ສື່ມວນຊົນລາວສໍາເລັດຊຸດຝຶກອົບຮົມການລາຍງານຂ່າວບັນຫາສີຂຽວ

 ໂດຍການມີສ່ວນຮ່ວມຂອງອົງການຈັດຕັ້ງພາກສັງຄົມທີ່ກ່ຽວຂ້ອງ ເພື່ອການພັດທະນາສີຂຽວໃນ ສປປ ລາວ ຫຼື ເອີ້ນຊື່ຫຍໍ້ວ່າແກມຊິວ(GAMCIL)ໄດ້ສໍາເລັດການຝຶກອົບຮົມໃຫ້ແກ່ສື່ມວນຊົນຈາກສູນກາງ ແລະ ທ້ອງຖິ່ນໃນຫົວຂໍ້: ການລາຍງານຂ່າວບັນຫາສີຂຽວ. ພາຍຫຼັງທີ່ໄດ້ດໍາເນີນມາແຕ່ວັນທີ 21-25 ຕຸລາຜ່ານມາທີ່ແຂວງຫຼວງພະບາງແບບປົກກະຕິ ແລະ ອອນລາຍ. ດັ່ງນັ້ນ, ຈຶ່ງໄດ້ສືບຕໍ່ຈັດຝຶກອົບຮົມໃນຫົວຂໍ້ດັ່ງກ່າວຂຶ້ນອີກໃນວັນທີ 11ພະຈິກຜ່ານມາ ທີ່ສະຖານີວິິທະຍຸກະຈາຍສຽງແຫ່ງຊາດລາວ ນະຄອນຫຼວງວຽງຈັນມາຮອດວັນທີ 14 ພະຈິກນີ້ໄດ້ປິດລົງດ້ວຍຜົນສໍາເລັດອັນຈົບງາມໂດຍການເຂົ້າຮ່ວມຂອງທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວແຫ່ງ ສປປ ລາວ ອະດີດຮອງລັດຖະມົນຕີກະຊວງຖະແຫຼງຂ່າວ,ວັດທະນະທໍາ ແລະ ທ່ອງທ່ຽວ, ມີທ່ານນາງ ບົວຄໍາ ດວງປັນຍາ ຫົວໜ້າໂຄງການແກມຊິວ ອົງການແຄຣນາໆຊາດ ປະຈໍາ ສປປ ລາວພ້ອມດ້ວຍສໍາມະນາກອນຂະແໜງການກ່ຽວຂ້ອງເຂົ້າຮ່ວມ.

ຊຸດຝຶກອົບຮົມຄັ້ງນີ້, ແມ່ນໜຶ່ງໃນກິດຈະກຳຫຼັກຂອງໂຄງການ GAMCIL ເພື່ອບັນລຸຕາມແຜນຍຸດທະສາດຂອງສະມາຄົມນັກຂ່າວແຫ່ງ ສປປ ລາວ ແລະ ແຜນການດຳເນີນກິດຈະກຳຂອງໂຄງການ ໃນການສ້າງຄວາມອາດສາມາດໃຫ້ແກ່ຜູ້ທີ່ເຮັດວຽກງານຂະແໜງຖະແຫຼງຂ່າວສື່ມວນຊົນໃນທົ່ວປະເທດ ແລະ ເຂົ້າຮ່ວມການເຄື່ອນໄຫວກິດຈະກຳການຝຶກອົບຮົມຕ່າງໆ ທີ່ຈະໄດ້ຈັດຂຶ້ນ ໂດຍສະມາຄົມນັກຂ່າວແຫ່ງ ສປປ ລາວ ຕະຫຼອດໄລຍະການດຳເນີນໂຄງການ. ໃນຊຸດອົບຮົມຄັ້ງນີ້, ຜູ້ເຂົ້າຮ່ວມໄດ້ຮຽນຮູ້ຫຼາຍບັນຫາສໍາຄັນເຊັ່ນ: ວຽກງານການຄຸ້ມຄອງສື່ມວນຊົນ, ຄວາມປອດໄພໃນການໃຊ້ສື່ສັງຄົມອອນລາຍ ແລະ ການແກ້ໄຂບັນຫາສື່ສັງຄົມອອນລາຍ; ການພັດທະນາສີຂຽວ,ບັນຫາສິ່ງແວດລ້ອມ ແລະ ການນໍາໃຊ້ເອໄອເຂົ້າຊ່ວຍວຽກງານສື່; ບົດບາດ ແລະ ຄວາມສະເໝີພາບຍິງ-ຊາຍໃນຍຸກດີຈີຕອນ ແລະ ຈັນຍາບັນນັກຂ່າວໃນຍຸກປັດຈຸບັນ; ການຖ່າຍ-ຕັດຕໍ່ວິດີໂອ ແລະ ຮູບພາບຂ່າວໃສ່ສື່ອອນລາຍ ແລະ ອື່ນໆ. ພ້ອມນັ້ນ, ຍັງໄດ້ເຮັດກິດຈະກໍາເປັນກຸ່ມ ພ້ອມທັງຮຽນຮູ້ທິດສະດີ ແລະ ປະຕິບັດຕົວຈິງ.

