ທ່ານ ວະລາດີເມຍ ປູຕິນ ໄດ້ຮັບການເລືອກຕັ້ງເປັນປະທານາທິບໍດີ ຣັດເຊຍ ອີກໜຶ່ງສະໄໝ

ຂ່າວຕ່າງປະເທດລາຍງານ ໃນວັນທີ 15 ມີນາ ຜ່ານມາວ່າ: ກະຊວງພະລັງງານສີລັງກາ ລາຍງານວ່າ, ສີລັງກາ ໄດ້ເລີ່ມຈຳໜ່າຍນໍ້າມັນເຊື້ອໄຟໃຫ້ແກ່ຍານພາຫະນະຜ່ານລະບົບລະຫັດ QR ແລະສະຖານີນໍ້າມັນເຊື້ອໄຟຈະບໍ່ຈຳໜ່າຍນໍ້າມັນເຊື້ອໄຟໃຫ້ແກ່ຍານພາຫະນະທີ່ບໍ່ມີລະຫັດ QR. ມາດຕະການນີ້ເພື່ອຄຸ້ມຄອງຄັງສຳຮອງນໍ້າມັນເຊື້ອໄຟຂອງປະເທດ ທ່າມກາງການສະໜອງທີ່ຢຸດສະງັກຈາກສະຖານະການຄວາມຂັດແຍ່ງໃນຕາເວັນອອກກາງ.

ຂ່າວຕ່າງປະເທດລາຍງານໃນທ້າຍອາທິດຜ່ານມາວ່າ: ທ່ານ ທັດຍານາ ໂກລິໂກວາ ຮອງນາຍົກລັດຖະມົນຕີຣັດເຊຍ ໄດ້ເປີດເຜີຍວ່າ, ອັດຕາຄວາມທຸກຍາກຂອງຣັດເຊຍຫຼຸດລົງເຫຼືອ 6.7% ໃນປີ 2025, ຫຼຸດລົງ 0.4 ຈຸດ ຈາກປີກ່ອນ.

ວິທະຍຸກະຈາຍສຽງຫວຽດນາມລາຍງານວ່າ: ຫວ່າງມໍ່ໆມານີ້, ຄະນະກຳມະການເສດຖະກິດ ແລະ ສັງຄົມ ສປຊ ພາກພື້ນ ອາຊີ-ປາຊີຟິກ (ESCAP) ມີສຳນັກງານຕັ້ງຢູ່ບາງກອກ ປະເທດໄທ ໃຫ້ຮູ້ວ່າ: ສປຊ ໄດ້ຮັບຮອງເອົາຂອບສະຖິຕິທົ່ວໂລກໃໝ່ກ່ຽວກັບສະຖິຕິວິກິດການໄພທຳມະຊາດ ເພື່ອແນໃສ່ຊ່ວຍບັນດາປະເທດເຂົ້າໃຈແຈ້ງ ແລະ ຫຼຸດຜ່ອນຄວາມສ່ຽງໃນລະດັບຕ່ຳສຸດ ຂອງໄພທຳມະຊາດທີ່ນັບມື້ນັບເພີ່ມຂຶ້ນ.

ຂ່າວສານຊີອາໄອລາຍງານວ່າ: ໃນທ້າຍອາທິດຜ່ານມາ, ອາ​ຊຽນ​ໄດ້​ຈັດກອງປະຊຸມລັດຖະມົນຕີຕ່າງປະເທດສະ ໄໝພິເສດເພື່ອ​ແລກ​ປ່ຽນ​ຄວາມ​ເຫັນ​ກ່ຽວ​ກັບ​ການ​ເພີ່ມທະວີຂຶ້ນ​ຂອງ​ສະ​ຖາ​ນະ​ການ​ຢູ່​​ເຂດຕາ​ເວັນ​ອອກ​ກາງໃນ​ປັດ​ຈຸ​ບັນ ​ກໍ​ຄື ​ຜົນ​ກະ​ທົບ​ຕໍ່​ພາກ​ພື້ນ. ກອງ​ປະ​ຊຸມ​ໄດ້​ອອກ​ຖະ​ແຫຼງ​ການ​ໂດຍ​ສະ​ແດງ​ຄວາມ​ເປັນ​ຫ່ວງ​ຢ່າງ​ຍິ່ງ​ຕໍ່​ການ​ປະ​ທະ​ກັນ​ຢູ່​ພາກ​ພື້ນ​ຕາ​ເວັນ​ອອກ​ກາງ​ຮຸນ​ແຮງ​ຂຶ້ນ​ຕື່ມ, ພ້ອມ​ທັງ​ຮຽກ​ຮ້ອງ​ໃຫ້​ຝ່າຍ​ຕ່າງໆ​ທີ່​ກ່ຽວ​ຂ້ອງ​ຢຸດ​ຕິ​ການ​ເຄື່ອນ​ໄຫວ​ທີ່​ເປັນ​ປໍ​ລະ​ປັກ​ກັນ​ໃນ​ທັນ​ທີ, ແກ້​ໄຂຂໍ້​ຂັດ​ແຍ້ງ​ກັນ​ດ້ວຍ​ການ​ສົນ​ທະ​ນາ ​ແລະ ​ວິ​ທີ​ທາງ​ການ​ທູດ.

