 |
ໃນໂອກາດເຂົ້າຮ່ວມກອງປະຊຸມສຳມະນາເຊື່ອມຊຶມເອກະສານ ເພື່ອກະກຽມໃຫ້ກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ I. ທ່ານ ພັນເອກ ພອນພິລຸນ ປັນຍາສິລິ ຫົວໜ້າກົມສື່ມວນຊົນ ກະຊວງ ປກສ ໄດ້ໃຫ້ສໍາພາດຕໍ່ນັກຂ່າວໜັງສືພິມປະຊາຊົນໃນວັນ 13 ກໍລະກົດນີ້, ທີ່ຫໍປະຊຸມແຫ່ງຊາດວ່າ: ຕົນເອງຮູ້ສຶກພາກພູມໃຈ ແລະ ດີໃຈທີ່ໄດ້ເຂົ້າຮ່ວມກອງປະຊຸມໃນຄັ້ງນີ້, ໃນການພັດທະນາວຽກງານສື່ມວນຊົນ ໂດຍສະເພາະສື່ມວນຊົນ ປກສ ໃຫ້ກ້າວຂຶ້ນສູ່ຄວາມທັນສະໄໝໃນຍຸກດີຈີຕອນ ເພື່ອເປັນກະບອກສຽງທີ່ເຂັ້ມແຂງໃຫ້ພັກ ແລະ ລັດ. ສື່ມວນຊົນ ປກສ ໃນການເປັນສື່ກາງໂຄສະນາເຜີຍແຜ່ແນວທາງນະໂຍບາຍຂອງພັກ ລະບຽບກົດໝາຍຂອງລັດ ແລະ ວຽກງານປ້ອງກັນຊາດ-ປ້ອງກັນຄວາມສະຫງົບ ໃຫ້ລົງຮອດທົ່ວເຖິງປະຊາຊົນໃນສັງຄົມ. ໃນໄລຍະຜ່ານມາ ສື່ມວນຊົນ ປກສ ໄດ້ຕັ້ງໜ້າເຮັດໜ້າທີ່ໂຄສະນາແກ້ໄຂບັນຫາປະກົດການຫຍໍ້ທໍ້ຕ່າງໆ ເປັນຕົ້ນ ບັນຫາຍາເສບຕິດ ກຸ່ມມິດສາຊີບອອນລາຍ (Scammer) ຂີ້ລັກງັດແງະ ແລະ ອຸບັດຕິເຫດ ມີຜົນລໍາເລັດເປັນຢ່າງດີ.
ທ່ານ ພັນເອກ ພອນພິລຸນ ປັນຍາສິລິ ກ່າວຕື່ມວ່າ: ເພື່ອຮັບມືກັບສິ່ງທ້າທາຍ ແລະ ກ້າວເຂົ້າສູ່ຍຸກສະໄໝ ໃໝ່ ໃນຕໍ່ໜ້າ ສື່ມວນຊົນ ປກສ ຈະສືບຕໍ່ປັບປຸງ 3 ດ້ານຫຼັກຄື: ການພັດທະນາບຸກຄະລາກອນ ເລັ່ງສ້າງຂີດຄວາມສາມາດໃຫ້ບຸກຄະລາກອນ ໃຫ້ມີຄວາມຮູ້-ຄວາມເຂົ້າໃຈດ້ານເຕັກໂນໂລຊີ ໂດຍສະເພາະແມ່ນການນຳໃຊ້ປັນຍາປະດິດ (AI) ເຂົ້າໃນການຜະລິດສື່; ການປັບປຸງພື້ນຖານໂຄງລ່າງ ຍົກລະດັບຫ້ອງສະຕູດິໂອ ຫ້ອງອັດສຽງ ແລະ ພາຫະນະຮັບໃຊ້ໃຫ້ມີຄວາມທັນສະໄໝ; ວາງແຜນສ້າງສະຖານີໃນບັນດາແຂວງທ້ອງຖິ່ນ ເພື່ອຂະຫຍາຍຊ່ອງທາງການຮັບຟັງໃຫ້ເຂົ້າເຖິງປະຊາຊົນໄດ້ຢ່າງທົ່ວເຖິງ. ພ້ອມນັ້ນ, ການພັດທະນາສື່ສັງຄົມອອນລາຍ (Social Media) ເພີ່ມທະວີການນຳໃຊ້ແພລັດຟອມຕ່າງໆ ເປັນຕົ້ນແມ່ນ Facebook, YouTube ແລະ TikTok ໃຫ້ມີຄວາມຫຼາກຫຼາຍ, ມີການວິເຄາະ ວິໄຈຂໍ້ມູນຢ່າງເລິກເຊິ່ງ ແລະ ສ້າງຄວາມແຕກຕ່າງໃນແຕ່ລະຊ່ອງທາງ ເພື່ອໃຫ້ປະຊາຊົນເຂົ້າເຖິງຂໍ້ມູນຂ່າວສານໄດ້ສະດວກສະບາຍຂຶ້ນ. ໃນນັ້ນ, ຈະພະຍາຍາມປັບປຸງສື່ຕົນເອງໃຫ້ກ້າວສູ່ຍຸກສະໄໝໃໝ່ ເພື່ອໃຫ້ສື່ມວນຊົນ ປກສ ເຂົ້າຫາປະຊາຊົນຢ່າງແທ້ຈິງ ພ້ອມທັງຄຽງບ່າຄຽງໄຫຼ່ ແລະ ຮ່ວມມືກັບສຳນັກສື່ອື່ນໆ ໃນການບຸກທະລຸຕະລຸມບອນ, ສ້າງຄວາມທັນສະໄໝ ແລະ ຮັບປະກັນໃຫ້ການເຜີຍແຜ່ຂໍ້ມູນຂ່າວສານ ດຳເນີນໄປຖືກທິດ ຖືກຕ້ອງຕາມກົດໝາຍ.
ຄໍາເຫັນ