ທ່ານ ໂຕເລິມ ຢັ້ງຢືນວ່າ: 80 ປີຜ່ານມາ, ສະພາແຫ່ງຊາດຍາມໃດກໍຮ່ວມເດີນທາງພ້ອມກັບຊົນຊາດ ແລະ ວາງອອກບັນດານະໂຍບາຍຊີ້ຂາດທີ່ສຳຄັນຕາມຄວາມມຸ່ງຫວັງ ແລະ ເຈດຈຳນົງຂອງປະຊາຊົນ ຊຶ່ງໄດ້ຮັບການປຶກສາຫາລືຢ່າງມີປະຊາທິປະໄຕ, ໄດ້ຮັບການຮັບຮອງຢ່າງລະມັດລະວັງ ແລະ ຜັນຂະຫຍາຍຢ່າງຂ້ຽວຂາດ.
ໂດຍແຈ້ງໃຫ້ຜູ້ແທນ 2.200 ກວ່າທ່ານທີ່ເຂົ້າຮ່ວມກອງປະຊຸມຮັບຊາບ, ທ່ານເລຂາທິການໃຫຍ່ ໄດ້ຍົກໃຫ້ເຫັນເປົ້າໝາຍຂອງປະເທດຊາດໃນໄລຍະຈະມາເຖິງຢ່າງຈະແຈ້ງ. ນັ້ນແມ່ນຮັບປະກັນສິດອະທິປະໄຕ, ຜືນແຜ່ນດິນອັນຄົບຖ້ວນ, ຮັກສາສັນຕິພາບ, ສະຖຽນລະພາບ, ຄວາມເປັນລະບຽບຮຽບຮ້ອຍທາງສັງຄົມ, ພັດທະນາປະເທດຊາດຢ່າງໄວ ແລະ ຍືນຍົງ, ຍົກສູງ, ຕອບສະໜອງຄວາມຕ້ອງການທີ່ນັບມື້ນັບສູງຂຶ້ນກ່ຽວກັບຊີວິດດ້ານວັດຖຸ ແລະ ຈິດໃຈຂອງປະຊາຊົນຢ່າງບໍ່ຢຸດຢັ້ງ. ໂດຍເນັ້ນໜັກກ່ຽວກັບວຽກງານຄັດເລືອກບຸກຄະລາກອນໃຫ້ແກ່ກອງປະຊຸມໃຫຍ່.
ທ່ານ ໂຕເລິມ ຊີ້ແຈ້ງວ່າ: ແຜນການຂອງພັກແມ່ນເອົາໃຈໃສ່ເປັນພິເສດຕໍ່ຄຸນນະພາບຂອງຖັນແຖວກຳມະການສູນກາງ ຊຸດທີ XIV. ມີຈຳນວນ, ມີໂຄງປະກອບທີ່ເໝາະສົມເພື່ອຕອບສະໜອງຄວາມຮຽກຮ້ອງຕ້ອງການຂອງການນຳຢ່າງຮອບດ້ານ, ເອົາໃຈໃສ່ ໃຫ້ບຸລິມະສິດເພີ່ມທະວີກຳມະການສູນກາງພັກຢູ່ບັນດາຕຳແໜ່ງ, ບໍລິເວນ, ຂົງເຂດທີ່ສຳຄັນ.
ເນື່ອງໃນໂອກາດນີ້, ທ່ານ ເຈິ່ນແທັງເໝິນ ປະທານສະພາແຫ່ງຊາດ ຫວຽດນາມ ໄດ້ເປັນກຽດປະດັບຫຼຽນກາທີ່ລະນຶກ “ເພື່ອພາລະກິດ ສະພາແຫ່ງຊາດ ຫວຽດນາມ” ໃຫ້ທ່ານ ໂຕເລິມ ເລຂາທິການໃຫຍ່ , ທ່ານ ເລືອງເກື່ອງປະທານປະເທດ , ທ່ານ ຟ້າມມິງຈິງ ນາຍົກລັດຖະມົນຕີ ແລະ ບັນດາອະດີດການນຳພັກ, ລັດ, ລັດຖະບານ, ແນວໂຮມປະເທດຊາດ ຫວຽດນາມ ແລະ ການນຳສະພາແຫ່ງຊາດ ກໍໄດ້ປະດັບຫຼຽນກາທີ່ລະນຶກ ເພື່ອພາລະກິດສະພາແຫ່ງຊາດ ຫວຽດນາມ ໃຫ້ບັນດາສະມາຊິກສະພາແຫ່ງຊາດຊຸດຕ່າງໆ.
ຄໍາເຫັນ