ສື່ມວນຊົນແມ່ນຂົວຕໍ່ທີ່ສໍາຄັນທີ່ສຸດ ລະຫວ່າງພັກ-ລັດ ກັບປະຊາຊົນ

ທ່ານ ທອງໃບ ໂພທິສານ ກ່າວວ່າ: ໃນນາມທີ່ຕົນເອງເຄີຍໄດ້ຜ່ານຊີວິດເປັນນັກຂ່າວ ກ່ອນຈະກ້າວຂຶ້ນມາເປັນບັນນາທິການ ແລະ ເປັນນັກປະພັນນັກກະວີໃນປັດຈຸບັນ, ສະນັ້ນ ຕົນເອງ ມີຄວາມຮູ້ສຶກພາກພູມໃຈ ແລະ ເປັນກຽດຢ່າງຍິ່ງ ທີ່ໄດ້ມີໂອກາດສະແດງຄວາມຄິດເຫັນ ເນື່ອງໃນໂອກາດວັນສ້າງຕັ້ງສື່ມວນຊົນລາວ ຄົບຮອບ 76 ປີ. ໃນຕະຫຼອດໄລຍະຂອງການປະຕິບັດພາລະກິດແຫ່ງການຕໍ່ສູ້, ປົກປັກຮັກສາ ແລະ ສ້າງສາພັດທະນາປະເທດຊາດ ເວົ້າລວມສື່ມວນຊົນລາວ ແລະ ເວົ້າສະເພາະໜັງສືພິມ ປະຊາຊົນ ສຽງຂອງສູນກາງພັກ ແມ່ນໄດ້ປະຕິບັດໜ້າທີ່ການເມືອງຂອງຕົນຢ່າງມີຜົນສໍາເລັດ ໂດຍໄດ້ໂຄສະນາເຜີຍແຜ່ຂໍ້ມູນຂ່າວສານເຫດການສະຖານະການ ທັງພາຍໃນ ແລະ ຕ່າງປະເທດຢ່າງກວ້າງຂວາງ, ທົ່ວເຖິງທຸກເປົ້າໝາຍ, ເຮັດໃຫ້ປະຊາຊົນລາວບັນດາເຜົ່າ ໃນທົ່ວປະເທດສາມາດໄດ້ຮັບຂໍ້ມູນຂ່າວສານຕ່າງໆຢ່າງເປັນປະຈໍາໃນແຕ່ລະມື້. ເນື້ອໃນໂຄສະນາຂອງສື່ມວນຊົນກໍໄດ້ມີຄວາມຫຼາກຫຼາຍ ແລະ ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາໃນແຕ່ລະໄລຍະ ເຊັ່ນ: ເຜີຍແຜ່ຂໍ້ມູນຂ່າວສານທາງດ້ານການເມືອງ, ເສດຖະກິດ, ວັດທະນະທໍາ-ສັງຄົມ, ວິທະຍາສາດ, ເຕັກໂນໂລຊີ, ສາລະໜ້າຮູ້, ຄວາມບັນເທີງ ໃຫ້ແກ່ສັງຄົມຢ່າງເປັນຂະບວນການຕໍ່ເນື່ອງ ແລະ ມີຫຼາຍຮູບຫຼາຍສີ. ການໂຄສະນາເຜີຍແຜ່ຂໍ້ມູນຂ່າວສານຜ່ານສື່ສິ່ງພິມ, ສື່ເອເລັກໂຕຣນິກ ແລະ ສື່ແບບໃໝ່ ແມ່ນໄດ້ຮັບການພັດທະນາຢ່າງຄວບຄູ່, ສື່ສິ່ງພິມກໍໄດ້ຮັບການສົ່ງເສີມຢ່າງມີຫົວຄິດປະດິດສ້າງ, ສື່ເອເລັກໂຕຣນິກກໍໄດ້ມີການປັບປຸງໃຫ້ທັນກັບສະພາບແວດລ້ອມອັນໃໝ່, ການຂະຫຍາຍຕົວຂອງຍຸກສະໄໝ ແລະ ການຫັນເປັນດີຈີຕອນພາຍໃນ ແລະ ການປ່ຽນແປງຂອງສະພາບການເງື່ອນໄຂຂອງສາກົນ. ພັກເຮົາຖືວ່າ ສື່ມວນຊົນລາວ ເປັນເຄື່ອງມືທາງດ້ານການເມືອງ-ແນວຄິດຂອງບັນດາອົງການຈັດຕັ້ງໃນລະບົບການເມືອງ ໂດຍມີພັກເປັນແກນນໍາ ຊຶ່ງສື່ໄດ້ກາຍເປັນພາຫະນະສື່ສານຕົ້ນຕໍທີ່ສໍາຄັນກວ້າງຂວາງທີ່ສຸດ ທີ່ຜູກພັນລະຫວ່າງພັກ-ລັດ ກັບປະຊາຊົນ ທັງເປັນຜູ້ທີ່ໄດ້ນໍາເອົາທັດສະນະແນວຄິດ, ທິດສະດີປະຕິວັດ, ແນວທາງ, ແຜນນະໂຍບາຍຂອງພັກ ແລະ ລະບຽບກົດໝາຍຂອງລັດລົງໄປສູ່ປະຊາຊົນ. ພ້ອມດຽວກັນນັ້ນ ສື່ຍັງເປັນຜູ້ນໍາເອົາຄວາມຄິດເຫັນ, ແນວຄິດຈິດໃຈ, ຄວາມມຸ່ງມາດປາຖະໜາຂອງປະຊາຊົນມາສ່ອງແສງໃຫ້ພັກ-ລັດ. ສະນັ້ນ ຈຶ່ງສາມາດເວົ້າໄດ້ວ່າ “ສື່ມວນຊົນແມ່ນຂົວຕໍ່ທີ່ສໍາຄັນທີ່ສຸດ ລະຫວ່າງພັກ-ລັດ ກັບປະຊາຊົນ”

