 |
ທ່ານ ຈັນທະວີພອນ ເຄືອບຄຳວອນ ກ່າວວ່າ: ການຮ່ວມມືໃນຄັ້ງນີ້ ເປັນໝາກຜົນຈາກການຄົ້ນຄວ້າ ແລະ ປະສານງານຢ່າງໃກ້ຊິດລະຫວ່າງພາກລັດ ແລະ ພາກທຸລະກິດ, ເພື່ອຮ່ວມກັນສ້າງລະບົບໄປສະນີທີ່ທັນສະໄໝ, ວ່ອງໄວ, ປອດໄພ ແລະ ສາມາດເຊື່ອມໂຍງກັບລະບົບດີຈີຕອນອື່ນໆໄດ້ຢ່າງມີປະສິດທິພາບ.
ດັ່ງທີ່ພວກເຮົາຮັບຮູ້ຮ່ວມກັນວ່າ, ໂລກກຳລັງກ້າວສູ່ຍຸກດີຈີຕອນຢ່າງເຕັມຮູບແບບ. ພ້ອມກັນນັ້ນ, ການຄ້າເອເລັກໂຕຣນິກ ແລະ ການບໍລິການໂລຈິສຕິກກໍຂະຫຍາຍຕົວຢ່າງໄວວາ. ຄວາມຄາດຫວັງຂອງຜູ້ໃຊ້ບໍລິການຈຶ່ງບໍ່ແມ່ນພຽງແຕ່ການສົ່ງພັດສະດຸໃຫ້ເຖິງປາຍທາງ, ແຕ່ຕ້ອງການຄວາມວ່ອງໄວ, ຄວາມປອດໄພ, ການຕິດຕາມແບບ Real-time ແລະ ການເຊື່ອມໂຍງຂໍ້ມູນຢ່າງມີປະສິດທິພາບ. ໃນຂະນະດຽວກັນ, ການຂົນສົ່ງພັດສະດຸຂ້າມແດນຍັງມີຂໍ້ຈຳກັດດ້ານເອກະສານ, ການແລກປ່ຽນຂໍ້ມູນ, ການຕິດຕາມພັດສະດຸ ແລະ ມາດຕະຖານທີ່ຍັງບໍ່ສາມາດເຊື່ອມຈອດກັນໄດ້ຢ່າງສົມບູນ. ດັ່ງນັ້ນ, ການນຳໃຊ້ເຕັກໂນໂລຊີດີຈີຕອນເຂົ້າມາຍົກລະດັບວຽກງານໄປສະນີ ຈຶ່ງເປັນຄວາມຈຳເປັນ ແລະ ເປັນວຽກບຸລິມະສິດສຳຄັນ.
 |
ທ່ານກ່າວຕື່ມວ່າ: ສຳລັບໂຄງການຮ່ວມມືນີ້ເອີ້ນວ່າ “DigitalPostalLogisticsSystemforLaoPDR” ຫຼື DPLS, ກົມໄປສະນີ ຈະຮ່ວມມືກັບບໍລິສັດ ເທັດສະຫຍາມອິນເຕີເນເຊີນໍ ຈຳກັດ ຈາກຣາຊະອາຈັກໄທ ໃນການພັດທະນາແພລັດຟອມສຳຄັນ ປະກອບມີ E-Trading, E-TransportControl, E-PaymentGateway&E-MoneyOrder, AI&OCREngine ແລະ DigitalCertificateandIdentity, ລະບົບ DPLS ຈະເປັນກົນໄກສຳຄັນໃນການຄຸ້ມຄອງການຂົນສົ່ງ, ຕິດຕາມພາຫະນະ ແລະ ພັດສະດຸ-ສິນຄ້າ, ຮອງຮັບການແຈ້ງເອກະສານລ່ວງໜ້າແບບດີຈີຕອນ ແລະ ເຊື່ອມໂຍງກັບ Smart-Custom ເພື່ອອຳນວຍຄວາມສະດວກດ້ານພາສີ ແລະ ພັດທະນາກົນໄກການຊຳລະສະສາງແບບສູນກາງ, ສິ່ງທີ່ສຳຄັນກວ່າການນຳເຕັກໂນໂລຊີມາໃຊ້ ຄື ການນຳໃຊ້ເຕັກໂນໂລຊີນັ້ນເພື່ອສ້າງມູນຄ່າໃຫ້ແກ່ປະເທດ. ໂຄງການນີ້ຈຶ່ງມຸ່ງໝັ້ນໃຫ້ລະບົບໄປສະນີເປັນຫຼາຍກວ່າການບໍລິການຈັດສົ່ງແຈກຢາຍ ແຕ່ເປັນໂຄງສ້າງພື້ນຖານທີ່ຊ່ວຍເຊື່ອມໂຍງຜູ້ປະກອບການ, SMEs ແລະ ຕະຫຼາດສາກົນ, ພວກເຮົາຄາດຫວັງວ່າ ການພັດທະນາລະບົບດັ່ງກ່າວນີ້ຈະຊ່ວຍສ້າງເງື່ອນໄຂໃຫ້ SMEs ຂອງລາວ ສາມາດນຳສິນຄ້າອອກສູ່ຕະຫຼາດຈີນ, ຫວຽດນາມ, ໄທ ແລະ ຕະຫຼາດອື່ນໆ ຜ່ານເຄືອຂ່າຍໄປສະນີ ໄດ້ສະດວກວ່ອງໄວ ແລະ ເຊື່ອຖືໄດ້. ອັນນີ້ຈະເປັນສ່ວນໜຶ່ງໃນການສະໜັບສະໜູນແນວທາງຫັນປ່ຽນ ສປປ ລາວ ຈາກ “Land-Locked” ໄປສູ່ “Land-Linked” ຫຼື ສ້າງ ສປປ ລາວ ກາຍເປັນຈຸດເຊື່ອມໂຍງເຊື່ອມຈອດດ້ານໂລຈິສຕິກຂອງພາກພື້ນ ແລະ ສາກົນຢ່າງເປັນຮູບປະທຳ.
(ຂ່າວ-ພາບ: ສຳນານ)
ຄໍາເຫັນ