ຂ່າວສານຊີອາໄອລາຍງານ ຫວ່າງມໍ່ໆມານີ້ວ່າ: ຫ້ອງ​ການ​ຄຸ້ມ​ຄອງ​ລະ​ບົບ​ນຳ​ທາງ​ດ້ວຍດາວ​ທຽມຈີນ​ ແຈ້ງ​ໃຫ້​ຮູ້​ວ່າ, ລະ​ບົບນຳ​​ທາງດ້ວຍດາວ​ທຽມ​​ “​ເປີຍ​ໂຕວ”​ ຈະ​ໄດ້​ຮັບ​ການ​ຍົກ​ລະ​ດັບຕາມ​ວົງ​ໂຄ​ຈອນ​ໃນ​ໄວໆ​ນີ້, ໂດຍ​ຈະ​ປັບ​ປຸງ​ດາວ​ທຽມ​ບາງດວງ​ໃຫ້​ດີ​ຂຶ້ນ ເພື່ອ​ໃຫ້​ບໍ​ລິ​ການ​ທີ່​ດີ​ກວ່າ​ເກົ່າ. ໃນ​ໄລ​ຍະ​ການປັບປຸງນີ້, ​ການ​ທົດ​ສອບ​ຮ່ວມ​ກັນ ແລະ ການ​ຕິດ​ຕາມ​​ກວດ​ກາ ການ​ບໍ​ລິ​ການ​ຈະ​ໄດ້​ຮັບ​ການ​ເສີມ​ສ້າງຢ່າງ​ຕໍ່​ເນື່ອງ ເພື່ອ​ຮັບ​ປະ​ກັນໃຫ້ຜູ້ຊົມ​ໃຊ້​ໄດ້ຮັບ​​ປະ​ສົບ​ການ​ທີ່​ດີ​ຍິ່ງຂຶ້ນ.

