 |
ສະຫາຍ ພັນໂທ ບົວລອຍ ດວງມະນີ ຮອງເລຂາຄະນະພັກຮາກຖານ ຫົວໜ້າການທະຫານ ໄດ້ຂຶ້ນຜ່ານບົດສະຫຼຸບວຽກງານຮອບດ້ານ ໂດຍຍົກໃຫ້ເຫັນຜົນງານດ້ານດີ, ຈຸດອ່ອນ, ຂໍ້ຄົງຄ້າງ ແລະ ບົດ ຮຽນທີ່ຖອດຖອນໄດ້ຕະຫຼອດໄລຍະ 6 ເດືອນຜ່ານມາ, ໂດຍສະເພາະການກໍາແໜ້ນບັນດາມະຕິ, ຄໍາສັ່ງ, ຂໍ້ກໍານົດກົດລະບຽບຕ່າງໆ ຂອງພັກ-ຂອງກອງທັບ ແລະ ການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ທີ່ຄະນະພັກກະຊວງປ້ອງກັນປະເທດວາງອອກ ເຂົ້າສູ່ໜ້າທີ່ວຽກງານຕົວຈິງ. ຈາກນັ້ນ, ຄະນະພັກ-ຄະນະບັນຊາ ກອງບັນຊາການ ກໍໄດ້ຜັດປ່ຽນກັນປະກອບຄໍາເຫັນຢ່າງກົງໄປກົງມາ ເພື່ອຊອກຫາວິທີການແກ້ໄຂບັນຫາທີ່ຍັງຄົງຄ້າງໃຫ້ໝົດໄປ.
 |
ໃນພິທີໄດ້ປະດັບຫຼຽນກາ ແລະ ມອບໃບຍ້ອງຍໍຜົນງານ 5 ປີໃຫ້ນາຍ ແລະ ພົນທະຫານ ທີ່ມີຜົນງານດີເດັ່ນ ໃນນີ້, ມີຜູ້ທີ່ໄດ້ຮັບຫຼຽນໄຊແຮງງານຊັ້ນ II ຈໍານວນ 1 ສະຫາຍ, ຊັ້ນ III ຈໍານວນ 9 ສະຫາຍ, ຫຼຽນກາແຮງງານ 19 ສະຫາຍ ແລະ ໃບຍ້ອງຍໍລັດຖະບານ 19 ສະຫາຍຢ່າງສົມກຽດ. ພ້ອມດຽວກັນນັ້ນ, ພ້ອມທັງຜ່ານຂໍ້ຕົກລົງ ວ່າດ້ວຍການປະດັບທຽບຊັ້ນໃຫ້ນາຍທະຫານ (ທຽບຊັ້ນຮ້ອຍຕີ 1 ສະຫາຍ, ຮ້ອຍໂທ 2 ສະຫາຍ) ແລະ ຂໍ້ຕົກລົງວ່າດ້ວຍການເລື່ອນຊັ້ນໃຫ້ນາຍທະຫານ (ເລື່ອນຊັ້ນ ວາທີ ຂຶ້ນ ຮ້ອຍຕີ 1 ສະຫາຍ).
 |
ຕອນທ້າຍພິທີ, ສະຫາຍ ຄໍາປຸ່ນ ນວນສະບັບ ໄດ້ມີຄຳເຫັນເນັ້ນໜັກໃຫ້ຄະນະພັກ-ຄະນະບັນຊາ ແລະ ພະນັກງານ-ນັກຮົບທົ່ວກອງບັນຊາການ ເອົາໃຈໃສ່ສຶກສາອົບຮົມການເມືອງແນວຄິດໃຫ້ເລິກເຊິ່ງ, ປັບປຸງແບບແຜນວິທີເຮັດວຽກໃຫ້ສອດຄ່ອງ ແລະ ທັນກັບສະພາບການ, ຕິດຕາມກໍາແໜ້ນສະພາບການປະກົດການຫຍໍ້ທໍ້ຕ່າງໆ ທີ່ອາດຈະເກີດຂຶ້ນຢ່າງຮອບດ້ານ ເພື່ອຮັບປະກັນໃຫ້ຂອບເຂດທີ່ຕົນຮັບຜິດຊອບມີຄວາມສະຫງົບ 100%, ເຂັ້ມງວດໃນລະບົບປະຈໍາການ 3 ຂັ້ນ ແລະ ພ້ອມກັນສູ້ຊົນເຮັດສຳເລັດໜ້າທີ່ການເມືອງ ທີ່ພັກ-ລັດ ແລະ ປະຊາຊົນມອບໝາຍໃຫ້ຢ່າງສົມເກດ. ພາບ-ຂ່າວ: ບຸນບອມ ສຸກມີໄຊ
ຄໍາເຫັນ