ທ່ານ ວະລາດີເມຍ ປູຕິນ ດຳລົງຕຳແໜ່ງປະທານນາທິບໍດີ ຣັດເຊຍ ເປັນສະໄໝທີ 5

ຂ່າວຕ່າງປະເທດລາຍງານ ໃນວັນທີ 8 ກຸມພາ ຜ່ານມາວ່າ: ກະຊວງກະສິກຳຂອງຟີລິບປິນໄດ້ເປີດເຜີຍວ່າ, ຟີລິບປິນຂາດດຸນການຄ້າກະສິກຳຫຼຸດລົງຢ່າງຫຼວງຫຼາຍໃນເດືອນທັນວາ 2025. ເນື່ອງຈາກການສົ່ງອອກສິນຄ້າກະສິກຳເພີ່ມສູງຂຶ້ນ, ໂດຍສະເພາະແມ່ນໝາກໄມ້ເຂດຮ້ອນ ແລະ ຄຽງຄູ່ກັບການຫຼຸດລົງຂອງການນຳເຂົ້າ.

ຂ່າວຕ່າງປະເທດລາຍງານ ໃນວັນທີ 9 ກຸມພາ ຜ່ານມາວ່າ: ບົດລາຍງານຫຼ້າສຸດຈາກອົງການຄວບຄຸມ ແລະ ປ້ອງກັນພະຍາດ ສ ເກົາຫຼີ (KDCA) ເປີດເຜີຍວ່າ: ອັດຕາສ່ວນປະຊາກອນ ສ ເກົາຫຼີ ທີ່ບໍລິໂພກນໍ້າຕານຫຼາຍເກີນໄປ ມີທ່າອ່ຽງເພີ່ມຂຶ້ນໃນຊຸມປີມໍ່ໆມານີ້, ໂດຍສ່ວນໃຫຍ່ແມ່ນຍ້ອນການບໍລິໂພກເຄື່ອງດື່ມທີ່ລົດຊາດຫວານ.

ຂ່າວຕ່າງປະເທດລາຍງານ ໃນວັນທີ 8 ກຸມພາ ຜ່ານມາວ່າ: ບົດຄວາມທີ່ເຜີຍແຜ່ຫວ່າງມໍ່ໆມານີ້, ໂດຍສຳນັກງານປະຊາສຳພັນ (PIB) ຊຶ່ງເປັນອົງການປະຊາສຳພັນຂອງລັດຖະບານອິນເດຍລະບຸວ່າ: ອິນເດຍວາງແຜນທີ່ຈະມີຄວາມສາມາດໃນການອອກແບບ ແລະ ຜະລິດຊິບໃຫ້ພຽງພໍຕໍ່ຄວາມຕ້ອງການພາຍໃນປະເທດເຖິງເກືອບ 70-75% ພາຍໃນປີ 2029.

ຂ່າວສານຊີອາໄອລາຍງານໃນວັນທີ 9 ກຸມພາ ຜ່ານມາວ່າ: ອີງຕາມຜົນການນັບຄະ​ແນນ​ສຽງຫຼ້າສຸດໃນການເລືອກຕັ້ງສະ​ພາ​ຕ່ຳ​ຍີ່ປຸ່ນທີ່ຈັດຂຶ້ນໃນວັນທີ 8 ກຸມພາ ຜ່ານມານີ້, ພັກ​ລັດ​ຖະ​ບ​ານປະ​ສົມທີ່ປະກອບດ້ວຍ ພັກເສ​ລີ​ປະ​ຊາ​ທິ​ປະ​ໄຕ ແລະ ພັກ​ຟື້ນ​ຟູຍີ່ປຸ່ນ ໄດ້ຮັບບ່ອນ​ນັ່ງຜູ້ແທນ​ເກີນເຄິ່ງໜຶ່ງ​.

