ທ່ານນາຍົກລັດຖະມົນຕີ ຕ້ອນຮັບ ຄະນະຜູ້ແທນ ຫົວໜ້າຕໍາຫຼວດອາຊຽນ 

ໃນໂອກາດທີ່ຄະນະຜູ້ແທນ ຫົວໜ້າຕໍາຫຼວດອາຊຽນ ໄດ້ເຂົ້າຮ່ວມກອງປະຊຸມຫົວ           ໜ້າຕໍາຫຼວດອາຊຽນ ຄັ້ງທີ 41 ທີ່ ສປປ ລາວ ໄດ້ຮັບກຽດເປັນເຈົ້າພາບທີ່ຈັດຂຶ້ນຢູ່ນະຄອນຫຼວງວຽງຈັນ ລະຫວ່າງ ວັນທີ 17-19 ຕຸລາ 2023.  ໃນວັນທີ 19 ຕຸລາ 2023,  ທ່ານ ພົຕ ຄໍາກິ່ງ ຜຸຍຫຼ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫຼຼວດ ຫົວໜ້າຕໍາຫຼວດລາວ ໄດ້ນໍາພາຄະນະຜູ້ແທນ ຫົວໜ້າຕໍາຫຼວດອາຊຽນ ເຂົ້າຢ້ຽມຂໍ່ານັບ ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ເພື່ອລາຍງານກ່ຽວກັບການເຂົ້າຮ່ວມກອງປະຊຸມ ຂອງບັນດາຄະນະຜູ້ແທນຫົວໜ້າຕໍາຫຼວດອາຊຽນ. 
ໂອກາດດັ່ງກ່າວ, ທ່ານ ພົຕ ຄໍາກິ່ງ ຜຸຍຫຼ້າມະນີວົງ ໄດ້ຕາງໜ້າໃຫ້ຄະນະຜູ້ແທນ ລາຍງານກ່ຽວກັບການດໍາເນີນກອງປະຊຸມຫົວໜ້າຕໍາຫຼວດອາຊຽນ ຄັ້ງນີ້ ເປັນການສືບຕໍ່ເຈດຕະນາລົມ ແຫ່ງການຮ່ວມມືດ້ານວຽກງານຕໍາຫຼວດ ລະຫວ່າງ ບັນດາປະເທດສະມາຊິກ ຕໍາຫຼວດອາຊຽນ, ຄູ່ເຈລະຈາ ແລະ ປະເທດສັງເກດການ ເພື່ອແກ້ໄຂບັນຫາອາຊະຍາກໍາຂ້າມຊາດ ເປັນຕົ້ນແມ່ນການລັກລອບຄ້າ-ຂາຍຢາເສບຕິດ, ການກໍ່ການຮ້າຍ, ການຄ້າມະນຸດ, ການຄ້າ-ຂາຍອາວຸດ, ການຄ້າຂາຍສັດປ່າທີ່ຜິດກົດໝາຍ, ອາຊະຍາກໍາທາງທະເລ, ອາຊະຍາກໍາທາງດ້ານການຄ້າ ແລະ ການປອມແປງບັດເຄຣດິດ, ການສໍ້ໂກງຂ້າມຊາດ, ການປອມແປງເອກະສານເດີນທາງອາຊະຍາກໍາທາງຄອມພິວເຕີ ແລະ ອາຊະຍາກໍາອື່ນໆ ທີ່ເປັນໄພຂົ່ມຂູ່ຕໍ່ສະຖຽນລະພາບທາງດ້ານການເມືອງ, ຄວາມໝັ້ນຄົງທາງດ້ານເສດຖະກິດ ແລະ ການພັດທະນາທາງດ້ານວັດທະນະທໍາ-ສັງຄົມ ຂອງພາກພື້ນ ແລະ ສາກົນ, ດັ່ງນັ້ນກອງປະຊຸມຄັ້ງນີ້ ແມ່ນມີຄວາມສໍາຄັນຢ່າງຍິ່ງຕໍ່ກັບການເພີ່ມທະວີການຮ່ວມມືທັງໃນລະດັບພາກພື້ນ ແລະ ສາກົນ ໃນການຕອບຕ້ານຄືນບັນຫາອາຊະຍາກໍາຕ່າງໆ, ເພື່ອແນໃສ່ເຮັດໃຫ້ພາກພື້ນ, ກໍຄື ປະຊາຄົມໃນທົ່ວໂລກ ມີສັນຕິພາບ, ຄວາມສະຫງົບ ແລະ ໝັ້ນຄົງ.
ຈາກນັ້ນ, ທ່ານ ສອນໄຊ ສີພັນດອນ ກໍໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ຕໍ່ບັນດາຄະນະຜູ້ແທນຫົວໜ້າຕໍາຫຼວດອາຊຽນ ທີ່ເດີນທາງເຂົ້າມາຮ່ວມກອງປະຊຸມຫົວໜ້າຕໍາຫຼວດອາຊຽນ ຄັ້ງທີ 41 ທີ່ ສປປ ລາວ ໄດ້ຮັບກຽດເປັນເຈົ້າພາບຄັ້ງນີ້, ພ້ອມທັງອວຍພອນໃຫ້ກອງປະຊຸມຄັ້ງນີ້ ດໍາເນີນໄປດ້ວຍຜົນສໍາເລັດ ພາຍໃຕ້ຂອດການຮ່ວມມືທາງດ້ານວຽກງານຕໍາຫຼວດ ໃນຂົງເຂດອາຊຽນ ເຮັດໃຫ້ກໍາລັງຕໍາຫຼວດມີຄວາມເຕີບໃຫຍ່ເຂັ້ມແຂງ ຂຶ້ນເປັນກ້າວໆ.
ຂ່າວ-ພາບ: ຍຸພິນທອງ-ບຸນຕອມ