ແຕ່ງຕັ້ງປະທານ-ຮອງປະທານ ຜູ້ປະຈຳການ ແລະ ຄະນະກຳມະການ ປກສ ແຂວງຊຽງຂວາງ

 ທ່ານ ພົນຈັດຕະວາ ສີວັນທາ ເພຍສະຂາ ຄະນະປະຈຳພັກແຂວງ ຫົວໜ້າກອງບັນຊາການ ປກສ ແຂວງ ຄະນະກຳມະການ ປກຊ-ປກສ ແຂວງ ໄດ້ລາຍງານໂດຍຫຍໍ້ ການຈັດຕັ້ງປະຕິບັດວຽກງານ ປກຊ-ປກສ ແຂວງໃນໄລຍະ 6 ເດືອນຜ່ານມາວ່າ: ແຂວງຊຽງຂວາງມີຄວາມສະຫງົບໂດຍພື້ນ ຖານ, ເສດຖະກິດຂະຫຍາຍຕົວຢ່າງຕໍ່ເນື່ອງ, ສ້າງກຸ່ມບ້ານປ້ອມໝັ້ນສູ້ຮົບຕິດລຽນ, ສ້າງບ້ານໃຫຍ່ເປັນຕົວເມືອງນ້ອຍໃນຊົນນະບົດມີ 2 ບ້ານຄື: ບ້ານຄັງວຽງ ເມືອງໝອກ ແລະ ບ້ານຍອດງື່ມ ເມືອງແປກ, ການຫັນລົງກໍ່ສ້າງຮາກຖານການເມືອງ ຕິດພັນກັບວຽກງານ 3 ສ້າງພັດທະນາຊົນນະບົດ ແລະ ແກ້ໄຂຄວາມທຸກຍາກ, ໃນໄລຍະ 6 ເດືອນຕົ້ນປີມີຄະດີເກີດຂຶ້ນທັງໝົດ 244 ເລື່ອງ, ກັກຕົວຜູ້ຕ້ອງຫາໄດ້ 80 ຄົນ ຍິງ 11 ຄົນ, ຄົນຕ່າງປະເທດ 20 ຄົນ, ໃນນີ້, ຄະດີອາຍາ 55 ເລື່ອງ, ຄະດີຄ້າມະນຸດ 12 ເລື່ອງ, ຄະດີລັກຊັບພົນລະເມືອງ 28 ເລື່ອງ, ຄະດີເສດຖະກິດ 69 ເລື່ອງ, ອັກຄີໄພເກີດຂຶ້ນ 8 ຄັ້ງ ສາມາດທັບມ້າງຄະດີຊື້-ຂາຍຢາເສບຕິດໄດ້ 39 ລາຍ, ອຸບັດເຫດເກີດຂຶ້ນຕາມທ້ອງຖະໜົນຫຼວງ 69 ຄັ້ງ, ປະຊາຊົນລັກລອບຂຸດຄົ້ນແຮ່ຄຳຊະຊາຍຖືກດິນຍຸບທັບຢູ່ຈຸດ 8 ພູແຮ້ ແລະ ບ່ອນອື່ນໆເສຍຊີວິດ 2 ຄົນ, ບາດເຈັບ 4 ຄົນ. 

 ທ່ານ ພົນຈັດຕະວາ ຈິດຖະໜອມ ບຸນເລີດ ໄດ້ຜ່ານມະຕິຕົກລົງ ສະບັບເລກທີ 117/ຄລສພ, ລົງວັນທີ 4 ມິຖຸນາ 2026 ວ່າດ້ວຍການແຕ່ງຕັ້ງປະທານ, ຮອງປະທານ, ຜູ້ປະຈຳການ ແລະ ກຳມະ ການຄະນະປ້ອງກັນຊາດ-ປ້ອງກັນຄວາມສະຫງົບແຂວງ ຕົກລົງແຕ່ງຕັ້ງທ່ານ ພູວົງ ອຸ່ນຄຳແສນ ເປັນປະທານ, ທ່ານ ບົວເງິນ ຫຸມໄຊຍະພົມ ເປັນຮອງປະທານ, ທ່ານ ພົນຈັດຕະວາ ວັນທອງ ພົງສະຫວັນ ເປັນຮອງປະທານ ທັງເປັນຜູ້ປະຈຳການ, ທ່ານ ພົນຈັດຕະວາ ສີວັນທາ ເພຍສະຂາ ເປັນຮອງປະທານ, ທ່ານ ບຸນເຮືອງ ສຸລິໄຊ ເປັນກຳມະການ, ທ່ານ ຄຳວຽນ ສີຫານາດ ເປັນກຳມະການ, ທ່ານ ພັນເອກ ມີສຸກ ຂັນທະຍົງທອງ ເປັນກຳມະການ, ທ່ານພັນເອກ ບົວລອຍ ດວງລາວົງ ເປັນກຳມະການ, ທ່ານພັນເອກ ໂພໄຊ ອຸດົມສຸກ ເປັນກຳມະການ. 

 ໂອກາດນີ້, ທ່ານ ພົນໂທ ສາຍໃຈ ກົມມະສິດ ໄດ້ເນັ້ນໜັກໃຫ້ຄະນະທີ່ຖືກແຕ່ງຕັ້ງ ປະຕິບັດຕາມສິດໜ້າທີ່ ທີ່ໄດ້ຮັບມອບໝາຍ ແລະ ສືບຕໍ່ຊີ້ນໍາການລົງກໍ່ສ້າງຮາກຖານການເມືອງ ສະກັດກັ້ນການລັກລອບຊື້-ຂາຍຢາເສບຕິດ, ການລັກລອບຂຸດຄົ້ນແຮ່ຄຳ, ການຈັບຈອງທີ່ດິນຊະຊາຍ, ສຶກສາອົບຮົມການເມືອງແນວຄິດໃຫ້ມີຈິດໃຈຮັກຊາດ, ຮັກສາໄດ້ຄວາມສະຫງົບທົ່ວປວງຊົນ, ກຳໄດ້ສະພາບ ແລະ ຄຸ້ມຄອງຄົນຕ່າງປະເທດເຂົ້າ-ອອກແຂວງ, ເມືອງ, ແບ່ງຄວາມຮັບຜິດຊອບ, ປະສານວຽກງານໃຫ້ວ່ອງ ໄວ, ແກ້ໄຂບັນຫາຢ່າງເດັດຂາດ ທັນການ ແລະ ແກ້ໄຂຄວາມທຸກຍາກຂອງປະຊາຊົນໃຫ້ດີຂຶ້ນເທື່ອລະກ້າວ. ຂ່າວ: ບຸນມີ ແສງທຸມມີ