 |
ຈາກນັ້ນ, ຄະນະໄດ້ລົງຢ້ຽມຢາມພື້ນທີ່ຖືກຜົນກະທົບຈາກໄພພິບັດນ້ຳຖ້ວມທີ່ບ້ານບໍ່, ບ້ານແຟນ ແລະ ບ້ານຫົວນ້ຳບາກ ຊຶ່ງເປັນບ້ານຖືກນ້ຳຊຸ ນ້ຳພັດ ເນື້ອທີ່ການຜະລິດ, ເຮືອນຊານ, ພາຫະນະ, ຊັບສິນຕ່າງໆຂອງປະຊາຊົນ ເສຍຫາຍເປັນຈໍານວນຫຼາຍ. ຕ່ໍເຫດການດັ່ງກ່າວ, ທ່ານ ລັດຖະມົນຕີ ໄດ້ເນັ້ນໃຫ້ພາກສ່ວນທີ່ກ່ຽວຂ້ອງ ເອົາໃຈໃສ່ເກັບກຳຂໍ້ມູນໂຕເລກຜົນເສຍຫາຍ ໃຫ້ລະອຽດ ພ້ອມທັງໃຫ້ ພະແນກກະສິກຳ ແລະ ສິ່ງແວດລ້ອມແຂວງອຸດົມໄຊ ປະສານກັບບັນດາກົມທີ່ກ່ຽວຂ້ອງ ແລະ ຂະແໜງການຕ່າງໆຂອງແຂວງ ເລັ່ງຟື້ນຟູໃຫ້ປະຊາຊົນໃນເຂດດັ່ງກ່າວ.
ຫຼັງຈາກນັ້ນ, ໃນວັນທີ 15 ກັນຍາ ທີ່ຫ້ອງການວ່າການແຂວງອຸດົມໄຊ ທ່ານ ລິນຄຳ ດວງສະຫວັນ ພ້ອມດ້ວຍຄະນະ ໄດ້ພົບປະກັບ ທ່ານ ບຸນຄົງ ຫຼ້າຈຽມພອນ ກຳມະການສູນກາງພັກ ເລຂາຄະນະພັກແຂວງ ປະທານປະຊາຊົນແຂວງອຸດົມໄຊ. ໃນໂອກາດດັ່ງກ່າວ ທ່ານ ລິນຄຳ ດວງສະຫວັນ ໄດ້ສະແດງຄວາມຂອບໃຈ ສຳລັບການຕ້ອນຮັບທີ່ອົບອຸ່ນ ທີ່ອຳນວຍຄວາມສະດວກດ້ານຕ່າງໆ ໃນການລົງຢ້ຽມຢາມພື້ນທີ່ດັ່ງກ່າວ.
ເພື່ອບັນດາເທົາທຸກຂອງປະຊາຊົນ ທີ່ປະສົບໄພນ້ຳຖ້ວມ ທ່ານລັດຖະມົນຕີກໍໄດ້ຖືໂອກາດນີ້ ມອບລົດສູບນ້ຳ, ແນວພັນພືດ, ເຂົ້າສານ, ເຄື່ອງໃຊ້ຫ້ອງການ ແລະ ເຄື່ອງອຸປະໂພກ-ບໍລິໂພກຕ່າງໆ ໃຫ້ແຂວງອຸດົມໄຊ ເພື່ອນໍາໄປມອບໃຫ້ປະຊາຊົນຜູ້ທີ່ປະສົບໄພພິບັດ, ໃຫ້ກຽດຮັບໂດຍ ທ່ານ ບຸນຄົງ ຫຼ້າຈຽມພອນ ລວມມູນຄ່າທັງໝົດ 1 ຕື້ 855 ລ້ານກີບ ແລະ ມອບໃຫ້ ແຂວງຫຼວງນໍ້າທາ ໃຫ້ກຽດຮັບໂດຍ ທ່ານ ອ່ອນຈັນ ຄໍາພາວົງ ຮອງເລຂາຄະນະພັກ ຫົວໜ້າຄະນະຈັດຕັ້ງແຂວງຫຼວງນ້ຳທາ ລວມມູນຄ່າທັງໝົດ 580 ລ້ານກີບ. ເຄື່ອງທັງໝົດນີ້ຈະນຳໄປແຈກຢາຍໃຫ້ພໍ່ແມ່ປະຊາຊົນທີ່ປະສົບໄພນ້ຳຖ້ວມ ພ້ອມນຳໃຊ້ເຂົ້າໃນວຽກງານຂອງລັດຕໍ່ໄປ.
ເວລາຕໍ່ມາ ທາງຄະນະຈາກກະຊວງກະສິກໍາ ແລະ ສິ່ງແວດລ້ອມ ໄດ້ເດີນທາງ ໄປມອບເຄື່ອງປະເພດອາຫານແຫ້ງ, ຄອມພິວເຕີ ແລະ ເງິນສົດ ໃຫ້ເມືອງຫຼາ ຕາງໜ້າຮັບໂດຍ ທ່ານ ນິດ ໂພທິວັນ ປະທານຄະນະກຳມະການປົກຄອງ ເມືອງຫຼາ ລວມເປັນມູນຄ່າທັງໝົດ 59 ລ້ານກີບ. ຫຼັງຈາກນັ້ນ, ກໍໄດ້ເດີນທາງໄປເບິ່ງພື້ນທີ່ນາ, ສວນຜັກ ທີ່ຖືກນ້ຳຖ້ວມ ຂອງປະຊາຊົນ ທີ່ບ້ານວຽງສາ ເມືອງໄຊ ແຂວງອຸດົມໄຊ ຕື່ມອີກ.
(ແຫຼ່ງຂ່າວ: ຂ່າວສານກະສິກຳ ແລະ ສິ່ງແວດລ້ອມ)
ຄໍາເຫັນ