ທີ່ຢູ່ເສົາໄຟຟ້າລົງໃຕ້ດິນ ຊຶ່ງນີ້ກໍເປັນບາດກ້າວທີ່ສໍາຄັນ ເພື່ອສຶກສາຄວາມເປັນໄປໄດ້ໃນການຈັດສັນຄວາມເປັນລະບຽບຂອງບັນດາສາຍໂທລະຄົມທີ່ເກາະຫ້ອຍຕາມເສົາໄຟຟ້າໃນຂອບເຂດທົ່ວປະເທດ.
ພິທີເຊັນບົດບັນທຶກຄວາມເຂົ້າໃຈດັ່ງກ່າວ ໄດ້ຈັດຂຶ້ນໃນວັນທີ 5 ພຶດສະພາ ນີ້ຢູ່ສໍານັກງານໃຫຍ່ ຟຟລ ໂດຍການລົງນາມລະຫວ່າງ ທ່ານ ຟອງປະສິດ ເພັດສີສຸກ ຮອງຜູ້ອໍານວຍການໃຫຍ່ ຟຟລ ແລະ ທ່ານ ສຸກສາຄອນ ສິມມາລາວົງ ຜູ້ອໍານວຍການ ບໍລິສັດ ສີສັນ ຮ່ວມມືພັດທະນາສາກົນ ຈໍາກັດຜູ້ດຽວ; ເຂົ້າຮ່ວມເປັນສັກຂີພິຍານ ຂອງ ທ່ານ ອາຄົມເດດ ວົງໄຊ ຜູ້ອໍານວຍການໃຫຍ່ ຟຟລ, ທ່ານ ພວງປະເສີດ ແກ້ວສຸວັນ ຫົວໜ້າຫ້ອງການກະຊວງເຕັກໂນໂລຊີ ແລະ ການສື່ສານ, ທ່ານ ສຸດໃຈ ລໍລອນສີ ຫົວໜ້າອົງການດັດສົມໂທລະຄົມມະນາຄົມ ກະຊວງເຕັກໂນໂລຊີ ແລະ ການສື່ສານ, ທ່ານ ວິລະສັກ ວົງໄຊ ປະທານ ບໍລິສັດ ເເອວໄອທີ ໂຊລູຊັນ ຈໍາກັດ ພ້ອມດ້ວຍຄະນະຜູ້ອໍານວຍການ, ຄະນະບໍລິຫານຂອງສອງຝ່າຍ ແລະ ແຂກຖືກເຊີນເຂົ້າຮ່ວມ.
ພິທີລົງນາມການຮ່ວມມືໃນຄັ້ງນີ້ຖືເປັນບາດກ້າວທີ່ສໍາຄັນ ເພື່ອສຶກສາຄວາມເປັນໄປໄດ້ໃນການຈັດສັນຄວາມເປັນລະບຽບຂອງບັນດາສາຍໂທລະຄົມທີ່ເກາະຫ້ອຍຕາມເສົາໄຟຟ້າໃນຂອບເຂດທົ່ວປະເທດ ຊຶ່ງໃນປັດຈຸບັນ ບໍລິສັດ ສີສັນ ຮ່ວມມືພັດທະນາສາກົນ ຈໍາກັດຜູ້ດຽວແມ່ນມີບົດບັນທຶກຄວາມເຂົ້າໃຈກັບ ກະຊວງເຕັກໂນໂລຊີ ແລະ ການສື່ສານ ໃນການດໍາເນີນການຈັດສັນຄວາມເປັນລະບຽບຮຽບຮ້ອຍຂອງສາຍສື່ສານໂທລະຄົມລົງໃຕ້ດິນ ທີ່ເປັນສາຍເກາະຫ້ອຍຢູ່ເສົາໄຟຟ້າຂອງ ຟຟລ; ພາຍຫຼັງການລົງນາມສໍາເລັດ, ຟຟລ ແລະ ບໍລິສັດ ດັ່ງກ່າວນີ້ ຈະໄດ້ພ້ອມກັນຄົ້ນຄວ້າ ສຶກສາທາງດ້ານເຕັກນິກຮ່ວມກັນເພື່ອນໍາເອົາສາຍໂທລະຄົມ ແລະ ສາຍໄຟຟ້າແຮງດັນຕໍ່າ 0.4 ກິໂລໂວນ ທີ່ເກາະຫ້ອຍຢູ່ເສົາໄຟຟ້າລົງໃຕ້ດິນ ຊຶ່ງໂຄງການຈະໄດ້ແບ່ງວຽກອອກເປັນ 3 ໄລຍະ ຄື: ໄລຍະທີ 1 ມີຂອບເຂດຈັດຕັ້ງປະຕິບັດເລີ່ມຈາກ 3 ແຍກສີໄຄ - ຫໍຄໍາ - ປະຕູໄຊ - ຫໍປະຊຸມແຫ່ງຊາດຫຼັກ 6 ລວມໄລຍະທາງ 12 ກິໂລແມັດ;ໄລຍະທີ 2: ແມ່ນເນັ້ນໃສ່ 4 ເມືອງຫຼັກໃນນະຄອນຫຼວງວຽງຈັນ ເຊັ່ນ: ເມືອງສີໂຄດຕະບອງ, ເມືອງຈັນທະບູລີ, ເມືອງໄຊເສດຖາ, ເມືອງສີສັດຕະນາກ ຊຶ່ງທາງໂຄງການຈະເຮັດເປັນ 2 ແບບ ຄື: ເອົາບັນດາສາຍສົ່ງໂທລະຄົມລົງໃຕ້ດິນ ແລະ ຕິດຕັ້ງຄອນສາຍໃໝ່;ສໍາລັບໄລຍະທີ 3: ແມ່ນໄດ້ເນັ້ນໃສ່ຕົວເມືອງຫຼັກຂອງແຕ່ລະແຂວງ ແລະ ການເຊື່ອມຕໍ່ ບັນດາແຂວງ ຫາ ແຂວງ ເປັນຫຼັກ.
ພາຍຫຼັງໂຄງການສໍາເລັດແມ່ນຈະຊ່ວຍຫຼຸດຜ່ອນຄວາມສ່ຽງຈາກເສົາໄຟຟ້າຫັກ-ເສົາລົ້ມ, ສາຍໄຟຂາດ ແລະ ບັນຫາໄຟດັບ ໄຟມອດ ຂອງ ຟຟລ. ນອກຈາກນັ້ນ, ຈະສ້າງຄວາມເປັນລະບຽບຂອງສາຍສື່ສານເຮັດໃຫ້ຕົວເມືອງມີຄວາມສວຍງາມ ທັງສົ່ງເສີມພັດທະນາຕົວເມືອງໃຫ້ເປັນເມືອງໜ້າຢູ່ມີຄວາມປອດໄພສູງ ທັງເປັນການປະກອບສ່ວນສ້າງສາ ແລະ ພັດທະນາປະເທດຊາດແບບຍືນຍົງ.
(ຂ່າວ: ສຸກສະຫວັນ, ຂໍ້ມູນ-ພາບ: EDL LAOS)
ຄໍາເຫັນ