ຈັດໂດຍ ສະຖາບັນຍຸດທະສາດອາຊີ-ປາຊີຟິກ (Kingsley Strategic Institute for Asia Pacific), ສະໂມສອນເສດຖະກິດອາຊຽນ ຮ່ວມກັບສະພາການຄ້າ ແລະ ອຸດສາຫະກໍາແຫ່ງຊາດລາວ, ໂດຍມີການນໍາ ແລະ ຄະນະຜູ້ແທນຈາກທັງພາກລັດ ແລະ ພາກທຸລະກິດ ຂອງບັນດາປະເທດສະມາຊິກອາຊຽນ ກໍຄືສະມາຊິກສະພາທຸລະກິດອາຊຽນ ເຂົ້າຮ່ວມ.
ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ກ່າວສະແດງຄວາມຊົມເຊີຍ ການຈັດກອງປະຊຸມເວທີປຶກສາຫາລືການເປັນຜູ້ນໍາ ແລະ ຄູ່ຮ່ວມມືອາຊຽນ ປະຈໍາປີ 2024 ພາຍໃຕ້ຫົວຂໍ້ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ: ທິດທາງໃນຕໍ່ໜ້າ (Enhancing Connectivity and Resilience: The Way Forward) ຢູ່ ສປປ ລາວ ໃນຄັ້ງນີ້ ຊຶ່ງເປັນການສະໜັບສະໜູນການເປັນປະທານອາຊຽນຂອງ ສປປ ລາວ ໃນປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”. ພ້ອມນີ້, ທ່ານຮອງນາຍົກລັດຖະມົນຕີ ຍັງໄດ້ຕີລາຄາສູງຕໍ່ການປະກອບສ່ວນຂອງສະຖາບັນຍຸດທະສາດອາຊີ-ປາຊີຟິກ ທີ່ໄດ້ສົ່ງເສີມການຮ່ວມມືດ້ານເສດຖະກິດຂອງອາຊຽນໃນຂະແໜງການຕ່າງໆເຊັ່ນ:ການຮັດແໜ້ນການເຊື່ອມໂຍງ-ເຊື່ອມຈອດ,ການອຳນວຍຄວາມສະດວກທາງການຄ້າ-ການລົງທຶນ,ການຫັນເປັນດີຈີຕອນແລະການພັດທະນາແບບຍືນຍົງ ລວມທັງການຮ່ວມມືລະຫວ່າງອາຊຽນກັບປະເທດຄູ່ເຈລະຈາອາຊຽນທັງພາກລັດ ແລະ ພາກທຸລະກິດ ແນໃສ່ເພື່ອເພີ່ມທະວີການຮ່ວມມືທາງດ້ານການຄ້າ ແລະ ການລົງທຶນ ກໍຄືສົ່ງເສີມການເຊື່ຶອມຈອດ ແລະ ຄວາມເຂັ້ມແຂງດ້ານເສດຖະກິດໃນອາຊຽນ ແລະ ລະຫວ່າງອາຊຽນກັບພາຍນອກ. ຜົນສຳເລັດຂອງການຈັດກອງປະຊຸມປຶກສາຫາລືໃນຄັ້ງນີ້ ເປັນການປະກອບສ່ວນຮັບປະກັນຜົນສຳເລັດຂອງການເປັນປະທານອາຊຽນ ຂອງ ສປປ ລາວ ໃນປີ 2024.
(ຂ່າວ: ກຕທ)
ຄໍາເຫັນ