ເມື່ອບໍ່ດົນມານີ້, ທ່ານ ສອນໄຊ ສີພັນດອນ ນາຍົກລັດຖະມົນຕີ ພ້ອມດ້ວຍຄະນະ ໄດ້ເຄື່ອນໄຫວຊຸກຍູ້ການຜະລິດຂອງປະຊາຊົນ ຢູ່ເຂດຈຸດສຸມພັດທະນາທອງມີໄຊ ເມືອງວຽງທອງ ແຂວງບໍລິຄໍາໄຊ ໂດຍໃຫ້ການຕ້ອນຮັບ ແລະ ເຮັດວຽກຮ່ວມຂອງ ທ່ານ ກອງແກ້ວ ໄຊສົງຄາມ ເຈົ້າແຂວງໆບໍລິຄຳໄຊ ພ້ອມດ້ວຍການນຳຂອງແຂວງ, ເມືອງ ແລະ ການຈັດຕັ້ງບ້ານ ທີ່ກ່ຽວຂ້ອງ.
ໃນໂອກາດນີ້, ຄະນະຂອງທ່ານນາຍົກລັດຖະມົນຕີ ໄດ້ຮັບຟັງການລາຍງານຈາກ ທ່ານ ພັອ ຄຳແຜ່ນ ວີລືທຳ ເຈົ້າເມືອງວຽງທອງ ກ່ຽວກັບສະພາບລວມການພັດທະນາ ຢູ່ເຂດພັດທະນາຈຸດສຸມທອງມີໄຊ ເຫັນວ່າເຂດດັ່ງກ່າວ ຕັ້ງຢູ່ທິດເໜືອຂອງເມືອງ, ຫ່າງຈາກຕົວເມືອງ 92 ກິໂລແມັດ, ປະຈຸບັນມີ 4 ບ້ານທີ່ຂຶ້ນກັບ, ມີ 267 ຄອບຄົວ, ມີປະຊາກອນ 1.700 ຄົນ ຍິງ 841 ຄົນ, ອາຊີບຫຼັກ ແມ່ນເຮັດນາປູກເຂົ້າ, ລ້ຽງສັດ, ປູກມັນຕົ້ນ, ມັນສະຄູ ແລະ ຄ້າຂາຍ, ເຂດດັ່ງກ່າວມີບ້ານພົ້ນທຸກແລ້ວ 3 ບ້ານ, ຈໍານວນ 187 ຄອບຄົວ. ດ້ານໂຄງລ່າງພື້ນຖານ ມີໂຮງຮຽນປະຖົມ 4 ແຫ່ງ, ມັດທະຍົມຕົ້ນ 1 ແຫ່ງ, ມີຊົນລະປະທານ 4 ແຫ່ງ, ມີໂຮງງານຜະລິດແປ້ງມັນສະຄູ 1 ແຫ່ງ. ສຳລັບຂໍ້ສະເໜີ ຕໍ່ລັດຖະ ບານ ແມ່ນສະເໜີກໍ່ສ້າງປັບປຸງເສັ້ນທາງ ໃຫ້ປະຊາຊົນສາມາດທຽວໄດ້ສອງລະດູ ຊຶ່ງມີຄວາມຍາວທັງໝົດປະມານ 98 ກິໂລແມັດ; ສະເໜີຂໍງົບປະມານ ເພື່ອຈັດຊື້ອຸປະກອນລະບົບຕໍ່ນ້ຳເຂົ້ານາ ແລະ ງົບປະມານສ້ອມແປງຊົນລະປະທານ ຈໍານວນ 3 ແຫ່ງ.
