 |
ກອງປະຊຸມໄດ້ຮັບຟັງການລາຍງານ ຜົນການດໍາເນີນທຸລະກິດປະຈຳປີ 2025 ໂດຍຍົກໃຫ້ເຫັນການປະຕິບັດວຽກງານທີ່ພົ້ນເດັ່ນ, ນະໂຍບາຍ, ຍຸດທະສາດ, ສິ່ງທ້າທາຍ ແລະ ແນວທາງການປັບປຸງແກ້ໄຂ ເພື່ອວາງທິດທາງໃນປີ 2026 ໃຫ້ບັນລຸຕາມຄາດໝາຍທີ່ວາງໄວ້. ໃນປີ 2025 ຜ່ານມາ, ມີຍອດຊັບສິນ ລວມບັນລຸ 20,196 ຕື້ກີບ (ເພີ່ມຂຶ້ນ 61.38% ທຽບໃສ່ປີຜ່ານມາ), ຍອດເງິນຝາກບັນລຸ 16,611 ຕື້ກີບ (ເທົ່າກັບ 138.28% ຂອງແຜນການປີ 2025), ຍອດສິນເຊື່ອບັນລຸ 14,915 ຕື້ກີບ (ເທົ່າກັບ 136.75% ຂອງແຜນການປີ 2025), ກໍາໄລບັນລຸ 311.34 ຕື້ກີບ (ເທົ່າກັບ 102.87% ຂອງແຜນການປີ 2025). ປັດຈຸບັນ APB ໄດ້ສຸມໃສ່ຍົກລະດັບ ການບໍລິການຜ່ານເຕັກໂນໂລຊີທີ່ທັນສະໄໝ ເພື່ອເຊື່ອມໂຍງກັບລະ ບົບການຊຳລະສະສາງສາກົນ ແລະ ສະໜັບສະໜູນຫົວໜ່ວຍທຸລະກິດຢ່າງຮອບດ້ານ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງຊາດ. ຄຽງຄູ່ກັນນັ້ນ APB ຍັງໄດ້ຂະຫຍາຍຈຸດໃຫ້ບໍລິການທີ່ເປັນມາດຕະຖານ ເພື່ອຕອບສະໜອງຄວາມຕ້ອງການຂອງສັງຄົມ. ດ້ານການບໍລິການໃນປີ 2025 APB ໄດ້ເປີດໃຫ້ບໍລິການໃໝ່ຫຼາຍດ້ານເຊັ່ນ: ບໍລິການໂອນເງິນລະຫວ່າງປະເທດ (VISA B2B), ໃຫ້ບໍລິການຜະລິດຕະພັນ Mebank (Internet Banking), ບໍລິການແລກປ່ຽນເງິນຕາ LFX ຜ່ານແອັບ APB Meporm ແລະ ຕູ້ ATM FX, ບໍລິການບັດສາກົນ (Visa & UnionPay Cards), ການຮ່ວມມືກັບ Western Union ເປັນທະນາຄານທໍາອິດໃນສປປ ລາວ ທີ່ສາມາດຮັບເງິນຜ່ານແອັບ APB Meporm ເຂົ້າບັນຊີທະນາຄານໄດ້ຢ່າງສະດວກສະບາຍ (ໂດຍບໍ່ຈໍາເປັນຕ້ອງເດີນທາງໄປຮັບເງິນຄືແຕ່ກ່ອນ) ແລະ ການຫັນເປັນທັນສະໄໝອື່ນໆ ຫຼາຍໂຄງການ.
ດ້ານການເງິນສີຂຽວ (Green Finance) APB ໄດ້ສຸມໃສ່ການຂະຫຍາຍຄູ່ຮ່ວມທຸລະກິດທັງພາຍໃນ ແລະ ຕ່າງປະເທດ ເພື່ອກຽມການອອກຈຳໜ່າຍ “ຮຸ້ນກູ້ສີຂຽວ” (Green Bond), ຊຶ່ງ APB ເປັນທະ ນາຄານແຫ່ງທຳອິດທີ່ໄດ້ຮັບການສະໜັບສະໜູນຈາກພາກລັດ ແລະ ອົງການຈັດຕັ້ງສາກົນ ໃຫ້ສາມາດອອກພັນທະບັດສີຂຽວ ເພື່ອສົ່ງເສີມການພັດທະນາເສດຖະກິດ-ສັງຄົມຕາມທິດສີຂຽວ ແລະ ຍືນຍົງ ທີ່ເປັນມິດຕໍ່ສິ່ງແວດລ້ອມ ເປັນຕົ້ນ ໂຄງການພະລັງງານໝູນວຽນ (Renewable Engergy) ແລະ ພະລັງງານສະອາດ (Clean Transportation) ເຊັ່ນ: ການສົ່ງເສີມ ການນໍາໃຊ້ລົດໄຟຟ້າ, ພັດທະນາສະຖານີສາກ, ແລະ ອື່ນໆ ຊຶ່ງໄດ້ຮັບການຮັບຮອງແຜນການຈັດຕັ້ງປະຕິບັດໂຄງການ ຈາກສະຖາບັນຊັ້ນນໍາສາກົນເຊັ່ນ: S&P Global (Singapore). ໂຄງການດັ່ງກ່າວນີ້ຈະເປັນທ່າແຮງທີ່ສໍາຄັນໃນໄລຍະໃໝ່ ແລະ ສອດຄ່ອງກັບນະໂຍບາຍຂອງລັດຖະບານໃນປັດຈຸບັນ.
