ສື່ມວນຊົນ ຕ້ອງໄດ້ຮັບການພັດທະນາໃຫ້ມີບາດກ້າວຂະຫຍາຍຕົວໃໝ່ ທັນສະໄໝ

ທ່ານ ຄໍາສະຫວັນ ໂຄດໄຊ ກ່າວວ່າ: ກອງປະຊຸມໃນຄັ້ງນີ້, ຖືເປັນໂອກາດອັນດີເລີດໃນການຖອດຖອນບົດຮຽນຮ່ວມກັນ ລະຫວ່າງບັນດາສື່ມວນຊົນຈາກກະຊວງ ແລະ ພະແນກການຕ່າງໆ ໃນຂອບເຂດທົ່ວປະເທດ. ສຳລັບ ນວ ພາຍຫຼັງທີ່ມີການໂຮມເອົາສື່ໂທລະພາບ-ວິທະຍຸ ແລະ ໜັງສືພິມ ມາຂຶ້ນກັບການຄຸ້ມຄອງຂອງຄະນະໂຄສະນາອົບຮົມນະຄອນຫຼວງ, ທາງຄະນະໄດ້ຕັ້ງໜ້າປັບປຸງລະບົບບໍລິຫານ ແລະ ການຄຸ້ມຄອງ ພ້ອມທັງເຄື່ອນໄຫວຢ່າງຕັ້ງໜ້າ ເພື່ອເຮັດໜ້າທີ່ເປັນກະບອກສຽງອັນແຫຼມຄົມໃຫ້ອົງຄະນະພັກ ແລະ ຄະນະນຳ ນວ. ເປົ້າໝາຍຫຼັກແມ່ນການສົ່ງຕໍ່ຂໍ້ມູນຂ່າວສານ ບັນດານິຕິກຳ ແລະ ວຽກງານພັກ-ລັດ ໃຫ້ປະຊາຊົນໃນຂອບເຂດ 9 ເມືອງ ທົ່ວ ນວ ໄດ້ຮັບຮູ້ຢ່າງທົ່ວເຖິງ. ໃນຂະນະດຽວກັນ, ສື່ມວນຊົນ ກໍເປັນຊ່ອງທາງໃຫ້ປະຊາຊົນໄດ້ສະທ້ອນຄຳຄິດຄຳເຫັນ ແລະ ສ່ອງແສງສະພາບຄວາມເປັນຈິງກັບຄືນມາຍັງພາກລັດ ເພື່ອຮ່ວມກັນແກ້ໄຂບັນຫາຕ່າງໆ ໃຫ້ທັນການ ໂດຍສະເພາະແມ່ນການຕອບໂຕ້ຂໍ້ມູນຂ່າວສານທີ່ບໍ່ຖືກຕ້ອງຈາກກຸ່ມຄົນອິດທິປໍລະປັກ.

ຫົວໜ້າຄະນະໂຄສະນາອົບຮົມ ນວ ຍັງຊີ້ໃຫ້ເຫັນເຖິງຂໍ້ຄົງຄ້າງ ໂດຍສະເພາະແມ່ນຄວາມຊັກຊ້າໃນການເຜີຍແຜ່ຂໍ້ມູນຂ່າວສານ ຜ່ານຊ່ອງທາງອອນລາຍ ເປັນຕົ້ນ ເຟສບຸກ (Facebook) ແລະ ຕິກຕັອກ (TikTok) ເພື່ອແກ້ໄຂບັນຫາດັ່ງກ່າວ, ນວ ມີແຜນການທີ່ຈະສຸມໃສ່ປັບປຸງ ແລະ ພັດທະນາບຸກຄະລາກອນ ໂດຍການຮ່ວມມືກັບບັນດາປະເທດເພື່ອນມິດຍຸດທະສາດ ເພື່ອຍົກລະດັບຄວາມຮູ້-ຄວາມສາມາດ ແລະ ຫັນວຽກງານສື່ມວນຊົນໄປສູ່ລະບົບດີຈີຕອນ (Digital) ຢ່າງເຕັມຮູບແບບ. ຊຶ່ງການຫັນປ່ຽນດັ່ງກ່າວ ແມ່ນການຜັນຂະຫຍາຍ ແລະ ຕິດພັນຢ່າງສະໜິດແໜ້ນກັບມະຕິກອງປະຊຸມໃຫຍ່ ຄັ້ງທີ XII ຂອງພັກ ແລະ ມະຕິ VIII ຂອງອົງຄະນະພັກ ນວ, ຊຶ່ງຄະນະນຳຂັ້ນເທິງໄດ້ເຫັນວ່າ ສື່ມວນຊົນແມ່ນປັດໄຈສຳຄັນ ທີ່ຈະຕ້ອງໄດ້ຮັບການພັດທະນາໃຫ້ມີບາດກ້າວຂະຫຍາຍຕົວໃໝ່ ທີ່ທັນສະໄໝ ແລະ ກວ້າງຂວາງກວ່າເກົ່າ ເພື່ອຮັບໃຊ້ຊາດ ແລະ ຮັບໃຊ້ປະຊາຊົນຢ່າງແທ້ຈິງ.