 |
ໃນໂອກາດເຂົ້າຮ່ວມງານບຸນມະໂຫລານຄັ້ງນີ້, ສະຫາຍ ວາລະໄຊ ເລັ່ງສະຫວັດ ໄດ້ເຂົ້າຢ້ຽມພົບປະກັບສະຫາຍ ປາວໂຣ ໄຣມຸນໂດ ເລຂາທິການໃຫຍ່ຄະນະບໍລິຫານງານສູນກາງພັກກອມມູນິດປອກຕຸຍການ ແລະ ໄດ້ຕາງໜ້າໃຫ້ແກ່ພັກປະຊາຊົນ ປະຕິວັດລາວ ລົງນາມໃນບົດບັນທຶກຄວາມເຂົ້າໃຈ ວ່າດ້ວຍການຮ່ວມມື ລະຫວ່າງ ພັກປະຊາຊົນ ປະຕິວັດລາວ ແລະ ພັກກອມມູນິດປອກຕຸຍການ ຊຶ່ງຕາງໜ້າພັກກອມມູນິດປອກຕຸຍການ ລົງນາມໂດຍ ສະຫາຍ ເປໂດຣ ເກຍໄຣໂຣ ຄະນະເລຂາທິການສູນກາງພັກ ຫົວໜ້າຄະນະພົວພັນຕ່າງປະເທດສູນກາງພັກກອມມູນິດປອກຕຸຍການ, ເພື່ອກໍານົດທິດທາງໃນການຮັດແໜ້ນ ແລະ ເສີມຂະຫຍາຍການພົວພັນຮ່ວມມືລະຫວ່າງສອງພັກໃນຕໍ່ໜ້າ.
 |
ໃນໂອກາດການພົບປະສອງຝ່າຍ, ສະຫາຍ ວາລະໄຊ ເລັ່ງສະຫວັດ ໄດ້ສະແດງຄວາມຂອບໃຈເປັນຢ່າງສູງຕໍ່ການຕ້ອນຮັບຢ່າງອົບອຸ່ນ; ໄດ້ຕີລາຄາການພົວພັນຮ່ວມມື ລະຫວ່າງ ສອງພັກ; ໄດ້ແລກປ່ຽນບາງບົດຮຽນກ່ຽວກັບສະພາບການເຄື່ອນໄຫວຂອງພັກ ແລະ ວຽກງານກໍ່ສ້າງພັກ, ພ້ອມທັງບັນຫາທີ່ສອງຝ່າຍໃຫ້ຄວາມສົນໃຈ. ສະຫາຍ ປາວໂລ ໄດ້ສະແດງຄວາມຂອບໃຈຢ່າງສຸດຊຶ້ງ ຕໍ່ການເດີນທາງມາຮ່ວມງານມະໂຫລານ ອາວັງເຕ ໃນຄັ້ງນີ້ ຂອງຄະນະຜູ້ແທນພັກ ປປ ລາວ ຊຶ່ງເປັນການຢັ້ງຢືນໃຫ້ເຫັນເຖິງການສະໜັບສະໜູນຊຶ່ງກັນ ແລະ ກັນ ແລະ ການຮັດແໜ້ນຄວາມສາມັກຄີລະຫວ່າງສອງພັກ ໃນທ່າມກາງສະພາບການພາກພື້ນ ແລະ ສາກົນ ມີຄວາມຫຍຸ້ງຍາກສັບສົນ; ໄດ້ສະແດງຄວາມຂອບໃຈເປັນຢ່າງສູງຕໍ່ການຕ້ອນຮັບທີ່ດີ ແລະ ອົບອຸ່ນ ຂອງພັກ ປປ ລາວ ຕໍ່ການຢ້ຽມຢາມ ສປປ ລາວ ຂອງຄະນະຜູ້ແທນພັກກອມມູນິດປອກຕຸຍການ ໃນປີ 2024 ຜ່ານມາ; ໄດ້ຍົກໃຫ້ເຫັນເຖິງຄວາມສົນໃຈ ແລະ ແລກປ່ຽນບົດຮຽນກ່ຽວກັບວຽກງານອົງການຈັດຕັ້ງມະຫານຊົນ ໂດຍສະເພາະວຽກງານການເຄື່ອນໄຫວຂອງອົງການຈັດຕັ້ງແມ່ຍິງ ແລະ ຊາວໜຸ່ມພາຍໃຕ້ການນໍາພາຂອງພັກ ປປ ລາວ.
 |
ໃນຂອບຂອງງານບຸນມະໂຫລານ ອາວັງເຕ ໃນຄັ້ງນີ້, ຄະນະຜູ້ແທນ ພັກ ປປ ລາວ ຍັງໄດ້ເຂົ້າຮ່ວມງານວາງສະແດງມູນເຊື້ອຂອງພັກ, ວັດທະນະທໍາ ແລະ ສິລະປະກໍານາໆຊາດ ຊຶ່ງພັກ ປປ ລາວ ກໍແມ່ນໜຶ່ງໃນບັນດາພັກການເມືອງເພື່ອນມິດ ລວມທັງພັກກອມມູນິດຈີນ, ພັກກອມູນິດຫວຽດນາມ, ກູບາ ແລະ ພັກການເມືອງອື່ນໆຫຼາຍກວ່າ 40 ພັກການເມືອງໃນທົ່ວໂລກ ທີ່ເຂົ້າຮ່ວມ ແລະ ເປີດຮ້ານວາງສະແດງຂອງຕົນຢ່າງຟົດຟື້ນ ແລະ ດຶງດູດຄວາມສົນໃຈຈາກບັນດາຜູ້ຄົນທີ່ມາທ່ຽວຊົມງານເປັນຈໍານວນຫຼວງຫຼາຍ.
ງານບຸນມະໂຫລານ ອາວັງເຕ, ເປັນງານບຸນປະເພນີປະຈໍາປີຂອງ ພັກກອມມູນິດປອກຕຸຍການຊຶ່ງຈັດຂຶ້ນໃນທຸກໆຕົ້ນເດືອນກັນຍາ ຂອງທຸກປີ ເປັນເວລາມາດົນນານ, ເປັນເວທີໃນການເຕົ້າໂຮມຄວາມສາມັກຄີ, ພົບປະ, ແລກປ່ຽນບົດຮຽນ-ປະສົບການເຄື່ອນໄຫວ ແລະ ການຮ່ວມມື ຂອງບັນດາພັກກອມມູນິດ, ພັກກໍາມະກອນ ແລະ ຂະບວນການກ້າວໜ້າຝ່າຍຊ້າຍ ຊຶ່ງ ພັກ ປປ ລາວ ໄດ້ໃຫ້ຄວາມສໍາຄັນ ໂດຍໄດ້ສົ່ງຄະນະຜູ້ແທນເຂົ້າຮ່ວມຫຼາຍຄັ້ງໃນໄລຍະຜ່ານມາ ແລະ ໃນຄັ້ງທີ 50 ນີ້, ພັກ ປປ ລາວ ໄດ້ເຂົ້າຮ່ວມເປີດຮ້ານວາງສະແດງຂອງພັກເປັນຄັ້ງທໍາອິດເພື່ອເປັນການເຜີຍແຜ່ແນວທາງນະໂຍບາຍ ແລະ ຍົກສູງບົດບາດຂອງ ພັກ ປປ ລາວ ລວມທັງເປັນການແລກປ່ຽນດ້ານວັດທະນະທໍາ ແລະ ຮີດຄອງປະເພນີຂອງຊາດລາວ ໃນເວທີສາກົນ.
(ຂ່າວ: ຄຕພ)
ຄໍາເຫັນ