 |
ຄຽງຄູ່ກັນນັ້ນ, APB ຍັງໄດ້ປະກອບສ່ວນຢ່າງຕັ້ງໜ້າໃນການຜັນຂະຫຍາຍນະໂຍບາຍທາງດ້ານການເງິນຂອງລັດຖະບານ ໂດຍສະເພາະແມ່ນນະໂຍບາຍກະຕຸ້ນເສດຖະກິດ ແລະ ກະຈາຍສິນເຊື່ອລົງສູ່ທ້ອງຖິ່ນ (ນະໂບບາຍສິນເຊື່ອດອກເບ້ຍຕໍ່າ), ຊຶ່ງສາມາດຈັດຕັ້ງປະຕິບັດໄດ້ໃນລະດັບທີ່ສູງພໍສົມຄວນ. ນອກຈາກນັ້ນ, APB ຍັງໄດ້ເຂົ້າເປັນຄູ່ຮ່ວມໂຄງການກອງທຶນຫຼາຍໂຄງການ ເຊັ່ນ: ໂຄງການກອງທຶນເພື່ອສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ (MSME) ແລະ ກອງທຶນຊ່ວຍເຫຼືອຂອງອົງການຈັດຕັ້ງສາກົນ ແນໃສ່ໃຫ້ການສະໜັບສະໜູນທາງການເງິນ ໃຫ້ໂຄງການພັດທະນາພື້ນຖານໂຄງລ່າງດ້ານເສດຖະກິດ ເຊັ່ນ: ຂະ ແໜງກະສິກຳ, ການຄ້າ, ການບໍລິການ, ອຸດສາຫະກຳ ແລະ ອື່ນໆ ໃນຂອບເຂດທົ່ວປະເທດ.
ສໍາລັບເປົ້າໝາຍການດໍາເນີນທຸລະກິດໃນປີ 2026, APB ຈະສືບຕໍ່ດໍາເນີນທຸລະກິດຕາມແຜນຍຸດທະສາດ ແລະ ແຜນດໍາເນີນທຸລະກິດທີ່ວາງໄວ້ຢ່າງໜັກແໜ້ນ ແລະ ສືບຕໍ່ຈັດຕັ້ງປະຕິບັດແຜນນະໂຍບາຍທາງດ້ານການເງິນ ແລະ ການບໍລິການໃຫ້ມີການຂະຫຍາຍຕົວຫຼາຍກວ່າເກົ່າ. APB ໄດ້ຮ່ວມມືກັບການ ຈັດຕັ້ງພາກລັດ ເປັນຕົ້ນແມ່ນບັນດາກະຊວງຕ່າງໆ ເພື່ອດໍາເນີນການພັດທະນາຫຼາຍໂຄງການທີ່ເປັນພື້ນ ຖານໂຄງລ່າງຂອງການເງິນແບບໃໝ່ທີ່ທັນສະໄໝ (New Financial Ecosystem), ປັບປຸງພາບລັກຂອງ APB ໂດຍສະເພາະອາຄານສໍານັກງານສາຂາ, ໜ່ວຍບໍລິການໃຫ້ມີຄວາມທັນສະໄໝ ແລະ ຂະຫຍາຍປ່ອງບໍລິການໃຫ້ຄວບຄຸມກວ້າງຂວາງກວ່າເກົ່າ, ຮ່ວມມືກັບສາກົນໃນດ້ານວຽກງານການໃຫ້ການບໍລິການຊໍາລະ ສະສາງຕ່າງປະເທດ ໃຫ້ສາມາດຮອງຮັບທຸກການບໍລິການຂອງສາກົນ, ເອົາໃຈໃສ່ພັດທະນາການບໍລິການທາງການເງິນທີ່ຍືນຍົງ ແລະ ເປັນມິດກັບສິ່ງແວດລ້ອມ, ເສີມສ້າງການບໍລິການໃຫ້ມີຄຸນນະພາບ, ວ່ອງໄວ- ປະທັບໃຈ ແລະ ເປັນມາດຕະຖານດຽວກັນໃນຂອບເຂດທົ່ວປະເທດເພື່ອຮັບໃຊ້ສັງຄົມ ຕາມຄໍາຂວັນທີ່ວ່າ “ວ່ອງໄວ ກ້າວໄກ ໄປຄຽງຄູ່ທ່ານ”.
ແຫຼ່ງຂ່າວ: ວຽງຈັນໃໝ່
ຄໍາເຫັນ