 |
ທ່ານ ນາງ ສຳລີ ພົມພັກດີ ຮອງປະທານຄະນະກຳມະການປົກຄອງຕາແສງຫາດຊາຍຄູນໄດ້ຜ່ານບົດສະຫຼຸບ ໃຫ້ຮູ້ວ່າ: ພາຍຫຼັງທີ່ໄດ້ປະກາດສ້າງຕັ້ງຕາແສງຫາດຊາຍຄູນຢ່າງເປັນທາງການ, ຄະນະພັກ ແລະ ອົງການປົກຄອງຕາແສງ ໄດ້ສຸມໃສ່ສຶກສາອົບຮົມການເມືອງ-ແນວຄິດ, ປັບປຸງກົນໄກການບໍລິການປະຊາຊົນ ແລະ ຊຸກຍູ້ການພັດທະນາເສດຖະກິດ-ສັງຄົມຢູ່ຮາກຖານຢ່າງຕໍ່ເນື່ອງ, ໃນ 6 ເດືອນຕົ້ນປີ 2026 ນີ້ການພັດທະນາໂຄງລ່າງພື້ນຖານ ສາມາດກໍ່ສ້າງ-ສ້ອມແປງ ຍົກລະດັບເສັ້ນທາງ ບ້ານນາເຊືອກ - ໂພນວິໄຊ (ທຶນລັດ) ກວ້າງ 5 ແມັດ, ຍາວ 7.5 ກິໂລແມັດ, ມູນຄ່າ 4.01 ຕື້ກີບ ເຊິ່ງປັດຈຸບັນ ສຳເລັດແລ້ວ 100%; ພ້ອມນັ້ນ ຍັງໄດ້ສຳເລັດການສ້າງທາງເບຕົງຢູ່ບ້ານຫາດຊາຍຄູນ ຍາວ 850 ແມັດ, ກວ້າງ 7 ແມັດ ເຊິ່ງເປີດນຳໃຊ້ແລ້ວ.
ດ້ານການຈັດເກັບລາຍຮັບ ສາມາດເກັບອາກອນທີ່ດິນ ປະຕິບັດໄດ້ 234 ລ້ານກວ່າກີບ, ເທົ່າກັບ 98.72% ຂອງແຜນການປີ (237.1 ລ້ານກວ່າກີບ). ການສົ່ງເສີມການຜະລິດ ແລະ ກອງທຶນບ້ານ: ທົ່ວຕາແສງມີເນື້ອທີ່ປູກເຂົ້ານາປີ 3,721 ເຮັກຕາ, ປູກໝາກມ່ວງຫິມະພານ 650 ເຮັກຕາ ແລະ ປູກມັນຕົ້ນ 377 ເຮັກຕາ. ນອກນັ້ນ, ຍັງມີກອງທຶນພັດທະນາບ້ານ 4 ແຫ່ງ ເຊິ່ງມີເງິນທ້ອນຫຼາຍກວ່າ 15 ຕື້ກວ່າກີບ.
ການບໍລິການປະຊາຊົນ ແລະ ການສຶກສາ: ໄດ້ອຳນວຍຄວາມສະດວກໃນການເຊັນ-ຢັ້ງຢືນເອກະສານທາງລັດຖະການໃຫ້ປະຊາຊົນໄດ້ທັງໝົດ 490 ສະບັບ; ດ້ານການສຶກສາ ໄດ້ຊຸກຍູ້ການສອບເສັງຈົບຊັ້ນ ປະຖົມ (ປ5) 22 ແຫ່ງ, ມັດທະຍົມຕົ້ນ (ມ4) 3 ແຫ່ງ ແລະ ມັດທະຍົມປາຍ (ມ7) 2 ແຫ່ງ ສຳເລັດ 100%. ວຽກງານ ປກຊ - ປກສ: ໄດ້ສົມທົບກັບເຈົ້າໜ້າທີ່ວິຊາສະເພາະເມືອງ ມ້າງຄະດີຢາເສບຕິດໄດ້ 6 ລາຍ (ກັກຕົວ 41 ຄົນ) ແລະ ລົງໂຄສະນາ ທ້ອນໂຮມອາວຸດລ່າເນື້ອ (ປືນແກັບ ແລະ ປືນລົມ) ໄດ້ 8 ກະບອກ.
ສຳລັບທິດທາງ 6 ເດືອນທ້າຍປີ 2026, ຕາແສງຫາດຊາຍຄູນ ຈະສືບຕໍ່ສຸມໃສ່ຊຸກຍູ້ການຜະລິດເຂົ້ານາປີໃຫ້ທັນລະດູການ, ເກັບກຳສະຖິຕິແຮງງານ, ປັບປຸງສະຖານທີ່ປະຈຳການບໍລິການປະຊາຊົນໃຫ້ເປັນມືອາຊີບ, ເພີ່ມພູນກຳລັງ ປກຊ-ປກສ ເພື່ອຕີຖອຍປະກົດການຫຍໍ້ທໍ້ ແລະ ດຶງດູດການລົງທຶນເຂົ້າໃນຕາແສງ ເພື່ອສ້າງເສດຖະກິດຂອງຕາແສງໃຫ້ເຂັ້ມແຂງ.
ຂ່າວ: ເມືອງໂຂງ
ຄໍາເຫັນ