ຫວ່າງມໍ່ໆມານີ້, ທ່ານ ບຸນໄຊ ປະຊາຊົນ ເມືອງໄຊ ແຂວງອຸດົມໄຊ ໄດ້ສະແດງຄວາມຮູ້ສຶກດີໃຈທີ່ສຸດ, ນັບແຕ່ທາງລົດໄຟລາວ-ຈີນ ເປີດດຳເນີນງານເປັນຕົ້ນມາ, ການຂົນສົ່ງສິນຄ້າຂ້າມຊາຍແດນນັບມື້ນັບເພີ່ມຂຶ້ນ ແລະ ມີຫຼາຍປະເພດຂຶ້ນ, ການຂົນສົ່ງຜູ້ໂດຍສານກໍຫຼາຍຂຶ້ນເຊັ່ນກັນ. ທ່ານກ່າວວ່າ: “ແຕ່ກ່ອນ, ມີແຕ່ທາງເສັ້ນນ້ອຍໆທີ່ຄົດລ້ຽວກ້ຽວກອດເຂົ້າບ້ານເທົ່ານັ້ນ, ການຂົນສົ່ງສິນຄ້າຕ້ອງໃຫ້ຄົນເປ້ ຫຼື ມ້າຕ່າງ. ປັດຈຸບັນ, ມີທາງດິນປູກ້ອນຫີນນ້ອຍທີ່ຮາບພຽງ, ພວກເຮົາສາມາດຂັບລົດແທັກເຕີຂົນສົ່ງເຂົ້າສານໄປຂາຍຢູ່ເມືອງໄຊ, ສະດວກສະບາຍທີ່ສຸດ.
ທ່ານ ວັນຄຳ ປະຊາຊົນບ້ານຫ້ວຍຮຸ່ງ ເມືອງງາ ກໍມີຄວາມຮູ້ສຶກທີ່ຄ້າຍຄືກັນ. ທ່ານກ່າວວ່າ: “ປັດຈຸບັນ, ຂ້າພະເຈົ້າສາມາດຂັບລົດຂົນສົ່ງງົວໄປເຖິງສະຖານີລົດໄຟເມືອງງາ, ແລ້ວຈະສົ່ງໄປຂາຍຢູ່ຈີນໂດຍຜ່ານທາງລົດໄຟລາວ-ຈີນ.”
ທາງລົດໄຟລາວ-ຈີນ ທີ່ເປີດດຳເນີນງານໃນເດືອນທັນວາປີ 2021 ໄດ້ເຊື່ອມຕໍ່ນະຄອນຫຼວງວຽງຈັນກັບນະຄອນຄຸນໝິງຂອງ ສປ ຈີນ, ແມ່ນເສັ້ນທາງລົດໄຟຂົນສົ່ງສິນຄ້າ ແລະ ຜູ້ໂດຍສານໃຊ້ພະລັງງານໄຟຟ້າສີຂຽວທີ່ປ່ອຍກາກບອນຕ່ຳ, ກໍແມ່ນເສັ້ນທາງພັດທະນາເສດຖະກິດທີ່ດີສາຍໜຶ່ງ. ໃນນັ້ນ, ໂຄງການສະໜອງໄຟຟ້າພາຍນອກຕາມທາງລົດໄຟລາວ-ຈີນໄດ້ເປັນສິ່ງຄ້ຳປະກັນດ້ານພະລັງງານໄຟຟ້າ ທີ່ຂາດບໍ່ໄດ້ໃຫ້ແກ່ການດຳເນີນງານຂອງທາງລົດໄຟລາວ-ຈີນ, ກໍໄດ້ເປັນສິ່ງຄ້ຳປະກັນດ້ານພະລັງງານໄຟຟ້າທີ່ແຂງແຮງໃຫ້ແກ່ການສະໜອງໄຟຟ້າຢູ່ເຂດລຽບຕາມທາງລົດໄຟທີ່ນັບມື້ນັບເພີ່ມຂຶ້ນຊຶ່ງໄດ້ຊ່ວຍຊຸກຍູ້ການພັດທະນາເສດຖະກິດຂອງທ້ອງຖິ່ນ.
ໂຄງການສະໜອງໄຟຟ້າພາຍນອກຕາມທາງລົດໄຟລາວ-ຈີນ ມີເຄິ່ງໜຶ່ງຂຶ້ນໄປໄດ້ຕິດຕັ້ງຢູ່ຕາມເຂດພູດອຍ, ໃນເວລາກໍ່ສ້າງໂຄງການດັ່ງກ່າວ, ກໍໄດ້ສ້າງເສັ້ນທາງໄປພ້ອມກັນຊຶ່ງໄດ້ປັບປຸງສະພາບຄົມມະນາຄົມຂອງເຂດພູດອຍທາງພາກເໜືອຂອງປະເທດລາວ. ທ່ານ ຮວງເວີນ ກ່າງ ຜູ້ອຳນວຍການໃຫຍ່ບໍລິສັດລົງທຶນພະລັງງານໄຟຟ້າລາວ-ຈີນຈຳກັດ, ຜູ້ຮັບຜິດຊອບໂຄງການສະໜອງໄຟຟ້າຕາມທາງລົດໄຟລາວ-ຈີນ ຊ່ວງຜ່ານປະເທດລາວກ່າວວ່າ: “ໃນຂະນະທີ່ພວກຂ້າພະເຈົ້າກໍ່ສ້າງເສັ້ນທາງໄປຫາໂຄງການສະໜອງໄຟຟ້າ, ພວກເຮົາກໍໄດ້ສ້າງທາງໄປເຖິງບ້ານປະຊາຊົນທີ່ຢູ່ເຂດໃກ້ຄຽງ ຊຶ່ງໄດ້ອຳນວຍຄວາມສະດວກໃຫ້ແກ່ການໄປມາຫາສູ່ ແລະ ການຂົນສົ່ງສິນຄ້າຂອງປະຊາຊົນທ້ອງຖິ່ນ.”
