ສະຫາຍ ພົຕ ສຸລິນະ ແກ້ວປະເສີດ ຮອງເລຂາຄະນະພັກ, ຮອງລັດຖະມົນຕີກະຊວງປ້ອງກັນຄວາມສະຫງົບ, ຫົວໜ້າກົມໃຫຍ່ການເມືອງ ປກສ ກ່າວຄຳເຫັນຕໍ່ກອງປະຊຸມວຽກງານສື່ມວນຊົນທົ່ວປະ ເທດ ຄັ້ງທີ I ໃນຫົວຂໍ້: ສື່ມວນຊົນ ປກສ ກັບການຕອບໂຕ້ຂ່າວບິດເບືອນໃຫ້ມີຄວາມວ່ອງໄວ ແລະ ທັນສະພາບການ ໃນວັນທີ 14 ກໍລະກົດນີ້, ທີ່ຫໍປະຊຸມແຫ່ງຊາດ ວ່າ: ຕະຫຼອດໄລຍະແຫ່ງການນໍາພາໃນພາ ລະກິດປະຕິວັດຂອງພັກເຮົາ ເວົ້າລວມ, ໃນພາລະກິດແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ເວົ້າສະເພາະ ພັກເຮົາໄດ້ຖືເອົາວຽກງານໂຄສະນາ, ສຶກສາອົບຮົມ, ປຸກລະດົມຂົນຂວາຍ ຖືວ່າ: ເປັນຍຸດທະສາດ ແລະ ເປັນວິທີການອັນດັບໜຶ່ງ. ຊຶ່ງໃນນັ້ນ, ສື່ມວນຊົນ ກໍໄດ້ມີສ່ວນຮ່ວມ ແລະ ມີບົດບາດສໍາຄັນທັງເປັນພາຫະນະ, ເປັນອາວຸດອັນແຫຼມຄົມໃນການຕໍ່ສູ້ບົນສະໜາມຮົບການເມືອງ-ແນວຄິດ ພາຍໃຕ້ການນໍາພາຂອງພັກ ແລະ ການຄຸ້ມຄອງຂອງລັດ. ສື່ມວນຊົນໄດ້ປະກອບສ່ວນຢ່າງຕັ້ງໜ້າ ແລະ ສົມກຽດໃນພາລະກິດປະຕິວັດ ກໍຄືຂະບວນການຕໍ່ສູ້ຂອງພັກ, ຂອງຊາດ ແລະ ຂອງປະຊາຊົນ ເປັນສ່ວນປະກອບທີ່ສໍາຄັນໃນໄຊຊະນະລວມຂອງປະເທດຊາດ.
ສໍາລັບສື່ມວນຊົນ ປກສ ກໍແມ່ນພາກສ່ວນໜຶ່ງທີ່ສໍາຄັນ ໃນການເປັນພາຫະນະອັນແຫຼມຄົມທາງດ້ານການເມືອງ-ແນວຄິດຂອງພັກ-ລັດ ກໍຄືຂອງກະຊວງ ປກສ ໃນການເຮັດໜ້າທີ່ໂຄສະນາ, ເຜີຍແຜ່, ສະກັດກັ້ນ ແລະ ຕອບໂຕ້ຂໍ້ມູນຂ່າວສານທີ່ບິດເບືອນຄວາມຈິງ ເພື່ອປົກປັກຮັກສາຄວາມສະຫງົບ ເປັນລະບຽບຮຽບຮ້ອຍ ແລະ ຄວາມໝັ້ນຄົງຂອງຊາດ, ສື່ມວນຊົນ ປກສ ລວມມີ: ສື່ໜັງສືພິມ, ວາລະສານ, ວິທະຍຸ, ໂທລະພາບ ແລະ ສື່ດີຈີຕອນ (ອອນລາຍ), ໄດ້ເປັນກະບອກສຽງທີ່ຈົງຮັກພັກດີໃນການໂຄສະນາເຜີຍແຜ່ແນວທາງ, ນະໂຍບາຍຂອງພັກ, ລະບຽບກົດໝາຍຂອງລັດ ແລະ ນິຕິກຳຕ່າງໆ ກ່ຽວກັບວຽກງານປ້ອງກັນຊາດ-ປ້ອງກັນຄວາມສະຫງົບ, ເປັນສູນລວມຂໍ້ມູນຂ່າວສານດ້ານຄວາມສະຫງົບ ເຮັດໜ້າທີ່ສ່ອງແສງລາຍງານຂ່າວສານ, ເຫດການ ແລະ ຜົນງານການເຄື່ອນໄຫວຂອງກຳລັງ ປກສ ແຕ່ສູນກາງລົງຮອດທ້ອງຖິ່ນ ໂດຍຜ່ານສື່ດັ້ງເດີມ ແລະ ສື່ແບບໃໝ່ (ສື່ອອນລາຍ) ໃຫ້ສັງຄົມຮັບຮູ້ຢ່າງຖືກຕ້ອງ ແລະ ທັນການ, ສື່ມວນຊົນ ປກສ ກັບການຕອບໂຕ້ຂ່າວບິດເບືອນໃຫ້ມີຄວາມວ່ອງໄວ ແລະ ທັນສະພາບການ. ຕະຫຼອດໄລຍະຜ່ານມາ, ສື່ມວນຊົນ ປກສ ໄດ້ເປັນເຈົ້າການຕິດຕາມ, ກວດກາຂໍ້ມູນ-ຂ່າວສານທາງອອນລາຍທີ່ບິດເບືອນຄວາມຈິງ. ພ້ອມທັງລາຍງານການຈັດຕັ້ງຂັ້ນເທິງ ເພື່ອຂໍທິດຊີ້ນໍາໃນການຕອບໂຕ້ຢ່າງເປັນລະບົບ ແລະ ຖືກຂັ້ນຕອນ. ສື່ມວນຊົນ ປກສ ໄດ້ເຄື່ອນໄຫວຕອບໂຕ້ຂ່າວບິດເບືອນຫຼາຍເຫດການທີ່ກຸ່ມຄົນບໍ່ຫັວງດີມີການໂຄສະນາໃສ່ຮ້າຍປ້າຍສີຕໍ່ພັກ-ລັດເຮົາ.
ໃນຕໍ່ໜ້າເພື່ອຮັບປະກັນໃຫ້ການຕອບໂຕ້ຂ່າວບິດເບືອນ ໂດຍສະເພາະຂ່າວທີ່ພົວພັນກັບຄວາມສະຫງົບ ແລະ ຂ່າວອື່ນໆ ໃຫ້ທັນສະພາບການ, ສື່ມວນຊົນ ປກສ ຈະໄດ້ສຸມໃສ່ການຫັນປ່ຽນຍຸດທະສາດ ໂດຍເນັ້ນໃສ່ຫັນເປັນດີຈີຕອນ ແລະ ນຳໃຊ້ເຕັກໂນໂລຊີ AI ໃນການກວດຈັບໃນຕໍ່ໜ້າ, ຈັດຕັ້ງ ແລະ ນໍາໃຊ້ລະບົບຊັອບແວທີ່ສາມາດກວດຈັບ, ວິເຄາະ ແລະ ແຈ້ງເຕືອນຂ່າວປອມ ຫຼື ຫາງສຽງລົບ ທີ່ພົວພັນກັບວຽກງານ ປກສ ໃນສື່ສັງຄົມອອນລາຍ ເປັນຕົ້ນທາງ Facebook, TikTok, YouTube ແລະ ສື່ອອນລາຍອື່ນໆ ແລະ ເພື່ອໃຫ້ທັນກັບຄວາມໄວຂອງໂລກໂຊຊ່ຽວ, ຈະເພີ່ມທະວີການເຊື່ອມໂຍງຂໍ້ມູນຢ່າງໃກ້ຊິດ ແລະ ໂດຍກົງ ລະຫວ່າງ ສື່ມວນຊົນ ປກສ ກັບພາກສ່ວນຕ່າງໆ ເພື່ອໃຫ້ໄດ້ຂໍ້ມູນຈິງທີ່ຖືກຕ້ອງ ແລະ ໄວທີ່ສຸດໃນການອອກມາຕອບໂຕ້, ເນັ້ນການຜະລິດຄລິບສັ້ນ, ສຸມໃສ່ການຜະລິດສື່ທີ່ໄວ ແລະ ສັງຄົມມັກເບິ່ງໃນປັດຈຸບັນ ເຊັ່ນ: TikTok, Shorts, Reels ແລະ ການຖ່າຍທອດສົດຖະແຫຼງຂ່າວ ເພື່ອຫັກລ້າງຂ່າວປອມຢ່າງທັນການ ດ້ວຍຫຼັກຖານທີ່ໜ້າເຊື່ອຖື. (ຂ່າວ-ພາບ: ສຳນານ)
ຄໍາເຫັນ