ທ່ານ ນາງ ສູນ​ທອນ ໂຊ​ຍະ​ຈັກ ຢ້ຽມຢາມ ແລະ ເຮັດວຽກຢູ່ແຂວງເຊກອງ

ທ່ານ ບຸນຫລາຍ ບຸດທິ ໄດ້ລາຍງານສະພາບການພັດທະນາຂອງແຂວງໃຫ້ຮູ້ວ່າ: ໃນໄລຍະຜ່ານມາ ໄດ້ນໍາພາ-ຊີ້ນໍາຄະນະພັກທຸກຂັ້ນຈັດຕັ້ງເຜີຍແຜ່ເຊື່ອມຊຶມຜັນຂະຫຍາຍ ມະຕິ, ຄໍາສັ່ງ ຂອງພັກ ປາຖະກະຖາມູນເຊື້ອວັນສໍາຄັນ ຂອງພັກ, ຂອງຊາດ ແລະ ສາກົນ ເປັນປົກກະຕິຕໍ່ເນື່ອງ, ຄະນະພັກແຕ່ລະຂັ້ນຖືສໍາຄັນ ແລະ ເອົາໃຈໃສ່ໃນການໂຄສະນາ, ສຶກສາອົບຮົມທາງດ້ານແນວຄິດ-ການເມືອງ, ເຜີຍແຜ່ແນວທາງນະໂຍບາຍຂອງພັກ, ກົດໝາຍ ຂອງລັດ ແລະ ເອກະສານຕ່າງໆ ໄດ້ຢ່າງກວ້າງຂວາງ ຊຶ່ງເຮັດໃຫ້ສະມາຊິກພັກ, ພະນັກງານ ມີຄວາມຮັບຮູ້, ເຂົ້າໃຈ ແລະ ມີທັດສະນະຫຼັກໝັ້ນຄຸນທາດການເມືອງຢ່າງໜັກແໜ້ນ, ສຸມໃສ່ການປັບປຸງລະບົບການເມືອງຢູ່ຂັ້ນຮາກຖານ ໃຫ້ມີຄວາມໜັກແໜ້ນ ເຂັ້ມແຂງ ທາງດ້ານການເມືອງ-ແນວຄິດ ແລະ ການຈັດຕັ້ງ, ສາມາດເປັນເຈົ້າການໃນການນໍາພາປະຊາຊົນ ແລະ ຊັ້ນຄົນຕ່າງໆ ໃນທ້ອງຖິ່ນຮາກຖານ ໄດ້ເປັນຢ່າງດີ, ເຮັດໃຫ້ຮາກຖານຊົນນະບົດ ມີຄວາມສະຫງົບ, ເສດຖະກິດຂອງແຂວງ ສືບຕໍ່ຂະຫຍາຍຕົວ, ລວມຍອດຜະລິດຕະພັນພາຍໃນຄາດຄະເນວ່າຈະບັນລຸໄດ້ 6% ຂຶ້ນໄປ, ການເກັບລາຍຮັບເຂົ້າງົບປະມານໄດ້ທັງໝົດ 334.408 ຕື້ກີບ, ເທົ່າກັບ 39.67%, ໄດ້ເອົາໃຈໃສ່ຊີ້ນໍາ-ນໍາພາແກ້ໄຂບັນຫາການຮຽນ-ການສອນແບບໃໝ່ ທີ່ຮັບປະກັນຫຼັກມູນການສຶກສາ ແລະ ແກ້ໄຂບັນຫາການປະລະການຮຽນ ຂອງເດັກໃນເກນອາຍຸເຂົ້າຮຽນຊັ້ນຕ່າງໆ ຢ່າງເປັນເຈົ້າການ, ການປະຕິບັດເປົ້າໝາຍການພັດທະນາແບບຍືນຍົງ (SDG) ໃນຂົງເຂດນີ້ ສາມາດບັນລຸໄດ້ຫຼາຍຕົວຊີ້ວັດ, ສາມາດແກ້ໄຂ ແລະ ຕົກລົງຄູອາສາຈໍານວນ 71 ທ່ານ ເຂົ້າຕາມໂກຕ້າ ຂອງກະຊວງປ້ອງກັນປະເທດ ເຂົ້າເປັນພະນັກງານຄູ ທີ່ສອນຕາມບ້ານຕ່າງໆ ໃນແຕ່ລະເມືອງ; ອົງການປົກຄອງຂັ້ນຕາແສງໄດ້ຮັບການສ້າງຕັ້ງ ແລະ ປະກາດຢ່າງເປັນທາງການ ຈໍານວນ 13 ຕາແສງ ຂອງ 4 ເມືອງ, ພ້ອມນີ້ ຂົງເຂດວຽກງານອື່ນໆ ກໍໄດ້ໄດ້ຮັບການພັດທະນາຂຶ້ນເທື່ລະກ້າວ.

ໂອກາດນີ້, ທ່ານ ນາງ ສູນທອນ ໄຊຍະຈັກ ໄດ້ໃຫ້ກຽດໂອ້ລົມ ໃຫ້ທິດຊີ້ນໍາຫຼາຍບັນຫາສໍາຄັນ ເຊິ່ງພາຍໃຕ້ການຊີ້ນໍາ-ນໍາພາຂອງຄະນະພັກແຂວງ, ການນໍາແຂວງ, ການຈັດຕັ້ງເຜີຍແຜ່ເຊືອມຊຶມເອກະສານສໍາຄັນຂອງພັກທີ່ວາງອອກ ໃນແຕ່ລະໄລຍະ ເປັນຕົ້ນ ແມ່ນມະຕິ ຂອງກອງປະຊຸມໃຫຍ່ຄັ້ງທີ XII ຂອງພັກ, ໂຄງການການເມືອງ ສະບັບທີ 3 ຂອງພັກ, ບົດລາຍງານການເມືອງ, ກົດລະບຽບຂອງພັກ ສະໄໝທີ XII, ແຜນພັດທະນາເສດຖະກິດ-ສັງຄົມ 5 ປີ (2026-2030) ຄັ້ງທີ X ແລະ ບັນດາເອກະສານທີ່ກ່ຽວຂ້ອງຂອງແຂວງ ຈະສາມາດຈັດຕັ້ງປະຕິບັດໄດ້ຢ່າງມີປະສິດທິຜົນ ແລະ ເປັນຮູບປະທຳ, ພ້ອມທັງສະເໜີໃຫ້ຄະນະພັກແຂວງ, ຄະນະພັກເມືອງ, ຕາແສງ ອາດນໍາໃຊ້ສື່ປະເພດຕ່າງໆ ເປັນອີກຮູບການໜຶ່ງໃນການຈັດຕັ້ງເຜີຍແຜ່, ເຊື່ອມຊຶມ ບັນດາເນື້ອໃນຕົ້ນຕໍຂອງກອງປະຊຸມໃຫຍ່ ຄັ້ງທີ XII ຂອງພັກ ກໍຄືບັນດາມະຕິຂອງກອງປະຊຸມຂອງອົງຄະນະພັກຂອງຕົນແຕ່ລະຂັ້ນ, ຕິດພັນກັບການນໍາສະເໜີຜົນງານ, ຕົວແບບ ກໍຄືບຸກຄົນດີເດັ່ນ ໃນແຕ່ລະຂົງເຂດວຽກງານຢ່າງຕໍ່ເນື່ອງ ເພື່ອປຸກລະດົມຂະບວນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ XII ຂອງພັກ ໃຫ້ຟົດຟື້ນ, ແຂງແຮງ ແລະ ໄດ້ຮັບຜົນສໍາເລັດຕາມຄາດໝາຍທີ່ວາງອອກ, ຕໍ່ກັບສະພາບຄວາມຫຍຸ້ງຍາກດ້ານເສດຖະກິດ-ການເງິນ ທີ່ແກ່ຍາວມາເປັນເວລາຫຼາຍປີ, ຄະນະພັກ, ຄະນະນໍາ ຕ້ອງໄດ້ເພີ່ມທະວີການສຶກສາອົບຮົມການເມືອງ-ແນວຄິດໃຫ້ແກ່ພະນັກງານ-ລັດຖະກອນ ທີ່ຢູ່ໃນກົງຈັກການຈັດຕັ້ງຂອງຕົນ ໃຫ້ມີຄວາມອຸ່ນອຽງທຸນທ່ຽງ, ມີຄວາມອົດທົນ, ຕັ້ງໜ້າປະຕິບັດໜ້າທີ່ວຽກງານ, ພ້ອມກັນສູ້ຊົນຜ່ານຜ່າອຸປະສັກ, ຄວາມຫຍຸ້ງຍາກໃນໄລຍະນີ້ ເພື່ອໃຫ້ຜ່ານຜ່າຂໍ້ຫຍຸ້ງຍາກ ແລະ ສິ່ງທ້າທາຍດັ່ງກ່າວ, ພ້ອມກັນຮ່ວມແຮງຮ່ວມໃຈກັນແກ້ໄຂໃຫ້ຊີວິດການເປັນຢູ່ ໃຫ້ໄດ້ຮັບການປັບປຸງດີຂຶ້ນເທື່ອລະກ້າວ, ເອົາໃຈໃສ່ສ້າງເສດຖະກິດເອກະລາດ ເປັນເຈົ້າຕົນເອງ (ສອຈ) ໃຫ້ເປັນຮູບປະທຳເທື່ອລະກ້າວ, ຕິດພັນກັບການສ້າງພື້ນຖານອັນໜັກແໜ້ນ ໃຫ້ແກ່ການປະຕິບັດບັນດາຄາດໝາຍສູ້ຊົນທີ່ສູນກາງ, ແຂວງ ວາງອອກ ໃຫ້ບັນລຸຜົນສໍາເລັດ.

ຂ່າວ : ພຸດທະສອນ