ໃນໂອກາດດຽວກັນ, ທ່ານນາຍົກລັດຖະມົນຕີ ໄດ້ມີຄຳເຫັນໂອ້ລົມ ຊຶ່ງທ່ານໄດ້ເນັ້ນໜັກບາງດ້ານເປັນຕົ້ນ ໃຫ້ຄະນະພັກ-ຄະນະນຳແຂວງ ແລະ ເມືອງ ສືບຕໍ່ຍົກສູງຄວາມຮັບຜິດຊອບ ການນຳພາ-ຊີ້ນຳວຽກງານການເມືອງແນວຄິດ ສະມາຊິກພັກ-ພະນັກງານ ໃຫ້ມີຄວາມອຸ່ນອ່ຽນທຸ່ນທ່ຽງ, ມີຄວາມເຊື່ອໝັ້ນ ຕໍ່ແນວທາງນະໂຍບາຍຂອງພັກ-ລັດ, ທັງມີຄວາມຮັບຮູ້ ແລະ ເຂົ້າໃຈຢ່າງຖືກຕ້ອງ; ໃຫ້ຂະແໜງການກ່ຽວຂ້ອງຢູ່ສູນກາງ ປະສານສົມທົບກັບອົງການປົກຄອງທ້ອງຖິ່ນ ຊຸກຍູ້, ສົ່ງເສີມ ເຮັດໃຫ້ລູກຫຼານຂອງປະຊາຊົນ ສາມາດເຂົ້າເຖິງລະບົບການສຶກສາໄດ້ຢ່າງທົ່ວເຖິງ; ສືບຕໍ່ຂະຫຍາຍຕາໜ່າງການບໍລິການດ້ານສາທາລະນະສຸກ ໃຫ້ທົ່ວເຖິງແຕ່ລະບ້ານ; ຊຸກຍູ້, ສົ່ງເສີມ ແລະ ຕັ້ງໜ້າປະກອບສ່ວນເຂົ້າໃນວຽກງານປ້ອງກັນຊາດ-ປ້ອງກັນຄວາມສະຫງົບ; ເອົາໃຈໃສ່ເຕົ້າໂຮມຄວາມສາມັກຄີປອງດອງປະຊາຊົນບັນດາເຜົ່າ, ຊັ້ນຄົນ, ສາສະໜາ, ເພື່ອສ້າງຄວາມເປັນເອກະພາບຂອງປະຊາຊົນບັນດາເຜົ່າ; ສືບຕໍ່ຊຸກຍູ້, ສົ່ງເສີມການສ້າງທ່າແຮງຢູ່ແຕ່ລະທ້ອງຖິ່ນ ໂດຍສະເພາະການພັດທະນາແຫຼ່ງທ່ອງທ່ຽວທາງທຳມະຊາດ, ວັດທະນະທຳ ອັນດີງາມຂອງຊາດ ໃຫ້ຫຼາຍຂຶ້ນ ແລະ ຍືນຍົງ, ຊຸກຍູ້ສົ່ງເສີມການຜະລິດກະສິກຳສະອາດ ເພື່ອສົ່ງອອກ ລວມທັງການປັບປຸງຊີວິດການເປັນຢູ່ຂອງປະຊາຊົນ ໃຫ້ນັບມື້ດີຂຶ້ນເທື່ອລະກ້າວ. ຕໍ່ກັບບັນດາຂໍ້ສະເໜີຂອງເມືອງ ແມ່ນມອບໃຫ້ຂະແໜງການກ່ຽວຂ້ອງສູນກາງ ສົມທົບກັບແຂວງ ແລະ ເມືອງ ເພື່ອຄົ້ນຄວ້າພິຈາແກ້ໄຂຕາມສະພາບຄວາມເປັນຈິງ ແລະ ສອດຄ່ອງຕາມລະບຽບການ.
ໃນໂອກາດມາເຄື່ອນໄຫວຢ້ຽມຢາມ ແລະ ເຮັດວຽກ ໃນຄັ້ງນີ້, ທ່ານນາຍົກລັດຖະມົນຕີ ຍັງໄດ້ມອບອຸປະກອນ ແລະ ເຄື່ອງນຸ່ງຫົ່ມຈຳນວນໜຶ່ງ ໃຫ້ເຂດພັດທະນາຈຸດສຸມທອງມີໄຊ ເພື່ອປະກອບສ່ວນເຂົ້າໃນການດໍາລົງຊີວິດ ແລະ ແກ້ໄຂຊີວິດການເປັນຢູ່ຂອງປະຊາຊົນ ໃຫ້ດີຂຶ້ນ.
ຂ່າວ ແລະ ພາບ: ກົມປະຊາສຳພັນ ຫສນຍ.
ຄໍາເຫັນ