ທ່ານໄດ້ກ່າວຕື່ມອີກວ່າ: ມາໃນຍຸກສະໄໝປັດຈຸບັນ, ສື່ມວນຊົນລາວພວມຢູ່ໃນຍຸກຂອງການປະຕິວັດ 4.0 ແລະ ຍຸກຂອງເຕັກໂນໂລຊີ ປັນຍາປະດິດ (AI) ທີ່ກໍາລັງເປັນກະແສມາແຮງ ຊຶ່ງມີທັງກາລະໂອກາດ ແລະ ສິ່ງທ້າທາຍຫຼາຍປະການ. ເພື່ອຮັບປະກັນບົດບາດ ແລະ ການພັດທະນາສື່ມວນຊົນລາວໃຫ້ກ້າວໜ້າທັນກັບສະພາບຄວາມຮຽກຮ້ອງຕ້ອງການຂອງໜ້າທີ່ການເມືອງໃນໄລຍະໃໝ່ ຕ້ອງໄດ້ຫັນເອົາບັນດາເນື້ອໃນຂອງກອງປະຊຸມວຽກງານສື່ມວນຊົນທົ່ວປະເທດ ຄັ້ງທີ I ທີ່ຫາກໍສໍາເລັດແລ້ວນັ້ນ ນໍາມາຈັດຕັ້ງ ແລະ ຜັນຂະຫຍາຍເຂົ້າໃນວຽກງານຕົວຈິງຢ່າງແຂງແຮງ ຊຶ່ງໃນນັ້ນແມ່ນຕ້ອງໄດ້ເພີ່ມທະວີບົດບາດການນໍາພາທີ່ເຂັ້ມແຂງຂອງພັກຕໍ່ສື່ມວນຊົນ, ປັບປຸງກົງຈັກການຈັດຕັ້ງ ແລະ ພະນັກງານທີ່ເຮັດວຽກງານສື່ມວນຊົນໃຫ້ເຂັ້ມແຂງ ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ມີຈັນຍາບັນ ແລະ ເປັນມືອາຊີບ, ຄຸ້ມຄອງອົງການສື່ມວນຊົນຢ່າງເຂັ້ມງວດຕາມກົດໝາຍ, ພັດທະນາພື້ນຖານໂຄງລ່າງ, ວັດຖຸ-ເຕັກນິກໃນເງື່ອນໄຂໃໝ່, ຮັບປະກັນງົບປະມານໃຫ້ການເຄື່ອນໄຫວຂອງສື່ມວນຊົນ ເປັນຕົ້ນ. ເວົ້າລວມແລ້ວ ຕ້ອງເຂົ້າໃຈວ່າ ການພັດທະນາສື່ມວນຊົນລາວໃນໄລຍະໃໝ່ ເພື່ອໃຫ້ໄປທັນກັບຍຸກກັບສະໄໝ ແມ່ນວຽກທີ່ດໍາເນີນແບບຮອບດ້ານ ທັງດ້ານເນື້ອໃນ, ບຸກຄະລາກອນ, ເຕັກໂນໂລຊີ ແລະ ກົນໄກການຄຸ້ມຄອງ. ການປັບປຸງວຽກງານສື່ມວນຊົນຕ້ອງເປັນລະບົບຄົບຊຸດ ຊຶ່ງຈະກາຍເປັນປັດໃຈສໍາຄັນ ແລະ ຕັດສິນໃນການພັດທະນາສື່ລາວເຮົາໃຫ້ນັບມື້ກ້າວໜ້າ ທັນສະໄໝ ວ່ອງໄວໄປທັນຍຸກ.

ໂອກາດດັ່ງກ່າວ ທ່ານປະທານສະມາຄົມນັກປະພັນລາວ ກໍໄດ້ມີບົດກາບກອນສໍາລັບວັນສ້າງຕັ້ງສື່ມວນຊົນລາວ ວ່າ:

76 ປີໄດ້ຜ່ານພົ້ນ

ສື່ມວນຊົນລາວກ້າວໜ້າ ເນື້ອໃນຄ່ອງທັນການ

ສົ່ງຂ່າວສານກວມໄກ ທົ່ວແດນດິນກວ້າງ

ປວງຊົນລາວເໜືອໃຕ້ ທັງແດນໄກປະເທດຕ່າງ

ຮັບຂ່າວຄາວແຕ່ລະມື້ ແລງເຊົ້າທົ່ວເຖິງ

ຂໍອວຍພອນໄຊ

ໃຫ້ສື່ມວນຊົນທຸກທົ່ວໜ້າ ທັງນັກຂ່າວບັນນາທິການ

ຈົ່ງເບີກບານສໍາລານສຸກ ເຂັ້ມແຂງແຮງກ້າ

ອາຍຸ ວັນນະ ສຸຂະ ພະລະພ້ອມ ການງານທັງໜ້າທີ່

76 ປີສະຫຼອງໄຊຟົດຟື້ນ ພັດທະນາກ້າວຍຸກສະໄໝ ທ່ານເອີຍ!