ໂຄງການ GAMCIL ໄດ້ຮັບການສະໜັບສະໜູນທຶນຈາກສະຫະພາບເອີຣົບໃນໄລຍະ 4 ປີນັບແຕ່ປີ 2023-2027 ແລະ ມອບໝາຍໃຫ້ສະມາຄົມນັກຂ່າວແຫ່ງ ສປປ ລາວ ແລະ ອົງການແຄຣ ນາໆຊາດປະຈຳ ສປປ ລາວ ເປັນຜູ້ຈັດຕັ້ງປະຕິບັດກິດຈະກຳຂອງໂຄງການ ໂດຍມີ 2 ເປົ້າໝາຍຫຼັກຄື: 1. ສື່ມວນຊົນຂອງລັດ ແລະ ສື່ພາກສັງຄົມທີ່ໄດ້ລົງທະບຽນຖືກຕ້ອງຕາມກົດໝາຍ ສປປ ລາວ ຈະໄດ້ຮັບການຍົກລະດັບທັກສະດ້ານວິຊາຊີບ ລວມທັງການນຳໃຊ້ເຕັກໂນໂລຊີແບບດີຈີຕອນ ແລະ ສື່ແບບໃໝ່ເພື່ອເຮັດໃຫ້ປະຊາຊົນໄດ້ຮັບຂໍ້ມູນຂ່າວສານທີ່ມີຄຸນນະພາບ ໂດຍຜ່ານການລາຍງານທີ່ມີຄວາມຮັບຜິດຊອບ ແລະ ເປັນມືອາຊີບກ່ຽວກັບການພັດທະນາສີຂຽວ; 2.ບັນດາຜູ້ເຂົ້າຮ່ວມຈາກອົງການຈັດຕັ້ງທາງສັງຄົມທີ່ເຮັດວຽກກ່ຽວກັບການພັດທະນາສີຂຽວ ຊຶ່ງລະບຸຢູ່ໃນກິດຈະກຳ, ຜູ້ນໍາໃຊ້ສື່ສັງຄົມອອນລາຍທົ່ວໄປ, ຜູ້ສ້າງວິດີໂອ ແລະ ຮູບເງົາໄດ້ຮັບການຍົກລະດັບຄວາມຮູ້ ແລະ ຄວາມສາມາດຂອງຕົນໃນການປະກອບສ່ວນສ້າງນະໂຍບາຍ, ຕິດຕາມ ແລະ ຊຸກຍູ້ວຽກງານການພັດທະນາສີຂຽວທີ່ມີຜົນກະທົບຕໍ່ຊຸມຊົນ ລວມທັງການນຳໃຊ້ເຕັກໂນໂລຊີດີຈີຕອນ ແລະ ສື່ແບບໃໝ່ຢ່າງສ້າງສັນ.ໂອກາດນີ້, ໄດ້ມີພິທີມອບໃບຢັ້ງຢືນໃຫ້ນັກຝຶກອົບຮົມ ເປັນກຽດມອບໂດຍທ່ານ ສະຫວັນຄອນ ຣາຊມຸນຕຣີ. ສື່ມວນຊົນທີ່ສໍາເລັດການຝຶກອົບຮົມໃນຄັ້ງນີ້ມີຈໍານວນ 18 ຄົນ ຍິງ 12 ຄົນ.

(ຂ່າວ-ພາບ: ວັນເພັງ)