ທ່ານນາງ ກັນທິນາ ປ້ານອິນຫວນ (ນໍ້າເບີ 17), ຜູ້ລົງສະໝັກຮັບເລືອກຕັ້ງເປັນສະມາຊິກສະພາແຫ່ງຊາດ (ສສຊ) ຊຸດທີ X ເຂດ 1 ນະຄອນຫຼວງວຽງຈັນ ໃຫ້ສໍາພາດຕໍ່ນັກຂ່າວທີ່ນະຄອນຫຼວງວຽງຈັນວ່າ: ຂ້າພະເຈົ້າມີຄວາມພາກພູມໃຈຫຼາຍທີ່ໄດ້ລົງຮັບສະໝັກເລືອກຕັ້ງໃນຄັ້ງນີ້ເພື່ອເປັນຕົວແທນໃຫ້ແກ່ຊາວນະຄອນຫຼວງວຽງຈັນ, ຂ້າພະເຈົ້າເກີດ ປີ 1982 ທີ່ແຂວງຫຼວງນ້ຳທາ, ປັດຈຸບັນຢູ່ບ້ານຮ່ອງແກ ເມືອງໄຊເສດຖາ ນະຄອນຫຼວງວຽງຈັນ, ລະດັບການສຶກສາຈົບປະລິນຍາຕີຄະນະອັກສອນສາດສາຂາພາສາລາວ-ວັນນະຄະດີ, ຈົບຊັ້ນສູງສາຂາການບໍລິຫານທຸລະກິດຈາກວິທະຍາໄລລາວ-ອາເມຣິກາ, ຈົບຫຼັກສູດການຄຸ້ມຄອງລັດຈາກ ສ ເກົາຫຼີ.
ການເຄື່ອນໄຫວວຽກງານໃນໄລຍະທີ່ຜ່ານມາເລີ່ມເຮັດວຽກຢູ່ສະພາແຫ່ງຊາດແຕ່ປີ 2007 ເປັນຕົ້ນມາໂດຍມີລໍາດັບການເຄື່ອນໄຫວຄື: 2007 ເປັນພະນັກງານຄະນະວາລະສານຜູ້ແທນປະຊາຊົນຂອງສະພາແຫ່ງຊາດ, 2008 ໄດ້ຮັບການແຕ່ງຕັ້ງເປັນເລຂານຸການຊ່ວຍວຽກຫ້ອງການປະທານສະພາແຫ່ງຊາດຊຸດທີ VI, ຊຸດທີ VII ແລະ VIII ສືບຕໍ່ເປັນເລຂານຸການໃຫ້ແກ່ປະທານສະພາແຫ່ງຊາດ ຊຶ່ງໄດ້ເຮັດວຽກເປັນເສນາທິການຮອບດ້ານທັງວຽກງານພາຍໃນ ແລະ ຕ່າງປະເທດ, ປີ 2021 (ຊຸດທີ IX) ໄດ້ຮັບການແຕ່ງຕັ້ງເປັນຫົວໜ້າກົມຕິດຕາມກວດກາວຽກງານຍຸຕິທຳ, ຕຳແໜ່ງປັດຈຸບັນນອກຈາກເປັນຫົວໜ້າກົມແລ້ວຍັງດຳລົງຕຳແໜ່ງເປັນຮອງປະທານສະຫະພັນແມ່ຍິງຂອງສະພາແຫ່ງຊາດ.
ຜົນງານທີ່ພົ້ນເດັ່ນໃນໄລຍະການເປັນຫົວໜ້າກົມຕິດຕາມກວດກາວຽກງານຍຸຕິທຳ, ໄດ້ມີສ່ວນຮ່ວມໃນວຽກງານສຳຄັນຄື: ປັບປຸງກົດໝາຍວ່າດ້ວຍການແກ້ໄຂຄຳຮ້ອງທຸກ, ປັບປຸງການຕິດຕາມກວດກາ ແລະ ປະເມີນຜົນການຈັດຕັ້ງປະຕິບັດກົດໝາຍໃນ 4 ຂົງເຂດຍຸຕິທຳ, ເປັນກອງເລຂາໃນການປະເມີນການຈັດຕັ້ງປະຕິບັດລັດຖະທຳມະນູນປີ 2015 ແລະ ຄົ້ນຄວ້າເນື້ອໃນລັດຖະທຳມະນູນປີ 2025, ເປັນກອງເລຂາຄົ້ນຄວ້າບົດສະຫຼຸບ 40 ປີແຫ່ງການປ່ຽນແປງໃໝ່ຂອງອົງການນິຕິບັນຍັດ, ຊ່ວຍວຽກຄະນະສະມາຊິກສະພາແຫ່ງຊາດເພດຍິງໃນການຝຶກອົບຮົມ ແລະ ກະກຽມຄວາມພ້ອມໃຫ້ແກ່ຜູ້ສະໝັກ ສສຊ ແລະ ສສຂ ທີ່ເປັນເພດຍິງເພື່ອໃຫ້ບັນລຸຄາດໝາຍ 30% ຕາມການຊີ້ນຳຂອງພັກ-ລັດ.
ການລົງສະໝັກຄັ້ງນີ້ທ່ານນາງ ກັນທິນາ ປ້ານອິນຫວນ ໄດ້ໃຫ້ຄຳໝັ້ນສັນຍາວ່າຖ້າໄດ້ຮັບຄວາມໄວ້ວາງໃຈຈາກພໍ່ແມ່ປະຊາຊົນຈະນຳໃຊ້ຄວາມຮູ້, ຄວາມສາມາດເພື່ອເປັນຕົວແທນໃຫ້ແກ່ປະຊາຊົນຊາວນະຄອນຫຼວງວຽງຈັນ, ເວົ້າລວມ, ເວົ້າສະເພາະກໍແມ່ນການເປັນຕົວແທນໃຫ້ເພດຍິງປະຕິບັດໜ້າທີ່ໃນເວທີການເມືອງເພື່ອພິຈາລະນາບັນຫາສຳຄັນຂອງ ນວ ກໍຄືບັນຫາສໍາຄັນຂອງຊາດໃນກອງປະຊຸມສະພາປະຊາຊົນ ນວ ກໍຄືກອງປະຊຸມສະພາແຫ່ງຊາດ.
ໂອກາດດັ່ງກ່າວ, ຫວັງຢ່າງຍິ່ງວ່າໃນວັນທີ 22 ກຸມພາທີ່ຈະມາເຖິງນີ້ ບັນດາທ່ານຈະນໍາໃຊ້ສິດຂອງຕົນຢ່າງເຕັມສ່ວນໃນການຄົ້ນຄວ້າພິຈາລະນາເລືອກເອົາບັນດາຜູ້ແທນທີ່ຕົນເຫັນວ່າເໝາະສົມທີ່ຈະເປັນຕົວແທນເຂົ້າໄປນັ່ງໃນສະພາແຫ່ງຊາດ ແລະ ຍັງໄດ້ແນະນໍາວິທີການເລືອກ: "ການເລືອກແມ່ນການຈົ່ງຊື່ໄວ້" (ໃນຈຳນວນຜູ້ສະໝັກ 25 ທ່ານ, ໃຫ້ຈົ່ງຊື່ໄວ້ 19 ທ່ານ ແລະ ຂີດຂ້າອອກ 6 ທ່ານ).
ຄໍາເຫັນ