ວິທະຍຸກະຈາຍສຽງຫວຽດນາມລາຍງານວ່າ: ຕາມຂໍ້ມູນຈາກສະພາເລືອກຕັ້ງແຫ່ງຊາດ, ໄລ່ມາຮອດເວລາ 16:00 ໂມງຂອງວັນທີ 15 ມີນາ ຜ່ານມາ ຍອດຈຳນວນຜູ້ມີສິດເລືອກຕັ້ງທັງໝົດໄປປ່ອນບັດເລືອກຕັ້ງສະມາຊິກສະພາແຫ່ງຊາດຊຸດທີ XVI ແລະ ສະມາຊິກສະພາປະຊາຊົນທຸກຂັ້ນ ອາຍຸການ 2026 – 2031 ແມ່ນ 71.3 ລ້ານກວ່າຄົນ (ບັນລຸລະດັບ 93%). ໃນນັ້ນມີ 5/34 ແຂວງ, ນະຄອນມີອັດຕາຜູ້ມີສິດເລືອກຕັ້ງບັນລຸເກືອບ 100%, ລວມມີ ຕວຽນກວາງ, ລາວກາຍ, ລ້າງເຊີນ, ດຽນບຽນ, ລາຍເຈົາ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 11 ມີນາ ຜ່ານມາ, ອົງການສຶກສາວິທະຍາສາດ ແລະ ວັດທະນະທຳສະຫະປະຊາຊາດ (UNESCO) ໄດ້ສະແດງຄວາມວິຕົກກັງວົນກ່ຽວກັບຊາຕະກຳຂອງບັນດາມໍລະດົກໂລກຢູ່ ອີຣານ ແລະ ພາກພື້ນ, ພາຍຫຼັງວັງໂກເລສຕັນ ຢູ່ນະຄອນຫຼວງເຕເຮຣານ, ພ້ອມກັບໂບດອິສລາມ ແລະ ວັງປະຫວັດສາດຢູ່ນະຄອນອິສຟາຮານ ຖືກເປ່ເພຍ້ອນການປະທະກັນ.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 11 ມີນາ ຜ່ານມາ, ອົງການພະລັງງານສາກົນ (IEA) ໃຫ້ຮູ້ວ່າ, ບັນດາປະເທດສະມາຊິກຂອງອົງການ IEA ຈະປ່ອຍນ້ຳມັນທີ່ເກັບສຳຮອງໄວ້ຈຳນວນ 400 ລ້ານຖັງ ເພື່ອຫຼຸດຜ່ອນຜົນກະທົບຂອງການປະທະກັນຢູ່ ຕາເວັນອອກກາງ ແລະ ແມ່ນການປ່ອຍນ້ຳມັນອອກຄັ້ງໃຫຍ່ທີ່ສຸດຂອງ IEA.

“ພວກເຮົາແນມເບິ່ງໂລກຕາມຄວາມເປັນຈິງ ບໍ່ແມ່ນຕາມສິ່ງທີ່ພວກເຮົາຢາກໃຫ້ເປັນ.” ນີ້ແມ່ນຄຳອະທິບາຍຂອງ ມາກຄາເນ (Mark Carney )ນາຍົກລັດຖະມົນຕີຂອງການາດາ ກ່ຽວກັບແນວທາງການຈັດການຄວາມສຳພັນກັບ ສປ ຈີນ. ທ່ານໄດ້ກ່າວຕໍ່ນັກຂ່າວວ່າ “ໂລກໄດ້ມີການປ່ຽນໄປແລ້ວ” ແລະ ການປັບປຸງຄວາມສຳພັນກັບຈີນຈະຊ່ວຍໃຫ້ ການາດາ ມີຈຸດຢືນທີ່ດີໃນ “ລະບຽບໂລກໃໝ່”. ຄຳເຫັນດັ່ງກ່າວຖືກກ່າວຂຶ້ນເມື່ອທ່ານໃນລະຫວ່າງການເດີນທາງຢ້ຽມຢາມ ສປ ຈີນໃນເດືອນມັງກອນທີ່ຜ່ານມາ.

ຂ່າວສານຊີອາໄອລາຍງານວ່າ ໃນວັນ​ທີ 12 ມີ​ນາ​ ຜ່ານມາ, ກອງ​ປະ​ຊຸມ​ຄັ້ງ​ທີ 4 ຂອງ​ສະ​ພາ​ປະ​ຊາ​ຊົນ​ແຫ່ງ​ຊາດ ​ຈີ​ນ​ຊຸດ​ທີ 14 ໄດ້ປິດ​ລົງ​ຢູ່​ຫໍ​ສະ​ພາ​ປະ​ຊາ​ຊົນ​ແຫ່ງ​ຊາດ​ຈີນທີ່​ນະ​ຄອນ​ຫຼວງ​ປັກ​ກິ່ງ. ໂດຍ​ມີ​ທ່ານ ສີ​ຈິ້ນ​ຜິງ ເລ​ຂາ​ທິ​ການ​ໃຫຍ່​ຄະ​ນະ​ກຳ​ມະ​ການ​ສູນ​ກາງ​ພັກ​ກອມ​ມູ​ນິດ​ ປະ​ທານ​ປະ​ເທດ​ຈີນ ປະ​ທານ​ຄະ​ນະ​ກຳ​ມະ​ການ​ການທະ​ຫານ​ສູນ​ກາງ​ຈີນ ​ພ້ອມ​ດ້ວຍ​ຜູ້​ນຳ​ພັກ ແລະ ລັດ​​ເຂົ້າ​ຮ່ວມ.