ທ່ານ ສະເຫຼີມໄຊ ກົມມະສິດ ຕ້ອນຮັບທູດ ຕີມໍ-ເລສເຕ ອຳລາ

ໃນວັນທີ 27 ທັນວາ ນີ້ ທີ່ ນະຄອນຫຼວງວຽງຈັນ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມອຳລາຂອງ ທ່ານ ນາງ ມາເຣຍ ເຣນາຕ້າ ຄາດັດ ດີ ເຈຊຸດ (Maria Renata Caldes De Jesus), ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ, ໃນໂອກາດທີ່ທ່ານ ໄດ້ສໍາເລັດການປະຕິບັດຫນ້າທີ່ການທູດ ຢູ່ ສປປ ລາວ ເປັນໄລຍະເວລາ 3 ປີ 6 ເດືອນ (26 ມິຖຸນາ 2020 – 26 ທັນວາ 2023).
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ ທ່ານ ນາງ ມາເຣຍ ເຣນາຕ້າ ຄາດັດ ດີ ເຈຊຸດ ທີ່ໄດ້ປະຕິບັດຫນ້າທີ່ດ້ວຍຄວາມຫ້າວຫັນ ແລະ ສຸມທຸກກໍາລັງແຮງຂອງຕົນເຂົ້າໃນການຊຸກຍູ້ສົ່ງເສີມສາຍພົວພັນມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ຕີມໍ-ເລສເຕ ຕະຫຼອດໄລຍະການປະຕິບັດໜ້າທີ່ການທູດ ຢູ່ ສປປ ລາວ, ເຊິ່ງຄະນະຜູ້ແທນຂັ້ນສູງຂອງສອງປະເທດ ໄດ້ມີການພົບປະແລກປ່ຽນເຊິ່ງກັນ ແລະ ກັນ ເປັນແຕ່ລະໄລຍະ ແລະ ສໍາເລັດຜົນຕາມຄາດໝາຍ. ສອງຝ່າຍ ຍັງໄດ້ເຫັນດີເປັນເອກະພາບໃນການສືບຕໍ່ຊຸກຍູ້ສົ່ງເສີມຂະແໜງການກ່ຽວຂ້ອງຂອງສອງປະເທດ ເສີມຂະຫຍາຍການຮ່ວມມືໃນຂະແໜງການທີ່ສອງຝ່າຍທີ່ມີທ່າແຮງຮ່ວມກັນ ເປັນຕົ້ນແມ່ນ ການຊຸກຍູ້ສົ່ງເສີມການຈັດຕັ້ງປະຕິບັດບັນດາຂໍ້ຕົກລົງທີ່ສອງຝ່າຍໄດ້ເຫັນດີຮ່ວມກັນໃນໄລຍະຜ່ານມາໃຫ້ມີບາດກ້າວຂະຫຍາຍຕົວ ແລະ ປະກົດຜົນເປັນຈິງເທື່ອລະກ້າວ, ໂດຍສະເພາະ ການຮ່ວມມືດ້ານເສດຖະກິດ-ການຄ້າ, ການລົງທຶນ ແລະ ການສົ່ງເສີມການໄປມາຫາສູ່ຂອງປະຊາຊົນສອງຊາດ, ລວມທັງການຊຸກຍູ້ສົ່ງເສີມການຢ້ຽມຢາມເຊິ່ງກັນ ແລະ ກັນ ຂອງ ການນໍາຂັ້ນສູງຂອງສອງປະເທດ ລາວ ແລະ ຕີມໍ-ເລສເຕ ໃນອະນາຄົດອັນໃກ້ນີ້. 
ໃນໂອກາດດຽວກັນ, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈມາຍັງລັດຖະບານ ແລະ ປະຊາຊົນ ຕີມໍ-ເລສເຕ ທີ່ໄດ້ໃຫ້ການຮ່ວມມື ແລະ ຊ່ວຍເຫຼຶືອ ສປປ ລາວ ໃນໄລຍະຜ່ານມາ ແລະ ຢືນຢັນການສະໜັບສະໜູນ ສປປ ລາວ ສໍາລັບການເປັນປະທານອາຊຽນ 2024 ແລະ ການຈັດປີທ່ອງທ່ຽວລາວ 2024. ສອງຝ່າຍ ຍັງໄດ້ເຫັນດີເປັນເອກະພາບໃນການສືບຕໍ່ປະສານສົມທົບ ແລະ ເຮັດວຽກຮ່ວມກັນຢ່າງໃກ້ຊິດ ໃນຂອບການຮ່ວມມືອາຊຽນ ເພື່ອສັນຕິພາບ, ການຮ່ວມມື ແລະ ການພັດທະນາໃນຂົງເຂດພາກພື້ນ ແລະ ສາກົນ, ໂດຍສະເພາະ ການສະໜັບສະໜູນ ຕີມໍ-ເລສເຕ ເຂົ້າເປັນສະມາຊິກອາຊຽນ, ລວມທັງການແລກປ່ຽນບົດຮຽນ ແລະ ປະສົບການຂອງ ສປປ ລາວ ໃຫ້ແກ່ ຝ່າຍ ຕີມໍ-ເລສເຕ ໃນການເຂົ້າເປັນສະມາຊິກອາຊຽນ ແລະ ກ້າວໄປສູ່ການເປັນສະມາຊິກຂອງຄອບຄົວອາຊຽນຢ່າງສົມບູນ. ທ່ານ ສະເຫຼີມໄຊ ກົມມະສິດ ຍັງໄດ້ອວຍພອນໃຫ້ ທ່ານ ນາງ ມາເຣຍ ເຣນາຕ້າ ຄາດັດ ດີ ເຈຊຸດ ເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສໍາເລັດໃນການປະຕິບັດຫນ້າທີ່ໃໝ່ຂອງຕົນໃນຕໍ່ໜ້າ. 
ໃນຂະນະດຽວກັນ, ທ່ານ ນາງ ມາເຣຍ ເຣນາຕ້າ ຄາດັດ ດີ ເຈຊຸດ ໄດ້ຢືນຢັນຄໍາໝາຍໝັ້ນຂອງຕົນໃນການສືບຕໍ່ຊຸກຍູ້ສົ່ງເສີມການພົວພັນ ແລະ ການຮ່ວມມືສອງຝ່າຍ ຕີມໍ-ເລສເຕ ແລະ ສປປ ລາວ ໃຫ້ມີບາດກ້າວຂະຫຍາຍຕົວຍິ່ງຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດ ຕີມໍ-ເລສເຕ ແລະ ລາວ ໃນຕໍ່ໜ້າ. 
ຂ່າວ-ພາບ: ກະຊວງການຕ່າງປະເທດ