າງເດັດຂາດ; ຖ້າຫາກເອົາຜູ້ທີ່ມີອາຍຸ 40 ປີ ແຕ່ວ່າອາຍຸການເຮັດວຽກ 25 ປີຂຶ້ນໄປຮັບບໍານານ ແລະ ອາຍຸກະສຽນກໍຕ້ອງ 65 ປີ ເຫັນວ່າຍັງບໍ່ສອດຄ່ອງກັບມາດຕາ 71.ຕໍ່ກັບຜູ້ທີ່ຍົກຍ້າຍມາຈາກລັດວິສາຫະກິດແລະ ອົງການຈັດຕັ້ງສາກົນທີ່ມາບັນຈຸເປັນລັດຖະກອນໃໝ່ຕາມທີ່ໄດ້ກໍານົດໃນມາດຕາ 19 ຈະມີເງື່ອນໄຂອາຍຸຄືແນວໃດ ຊຶ່ງບໍ່ໄດ້ກໍານົດລະອຽດ ແລະ ການນັບອາຍຸການເຮັດວຽກຈະເລີ່ມແຕ່ເວລາໃດຢາກໃຫ້ກໍານົດລະອຽດຕື່ມ ເພາະຈະມີຜົນຕໍ່ການອອກຮັບອູດໜູນບໍານານທີ່ໄດ້ກໍານົດໃນມາດຕາ 71. ຕໍ່ມາດຕາ 21 ການຍົກຍ້າຍສັບປ່ຽນໜ້າທີ່ ແລະ ບ່ອນປະຈໍາການ, ເນື້ອໃນມາດຕານີ້ແມ່ນຖືກຕ້ອງເໝາະສົມກັບການຍົກຍ້າຍສັບປ່ຽນໜ້າທີ່ ຕາມການສັບຊ້ອນຈັດວາງຈາກການຈັດຕັ້ງ ແຕ່ຍັງບໍ່ກວມເອົາການຍົກຍ້າຍຕາມການຮ້ອງຂໍ. ສະນັ້ນ, ສະເໜີໃຫ້ເພີ່ມວັກໜຶ່ງເຂົ້າຕື່ມໄດ້ບໍວ່າການຍົກຍ້າຍຕາມການຮ້ອງຂໍນີ້ຈະມີເງື່ອນໄຂຄືແນວໃດ, ກໍານົດອາຍຸການຈັກປີຈຶ່ງຍົກຍ້າຍໄດ້ ຫຼືຈະເຮັດເປັນມາດຕາຕ່າງຫາກໄດ້ບໍ ເນື່ອງຈາກໃນຕົວຈິງຜູ້ຂໍຍົກຍ້າຍມີຫຼາຍໂດຍສະເພາະຈາກເມືອງຫາແຂວງ. ຕໍ່ມາດຕາ 29 ການລາພັກທາງລັດຖະການໃນຂໍ້ 2 ພັກອອກລູກ 3 ເດືອນເຄິ່ງແມ່ນເຫັນດີໃຫ້ເພີ່ມຈາກ 3 ເດືອນເຄິ່ງເປັນ 4 ເດືອນຈຶ່ງຈະເໝາະສົມ; ໃນຂໍ້ 3 ການລາພັກລຸລູກ ຊຶ່ງຖືພາໄດ້ 2-3 ເດືອນໃຫ້ພັກ 1 ເດືອນພື້ນຖານເຫັນດີ ແຕ່ຂໍໃຫ້ພິຈາລະນາຄືນກໍລະນີຖືພາບໍ່ຮອດ 2 ເດືອນຖືພາໄດ້ 6 ຫຼື 7 ອາທິດ ຖ້າລຸລູກຈະບໍ່ໃຫ້ພັກເຫັນວ່າບໍ່ທັນເໝາະສົມ; ດັ່ງນັ້ນ,ສະເໜີປັບປຸງຄືນຄື: ຮູ້ວ່າໄດ້ຖືພາຕາມການຢັ້ງຢືນຂອງແພດ ກໍລະນີລຸລູກຕອນຖືພາບໍ່ຮອດ2 ເດືອນແມ່ນໃຫ້ພັກ 15 ວັນ, ຖືພາເກີນ 2-3 ເດືອນໃຫ້ພັກ 1 ເດືອນ, ຖືພາເກີນກວ່າ 3-6 ເດືອນໃຫ້ພັກ 2 ເດືອນ, ຖືພາເກີນ 6 ເດືອນຂຶ້ນໄປໃຫ້ພັກ 3 ເດືອນເຄິ່ງ;ສໍາລັບຂໍ້ 4 ການອອກລູກດ້ວຍການຜ່າຕັດ ໃຫ້ເພີ່ມເປັນ 4 ເດືອນເຄິ່ງ”; ຂໍ້ 8 ການລາພັກແຕ່ງດອງບໍ່ເກີນ 5 ວັນ” ໃຫ້ຕື່ມຄໍາວ່າໂດຍບໍ່ນັບວັນພັກລັດຖະການ ໃຫ້ກໍານົດຄືກັບຂໍ້ 1 ແລະ ຂໍ້9, ຂໍ້ 10 ເຊັ່ນດຽວກັນ. ຕໍ່ມາດຕາ 30 ການໄປຈໍາການຢູ່ບ່ອນອື່ນຊົ່ວຄາວ ແລ້ວເງິນເດືອນ, ເງິນອູດໜູນຂອງຜູ້ກ່ຽວຈະປະຕິບັດແນວໃດ, ຈະເອົາເບື້ອງໃດ ແລະ ອີງໃສ່ກົດໝາຍ ຫຼືນິຕິກໍາໃດຢາກໃຫ້ລະບຸລະອຽດຕື່ມໃນກົດໝາຍສະບັບນີ້ຈຶ່ງຈະປະຕິບັດໄດ້ງ່າຍ.
(ຂ່າວ: ວັນເພັງ, ພາບ: ຕຸໄລເພັດ)
ຄໍາເຫັນ