ຂ່າວສານຊີອາໄອລາຍງານວ່າ: ຫວ່າງມໍ່ໆມານີ້, ໃນເວລາໃຫ້ສຳພາດ, ທ່ານ ສູນີງໆ ປະທານຄະນະກຳມະການການຮ່ວມມືດ້ານອຸດສາຫະກຳຂອງສັນຍາການພົວພັນຄູ່ຮ່ວມເສດຖະກິດຮອບດ້ານໃນພາກພື້ນ ຫຼື RCEP ຫົວໜ້າຜູ້ຊ່ຽວຊານດ້ານການຄ້າລະຫວ່າງຈີນ-ອາຊຽນ ກ່າວວ່າ: ຈີນຄອງຖານະທີ່ເປັນຄູ່ການຄ້າໃຫຍ່ອັນດັບໜຶ່ງຂອງອາຊຽນປັນເວລາ 17 ປີລຽນຕິດແລ້ວ, ສ່ວນອາຊຽນກໍເປັນຄູ່ການຄ້າໃຫຍ່ອັນດັບໜຶ່ງຂອງຈີນເປັນເວລາ 6 ປີລຽນຕິດ. ໂດຍສະເພາະ, ໃນປີ 2025, ຍອດມູນຄ່າການຄ້າຂາເຂົ້າ-ຂາອອກລະຫວ່າງຈີນ-ອາຊຽນບັນລຸ ຫຼາຍກວ່າ 1,000 ຕື້ໂດລາ, ເພີ່ມຂຶ້ນ 7.4%.

ວິທະຍຸກະຈາຍສຽງຫວຽດນາມລາຍງານວ່າ: ໃນວັນທີ 9 ກຸມພາ ຜ່ານມາ, ຢູ່ນະຄອນຫຼວງຮ່າໂນ້ຍ, ທ່ານ ຟ້າມມິງຈິງ ນາຍົກລັດຖະມົນຕີຫວຽດນາມ ໄດ້ມີການເຮັດວຽກກັບການນຳບັນດາວິສາຫະກິດທີ່ຂຶ້ນກັບຫ້ອງການການຄ້າ ແລະ ອຸດສາຫະກຳ ຍີ່ປຸ່ນ (JCCI), ໂດຍການເປັນຫົວໜ້າຄະນະຂອງ ທ່ານ ເຄອິຕະ ອິຊິອິ ປະທານຄະນະກຳມະການເສດຖະກິດຍີ່ປຸ່ນ - ແມ່ນໍ້າຂອງ ທັງເປັນ CEO ກຸ່ມບໍລິສັດ Itochu. ທ່ານນາຍົກລັດຖະມົນຕີຫວຽດນາມ ຕີລາຄາສູງການຮ່ວມມື ແລະ ການປະກອບສ່ວນອັນລ້ຳຄ່າຂອງ JCCI ກໍຄືຄະນະກຳມະການເສດຖະກິດຍີ່ປຸ່ນ - ແມ່ນໍ້າຂອງ ໃນການຊຸກຍູ້ການພົວພັນລະຫວ່າງສອງປະເທດ, ເປັນຂົວເຊື່ອມຕໍ່ຊ່ວຍບັນດາວິສາຫະກິດຍີ່ປຸ່ນ ສືບຕໍ່ເປີດກວ້າງການລົງທຶນໃນຫວຽດນາມ.

ຂ່າວສານຊີອາໄອລາຍງານວ່າ: ອາຫານແຊບທີ່ຫຼາກຫຼາຍໄດ້ເລີ່ມຕົ້ນການເດີນທາງແຫ່ງລົດຊາດ, ເຂດສະເພາະ ເຄື່ອງສຳອາງໄດ້ເຕົ້າໂຮມຍີ່ຫໍ້ດັງຕ່າງໆ, ສິນຄ້າຍອດນິຍົມຈາກປະເທດຕ່າງໆ ໄດ້ເປີດຕົວພ້ອມກັນ ແລະ ອື່ນໆ. ໃນວັນທີ 4 ກຸມພາ ຜ່ານມານີ້, ໃນກິດຈະກຳຮອບທຳອິດປີ 2026 ພາຍໃຕ້ຫົວຂໍ້ “ຮ່ວມກັນຊົມໃຊ້ຕະຫຼາດຂະໜາດໃຫຍ່·ສົ່ງອອກປະເທດຈີນ”, ນັກວິຈານໄດ້ສຳຜັດກັບສະເໜ່ຂອງສິນຄ້ານຳເຂົ້າທີ່ມີຄຸນນະພາບດີຈາກ ປະເທດຕ່າງໆ.

