ກະຊວງກະສິກຳ ແລະ ປ່າໄມ້ ໄດ້ອອກຂໍ້ຕົກລົງ ສະບັບເລກທີ 3537/ກປ, ລົງວັນທີ 8 ສິງຫາ 2023 ວ່າດ້ວຍການຮັບຮອງ ແລະ ປະກາດໃຊ້ ໂຄງການຜະລິດພືດທີ່ມີທ່າແຮງເປັນສິນຄ້າຍຸດທະສາດ ເພື່ອຈໍາໜ່າຍພາຍໃນ ແລະ ສົ່ງອອກຕ່າງປະເທດ ຈໍານວນ 14 ໂຄງການ ໄລຍະ 5 ປີ (2023-2027), ໃນມູນຄ່າ 5,571 ຕື້ກີບ ຊຶ່ງປະກອບມີ: ໂຄງການພືດບຸລິມະສິດ ມີໂຄງການຊຸກຍູ້ການປູກເຂົ້າເປັນສິນຄ້າ, ໂຄງການຊຸກຍູ້ການປູກກາເຟເປັນສິນຄ້າ, ໂຄງການຊຸກຍູ້ການປູກຊາເປັນສິນຄ້າ; ໂຄງການພືດລົ້ມລຸກ ແລະ ພືດອຸດສາຫະກຳ ມີໂຄງການຊຸກຍູ້ການປູກມັນຕົ້ນເປັນສິນຄ້າ, ໂຄງການຊຸກຍູ້ການປູກສາລີເປັນສິນຄ້າ, ໂຄງການຊຸກຍູ້ການປູກພືດຕະກູນຖົ່ວເປັນສິນຄ້າ, ໂຄງການຊຸກຍູ້ການປູກຢາສູບເປັນສິນຄ້າ, ໂຄງການຊຸກຍູ້ການປູກອ້ອຍເປັນສິນຄ້າ; ໂຄງການໄມ້ໃຫ້ໝາກ ມີໂຄງການຊຸກຍູ້ການປູກໝາກໂມເປັນສິນຄ້າ, ໂຄງການຊຸກຍູ້ການປູກໝາກກ້ວຍເປັນສິນຄ້າ, ໂຄງການຊຸກຍູ້ການປູກໝາກມ່ວງເປັນສິນຄ້າ, ໂຄງການຊຸກຍູ້ການປູກໝາກມ່ວງຫິມະພານເປັນສິນຄ້າ, ໂຄງການຊຸກຍູ້ການປູກໝາກກ້ຽງເປັນສິນຄ້າ ແລະ ໂຄງການຊຸກຍູ້ການປູກໝາກມີ້ເປັນສິນຄ້າ.
ໃນໄລຍະຜ່ານມາ, ກົມປູກຝັງ ໄດ້ປະສານສົມທົບກັບທຸກພາກສ່ວນທີ່ກ່ຽວຂ້ອງ ເພື່ອຈັດຕັ້ງປະຕິບັດໂຄງການດັ່ງກ່າວ ໃຫ້ມີປະສິດທິພາບ ແລະ ປະສິດທິຜົນສູງ ຊຶ່ງໃນກອງປະຊຸມສະຫຼຸບວຽກງານກະສິກຳ, ປ່າໄມ້ແລະພັດທະນາຊົນນະບົດປະຈຳປີ 2024ແລະທິດທາງແຜນການ 2025 ທີ່ຈັດຂຶ້ນເມື່ອທ້າຍເດືອນມັງກອນຜ່ານມາ ກໍໄດ້ໃຫ້ຮູ້ວ່າມີຫຼາຍໂຄງການມີຄວາມຄືບໜ້າ ແລະ ພົ້ນເດັ່ນຊຶ່ງໂຄງການລົງທຶນພາຍໃນ ແລະ ຕ່າງປະເທດ ເຂົ້າໃສ່ວຽກງານກະສິກຳ ແລະ ປ່າໄມ້ຂອງພາກເອກະຊົນທັງພາຍໃນ ແລະ ຕ່າງປະເທດ ໃນປີ 2024 ຜ່ານມາ ມີບໍລິສັດລົງທຶນທັງໝົດ 2,505 ບໍລິສັດ, ມູນຄ່າການລົງທຶນທັງໝົດປະມານ 9.1 ຕື້ໂດລາ, ຈົດທະບຽນ ປະມານ 4.9 ຕື້ໂດລາ ໂດຍໃນນີ້ການລົງທຶນໃນຂະແໜງປູກຝັງ ມີ 1,108 ໂຄງການ ແລະ ໄດ້ປະກອບສ່ວນສຳຄັນເຂົ້າໃນການການຜະລິດເປັນສິນຄ້າ ເຮັດໃຫ້ການປູກພືດເປັນສິນຄ້າໃນປີ 2024 ຜ່ານມາ ມີຜົນຜະລິດໄດ້ປະມານ 11,092,150 ໂຕນ ເພີ່ມຂຶ້ນ 13.8% ເມື່ອທຽບກັບປີ 2023; ພ້ອມນີ້, ຍັງປະກອບສ່ວນເຮັດໃຫ້ການສົ່ງອອກພືດ ແລະ ຜະລິດຕະພັນພືດ ຜ່ານດ່ານກັກກັນພືດສາກົນ ມີມູນຄ່າ1,114 ລ້ານກວ່າໂດລາ ລື່ນແຜນການ 1.2% (ແຜນການປີ 2024 ແມ່ນ 1,100 ລ້ານໂດລາ) ລາຍການພືດສົ່ງອອກ ພົ້ນເດັ່ນກວ່າໝູ່ແມ່ນ ມັນຕົ້ນ, ໝາກກ້ວຍ, ສາລີແຂງ, ອ້ອຍ, ໝາກໂມ.
ເຖິງຢ່າງໃດກໍຕາມ, ເພື່ອໃຫ້ບັນລຸເປົ້າໝາຍປີ 2025 ໃນການຜະລິດພືດ ທີ່ມີທ່າແຮງ ເປັນສິນຄ້າ ແລະ ເປັນບຸລິມະສິດ ໃຫ້ໄດ້ທັງໝົດ 736,010 ເຮັກຕາ ຜົນຜະລິດໃຫ້ໄດ້ 11.27 ລ້ານໂຕນ ເປັນຕົ້ນແມ່ນ ກາເຟ 179,000 ໂຕນ, ສາລີແຂງ 547,300 ໂຕນ, ອ້ອຍ 1.72 ລ້ານໂຕນ, ມັນຕົ້ນ 7.48 ລ້ານໂຕນ, ໝາກກ້ວຍ 756,000 ໂຕນ, ໝາກໂມ 159,900 ໂຕນ, ພືດປະເພດຖົ່ວ 162,250 ໂຕນ ແລະ ພືດອື່ນໆ ສົ່ງເສີມຕາມເງື່ອນໄຂ ຕາມທ່າແຮງ; ລັດຖະບານ ກໍຄືພາກສ່ວນກ່ຽວຂ້ອງ ກໍໄດ້ມີຄວາມພະຍາຍາມ ສືບຕໍ່ສຸມໃສ່ການຍາດແຍ່ງການຮ່ວມມືທັງພາຍໃນແລະຕ່າງປະເທດ ເພື່ອປະກອບສ່ວນສຳຄັນໃນການບັນລຸເປົ້າໝາຍດັ່ງກ່າວ.
ຄໍາເຫັນ