ນອກຈາກປັບປຸງສິ່ງກໍ່ສ້າງທາງຄົມມະນາຄົມໃຫ້ດີຂຶ້ນແລ້ວ, ວັນທີ 13 ເມສາ 2023, ທາງລົດໄຟລາວ-ຈີນ ໄດ້ເປີດຂະບວນລົດໄຟໂດຍສານສາກົນຢ່າງຮອບດ້ານ ຊຶ່ງໄດ້ນຳເອົາຄວາມຫວັງໃໝ່ໃຫ້ແກ່ ທ່ານສີສະຫຼຽວ ແລະ ຄອບຄົວຂອງທ່ານທີ່ໄດ້ເປີດຮ້ານອາຫານ ແລະ ໂຮງແຮມແຫ່ງໜື່ງຢູ່ນະຄອນ-ຫຼວງພະບາງປະເທດລາວ.
ທ່ານກ່າວວ່າ: “ຈຳນວນນັກທ່ອງທ່ຽວໄດ້ເພີ່ມຂຶ້ນຫຼາຍສົມຄວນເມື່ອທຽບໃສ່ສອງປີກ່ອນທີ່ເກີດມີການແຜ່ລະບາດຂອງພະຍາດໂຄວິດ-19, ໂດຍສະເພາະແມ່ນ ວັນພັກ, ວັນບຸນຕ່າງໆ, ຜູ້ບໍລິການໃນຮ້ານອາຫານແມ່ນບໍ່ພຽງພໍ. ການແຜ່ລະບາດຂອງພະຍາດໂຄວິດ-19 ໃນສອງປີຜ່ານມາໄດ້ສ້າງຜົນກະທົບອັນໃຫຍ່ຫຼວງຕໍ່ເສດຖະກິດນະຄອນ-ຫຼວງພະບາງ, ຄຽງຄູ່ກັບສະພາບການແຜ່ລະບາດຂອງພະຍາດໂຄວິດ-19 ສິ້ນສຸດລົງ ແລະ ການເປີດດຳເນີນງານຂະບວນລົດໄຟໂດຍສານສາກົນຕາມທາງລົດໄຟລາວ-ຈີນແລ້ວ, ນັກທ່ອງທ່ຽວໄດ້ມາທ່ຽວນະຄອນແຫ່ງນີ້ຄືນໃໝ່ ແລະ ສະພາບທຸລະກິດຂອງຮ້ານທ່ານກໍນັບມື້ນັບດີຂຶ້ນ.
ທາງລົດໄຟລາວ-ຈີນ ໄດ້ເຊື່ອມຕໍ່ນະຄອນຄຸນໝິງ, ນະຄອນຢູ້ຊີ, ນະຄອນພູເອີ ແລະ ກິ່ງແຂວງສິບສອງພັນນາຂອງຈີນ ແລະ ນະຄອນ-ຫຼວງພະບາງ, ເມືອງວັງວຽງ ແລະ ນະຄອນຫຼວງວຽງຈັນຂອງປະເທດລາວ, ມີທິວທັດທຳມະຊາດທີ່ສວຍງາມ ມີແຫຼ່ງທ່ອງທ່ຽວທີ່ອຸດົມສົມບູນ ຢູ່ລຽບຕາມທາງລົດໄຟ, ເປັນຊ່ອງທາງທ່ອງທ່ຽວທີ່ດີເລີດ. ປັດຈຸບັນນີ້, ຖ້າທ່ານຂຶ້ນລົດໄຟຈາກນະຄອນຄຸນໝິງໃນຕອນເຊົ້າ, ຕອນແລງກໍຈະສາມາດເດີນທາງໄປເຖິງນະຄອນຫຼວງວຽງຈັນ ຊຶ່ງໄດ້ເພີ່ມພະລັງຂັບເຄື່ອນໃຫ້ແກ່ການຟື້ນຟູເສດຖະກິດທ້ອງຖິ່ນ, ຂະແໜງການຄ້າ, ຮ້ານອາຫານ ແລະ ການທ່ອງທ່ຽວກໍໄດ້ຮັບຜົນປະໂຫຍດຈາກການເປີດດຳເນີນງານຂອງທາງລົດໄຟສາຍນີ້.
ບົດໂດຍ: ຊູທາຍລິນ ພາບໂດຍ: ຫວັງຢູ, ຫຼົງລີ້ຊົງ ບັນນນາທິການ: Yang Chunmei
ຄໍາເຫັນ