ຂ່າວຕ່າງປະເທດລາຍງານ ໃນທ້າຍອາທິດຜ່ານມາວ່າ: ສະຖາບັນ Kirby ທີ່ມະຫາວິທະຍາໄລ New South Wales ໃນປະເທດອົສຕຣາລີໄດ້ລາຍງານການທົດລອງທີ່ສາມາດກວດວິນິດໄສ DNA ຂອງໄວຣັດຕັບອັກເສບບີດ້ວຍວິທີເຈາະເລືອດຈາກປາຍນິ້ວມືເປັນຄັ້ງທຳອິດຂອງໂລກ ຊຶ່ງການກວດທີ່ຈຸດດູແລຄົນເຈັບນີ້ສາມາດໃຫ້ຜົນພາຍໃນໜຶ່ງຊົ່ວໂມງ ແລະ ສາມາດປະຕິບັດໄດ້ໃນຄລີນິກທ້ອງຖິ່ນ ໂດຍມີຄວາມແມ່ນຍຳທຽບເທົ່າກັບການກວດຫ້ອງທົດລອງມາດຕະຖານ. ອີກທັງຊ່ວຍລຶບລ້າງບັນຫາຄວາມຊັກຊ້າທີ່ເກີດຈາກການສົ່ງກວດຫ້ອງທົດລອງແບບດັ້ງເດີມ ແລະ ເພີ່ມໂອກາດການເຂົ້າເຖິງການກວດຄັດກອງໃນເຂດຫ່າງໄກສອກຫຼີກ ແລະ ພື້ນທີ່ທີ່ມີຊັບພະຍາກອນຈຳກັດ.

ຂ່າວສານຊີອາໄອລາຍງານວ່າ: ຫວ່າງມໍ່ມານີ້, ອົງ​ການ​ພະ​ລັງ​ງານ​ສາ​ກົນ​ ໄດ້​ເຜີຍແຜ່​ບົດ​ລາຍ​ງານ​ໂດຍ​ຄາດ​ຄະ​ເນ​ວ່າ: ນັບແຕ່ນີ້​ໄປ​ຮອດ​ປີ 2030, ຈັງ​ຫວະ​ການ​ເຕີບ​ໂຕ​ດ້ານ​ຄວາມ​ຕ້ອງ​ການ​ພະ​ລັງ​ງານ​ໃນ​ທົ່ວ​ໂລກ​ຈະຫຼາຍກວ່າ 3.5%. ເມື່ອ​ຮອດ​ປີ 2030, ອັດ​ຕາສ່ວນຂອງ​ພະ​ລັງ​ງານ​ໝູນວ​ຽນ ແລະ ພະ​ລັງ​ງາ​ນ​ນິ​ວເຄ​ລ​ຍ​ຈະເພີ່ມຂຶ້ນເປັນ 50% ຂອງ​ພະ​ລັງ​ງານ​ໄຟ​ຟ້າ​ທົ່ວ​ໂລກ.

ຂ່າວຕ່າງປະເທດລາຍງານ ໃນທ້າຍອາທິດຜ່ານມາວ່າ: ກະຊວງກະສິກຳຟີລິບປິນໄດ້ລາຍງານການຈັດສັນງົບປະມານຫຼາຍກວ່າ 5 ລ້ານໂດລາພາຍໃນປີ 2026 ສຳລັບຂະຫຍາຍການປູກພືດທີ່ມີມູນຄ່າສູງ, ທົນທານຕໍ່ສະພາບອາກາດ ແລະ ເພື່ອຄວບຄຸມລາຄາສິນຄ້າກະສິກຳທີ່ຜັນຜວນ ເນື່ອງຈາກການສະ ໜອງໄດ້ຖືກຢຸດສະງັກຍ້ອນສະພາບອາກາດຜັນຜວນ.