ທ່ານນາຍົກລັດຖະມົນຕີ ຊີ້ນຳວຽກງານກະສິກຳ, ປ່າໄມ້ ແລະ ພັດທະນາຊົນນະບົດ

ໃນວັນທີ 23 ມັງກອນ ນີ້ທີ່ຫໍປະຊຸມແຫ່ງຊາດ,ທ່ານ ສອນໄຊ ສີພັນດອນນາຍົກລັດຖະມົນຕີ ໄດ້ໃຫ້ກຽດເຂົ້າຮ່ວມ ແລະ ໂອ້ລົມ ຕໍ່ກອງປະຊຸມສະຫຼຸບການຈັດຕັ້ງປະຕິບັດວຽກງານກະສິກຳ, ປ່າໄມ້ ແລະ ພັດທະນາຊົນນະບົດ ປີ 2023 ແລະ ທິດທາງແຜນການປີ 2024; ມີທ່ານ ເພັດ ພົມພິພັກ ລັດຖະມົນຕີກະຊວງກະສິກໍາ ແລະ ປ່າໄມ້, ທ່ານ ອາລຸນໄຊ ສູນນະລາດ ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ບັນດາທ່ານຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ພະນັກງານຫຼັກແຫຼ່ງ ກະຊວງກະສິກຳ ແລະ ປ່າໄມ້, ຜູ້ຕາງໜ້າພະແນກກະສິກໍາ ແລະ ປ່າໄມ້ ປະຈໍາແຂວງ ແລະ ນະຄອນຫຼວງວຽງຈັນ ເຂົ້າຮ່ວມ.
ໃນໂອກາດນີ້, ທ່ານ ລັດຖະມົນຕີ ກະຊວງກະສິກຳ ແລະ ປ່າໄມ້ ໄດ້ລາຍງານໃຫ້ຊາບກ່ຽວກັບການຈັດຕັ້ງປະຕິບັດວຽກງານກະສິກຳ, ປ່າໄມ້ ແລະ ພັດທະນາຊົນນະບົດ ປະຈຳປີ 2023 ແລະ ທິດທາງແຜນການປະຈໍາປີ 2024 ລວມທັງ ຜົນການດໍາເນີນກອງປະຊຸມຄັ້ງນີ້ ຊຶ່ງກອງປະຊຸມໄດ້ເປັນເອກະພາບກັນ ສະຫຼຸບຕີລາຄາການຈັດຕັ້ງປະຕິບັດແຜນພັດທະນາກະສິກຳ, ປ່າໄມ້ ແລະພັດທະນາຊົນນະບົດໃນປີຜ່ານມາ ໂດຍສະເພາະ ຜົນສຳເລັດອັນພົ້ນເດັ່ນ, ຂໍ້ຄົງຄ້າງ, ຂໍ້ສະດວກ, ຂໍ້ຫຍຸ້ງຍາກ, ມາດຕະການ ແລະ ວິທີແກ້ໄຂ ເພື່ອເປັນພື້ນຖານແກ່ການຈັດຕັ້ງປະຕິບັດວຽກງານ ທີ່ກຳນົດໄວ້ໃນທິດທາງ ແລະ ແຜນການໃຫ້ບັນລຸຄາດໝາຍ ແລະ ມີຜົນສໍາເລັດຫຼາຍຂຶ້ນກວ່າເກົ່າ. ພ້ອມກັນນັ້ນ,ກອງປະຊຸມ ຍັງໄດ້ຮັບຟັງການສະເໜີ ຈາກຜູ້ຕາງໜ້າກະຊວງອຸດສາຫະກຳ ແລະ ການຄ້າ ກ່ຽວກັບການຄຸ້ມຄອງການນຳເຂົ້າ-ສົ່ງອອກສິນຄ້າ;ການນຳສະເໜີນະໂຍບາຍສິນເຊື່ອ ຈາກຜູ້ຕາງໜ້າທະນາຄານແຫ່ງ ສປປ ລາວ; ໄດ້ຮັບຟັງການນຳສະເໜີກ່ຽວກັບ ການຜະລິດສະບຽງອາຫານ ແລະ ປັດໄຈການຜະລິດຮັບໃຊ້ພາຍໃນ ຈາກຜູ້ປະກອບການຈຳນວນໜຶ່ງ.
ໃນໂອກາດດຽວກັນ, ທ່ານນາຍົກລັດຖະມົນຕີ ກໍໄດ້ໃຫ້ກຽດໂອ້ລົມ ແລະ ໃຫ້ທິດຊີ້ນຳ ຕໍ່ກອງປະຊຸມ ໂດຍໄດ້ສະແດງຄວາມຍ້ອງຍໍຊົມເຊີຍ ແລະ ຕີລາຄາສູງ ຕໍ່ຜົນສຳເລັດ ແລະ ຄວາມຮັບຜິດຊອບ ຂອງພະນັກງານ-ລັດຖະກອນ ທົ່ວຂະແໜງກະສິກຳ, ປ່າໄມ້ ແລະ ພັດທະນາຊົນນະບົດທີ່ສາມາດປະຕິບັດໄດ້ໃນປີຜ່ານມາ;ໄດ້ນຳເອົາບາງທິດຊີ້ນຳຂອງທ່ານປະທານປະເທດ ທີ່ໄດ້ພົບປະໂອ້ລົມຕໍ່ກອງປະຊຸມປະຈຳປີ 2023 ຂອງກະຊວງການເງິນ ມາເຜີຍແຜ່ ເພື່ອໃຫ້ຂະແໜງກະສິກຳ, ປ່າໄມ້ ແລະ ພັດທະນາຊົນນະບົດ ນຳໄປຄົ້ນຄວ້າ ແລະ ຈັດຕັ້ງຜັນຂະຫຍາຍ ເຂົ້າໃນວຽກງານທີ່ຕິດພັນກັບຂະແໜງການຂອງຕົນ ໃຫ້ເກີດເປັນຮູບປະທໍາຕົວຈິງ. ຄຽງຄູ່ກັນນີ້, ທ່ານນາຍົກລັດຖະມົນຕີ ຍັງໄດ້ຍົກໃຫ້ເຫັນບາງບັນຫາຂໍ້ຄົງຄ້າງ ທີ່ຕິດພັນກັບຂະແໜງກະສິກຳ, ປ່າໄມ້ ແລະ ພັດທະນາຊົນນະບົດ ກໍຄືການຕີລາຄາໃນກອງປະຊຸມຄັ້ງນີ້ ເພື່ອພ້ອມກັນນຳໄປຄົ້ນຄວ້າປັບປຸງແກ້ໄຂ ໃຫ້ມີການຫັນປ່ຽນທີ່ຕັ້ງໜ້າ, ມີປະສິດທິພາບ ແລະ ປະສິດທິຜົນກວ່າເກົ່າ ເປັນຕົ້ນ:ການຜະລິດເພື່ອຄໍ້າປະກັນຄວາມໝັ້ນຄົງທາງດ້ານສະບຽງອາຫານຍັງບໍ່ທັນໜັກແໜ້ນ, ແຮງຈູງໃຈຂອງຜູ້ຜະລິດ ແລະ ຜູ້ປະກອບການຍັງຕໍ່າ ເຮັດໃຫ້ຫຼາຍແຂວງຍັງເພິ່ງພາອາໄສການນໍາເຂົ້າສະບຽງອາຫານ ຈາກຕ່າງປະເທດຈຳນວນຫຼາຍ; ຕົ້ນທຶນການຜະລິດຍັງສູງ, ການສ້າງຕັ້ງກຸ່ມການຜະລິດຍັງບໍ່ທັນເຂັ້ມແຂງ, ການປຸງແຕ່ງ ແລະ ການສ້າງມູນຄ່າເພີ່ມ ຍັງບໍ່ທັນເປັນຂະບວນການທີ່ແຂງແຮງ; ເຖິງຈະມີເນື້ອທີ່ກວ້າງຂວາງ ແຕ່ການຜະລິດສ່ວນຫຼາຍຍັງອີງໃສ່ແຕ່ທໍາມະຊາດ, ຍັງເປັນການຜະລິດກະສິກຳແບບລະດູການ, ຂະໜາດນ້ອຍ ແລະ ກະແຈກກະຈາຍບໍ່ທັນມີຈຸດສຸມ, ສະມັດຖະພາບການຜະລິດຕໍ່າ, ການນໍາໃຊ້ວິທະຍາສາດ ແລະ ເຕັກໂນໂລຊີ ເຂົ້າໃນການຜະລິດ ຍັງມີຈຳກັດ; ການຄຸ້ມຄອງປ່າໄມ້, ລວມທັງເຂດປ່າປ້ອງກັນ ແລະ ສະຫງວນ ຍັງຂາດການມີສ່ວນຮ່ວມຂອງປະຊາຊົນໃນທ້ອງຖິ່ນ, ທີ່ດິນຫຼາຍແຫ່ງຍັງຖືກຈັບຈອງເປັນເຂດສໍາປະທານຂອງໂຄງການພັດທະນາ ເຮັດໃຫ້ຊັບພະຍາກອນປ່າໄມ້ ຍັງສືບຕໍ່ຖືກທຳລາຍ. ສຳລັບທິດທາງແຜນການໃນຕໍ່ໜ້າ, ທ່ານນາຍົກລັດຖະມົນຕີ ໄດ້ສະເໜີໃຫ້ເອົາໃຈໃສ່ຕື່ມບາງດ້ານ ເປັນຕົ້ນສືບຕໍ່ສູ້ຊົນຈັດຕັ້ງປະຕິບັດວຽກງານ ໃຫ້ບັນລຸບັນດາຄາດໝາຍ ແລະ 13 ວຽກງານສະໜັບສະໜູນທີ່ສໍາຄັນ ຕິດພັນກັບ 4 ແຜນງານຂອງຂະແໜງ(ແຜນງານຄໍ້າປະກັນສະບຽງອາຫານ ແລະ ໂພຊະນາການ, ແຜນງານການຜະລິດເປັນສິນຄ້າ, ແຜນງານຄຸ້ມຄອງປ່າໄມ້ ແລະ ຊັບພະຍາກອນປ່າໄມ້ ແລະ ແຜນງານພັດທະນາຊົນນະບົດ ແລະ ແກ້ໄຂຄວາມທຸກຍາກ). ດ້ານສະບຽງອາຫານ ແລະ ໂພຊະນາການ:ສືບຕໍ່ສຸມໃສ່ການຜະລິດຮັບໃຊ້ພາຍໃນ ໃຫ້ສາມາດກຸ້ມທ້ອງຖິ່ນຂອງຕົນ; ສືບຕໍ່ຍູ້ແຮງການຜະລິດພາຍໃນ ເພື່ອທົດແທນການນໍາເຂົ້າ ແລະ ເປັນສິນຄ້າສົ່ງອອກ ໃຫ້ຫຼາຍຂຶ້ນ; ຟື້ນຟູ ແລະ ປັບປຸງ ໂຄງລ່າງພື້ນຖານການຜະລິດກະສິກຳ ໃຫ້ມີປະສິດທິພາບສູງ; ຍົກລະດັບສູນຄົ້ນຄວ້າ ແລະ ການສະໜອງທຶນໃຫ້ແກ່ສູນບໍລິການເຕັກນິກກະສິກຳແນໃສ່ສະໜອງແນວພັນພືດ-ແນວພັນສັດ ແລະ ເຕັກນິກວິຊາການ ໃຫ້ແກ່ຜູ້ທຳການຜະລິດ ເພື່ອຫຼຸດຜ່ອນຕົ້ນທຶນການຜະລິດ, ເພີ່ມຜົນຜະລິດທີ່ມີຄຸນນະພາບ ແລະ ລາຄາ ທີ່ສາມາດແຂ່ງຂັນກັບປະເທດອ້ອມຂ້າງ ແລະ ສາກົນ;ສຸມໃສ່ປະຕິບັດ 2 ນະໂຍບາຍ ຄື: ນະໂຍບາຍແຫ່ງຊາດ ວ່າດ້ວຍການສົ່ງເສີມການລ້ຽງສັດ-ສັດນ້ຳ ແລະ ນະໂຍບາຍແຫ່ງຊາດ ວ່າດ້ວຍການສົ່ງເສີມການປູກພືດ;ສືບຕໍ່ປັບປຸງນິຕິກໍາ ກ່ຽວກັບການເກັບຊື້ຜົນຜະລິດກະສິກໍາໃຫ້ເຂົ້າສູ່ລະບຽບ, ບໍ່ຄວນອະນຸຍາດໃຫ້ມີການເກັບຊື້ ແລະ ສົ່ງອອກແບບຊະຊາຍ ໂດຍຄວບຄຸມບໍ່ໄດ້; ເອົາໃຈໃສ່ຄຸ້ມຄອງປົກປັກຮັກສາ 3 ປະເພດປ່າ ລວມທັງທີ່ດິນປ່າໄມ້ ບໍ່ໃຫ້ຖືກບຸກລຸກຈັບຈອງໂດຍສະເພາະ ປ່າສະຫງວນ, ປ່າປ້ອງກັນຍອດນໍ້າ, ທັງເຂັ້ມງວດໃນການຈັດຕັ້ງປະຕິບັດຄໍາສັ່ງເລກທີ15/ນຍ ແລະ ຄຳສັ່ງ 11/ນຍ; ຈັດຕັ້ງຜັນຂະຫຍາຍ ດຳລັດ 01/ລບ ວ່າດ້ວຍປ່າປ້ອງກັນ ແລະ ດຳລັດ02/ລບ ວ່າດ້ວຍປ່າຜະລິດ ເພື່ອສົ່ງເສີມການປູກໄມ້ ແລະ ຟື້ນຟູປ່າໄມ້, ພ້ອມທັງຄຸ້ມຄອງການນໍາໃຊ້ປ່າໄມ້ ແລະ ເຄື່ອງປ່າຂອງດົງ ໃຫ້ມີຄວາມຍືນຍົງ; ສົ່ງເສີມການອະນຸລັກປ່າໄມ້ ດ້ວຍຮູບແບບຫັນເປັນໂຄງການສິນເຊື່ອກາກບອນ ທີ່ຕິດພັນກັບການທ່ອງທ່ຽວທຳມະຊາດ. ສຳລັບວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ:ສືບຕໍ່ລົງສູ່ຮາກຖານຕົວຈິງ ໂດຍຕິດແທດກັບປະຊາຊົນ-ຊາວກະສິກອນເພື່ອຊອກຫາວິທີແກ້ໄຂບັນຫາຖືກກັບສະພາບຕົວຈິງ; ສ້າງແຜນການ, ຊຸກຍູ້, ຕິດຕາມ, ກວດກາ ແລະ ປະເມີນການຈັດຕັ້ງປະຕິບັດວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມນິຕິກຳທີ່ກຳນົດໄວ້; ສົມທົບກັບຂະແໜງການແລະ ທ້ອງຖິ່ນກ່ຽວຂ້ອງ ເພື່ອກວດກາຄືນ ໂຄງການພັດທະນາຊົນນະບົດ, ການກຳນົດຈຸດສຸມ, ການສຸມທຶນຮອນ ເພື່ອໃຫ້ມີບ້ານຕົວແບບດ້ານຕ່າງໆຫຼາຍຂຶ້ນ ແລະ ສາມາດລຶບລ້າງຄວາມທຸກຍາກ ຂອງປະຊາຊົນເປັນກ້າວໆ; ປະເມີນ ແລະ ດັດສົມບັນດາໂຮງງານ ທີ່ຂະແໜງກະສິກຳ ແລະ ປ່າໄມ້ຄຸ້ມຄອງໃຫ້ສອດຄ່ອງກັບຄວາມສາມາດຕົວຈິງ;ສຸມໃສ່ຄົ້ນຄວ້າປັບປຸງບັນດານິຕິກໍາ, ກົນໄກຂັ້ນຂອດການອະນຸມັດການລົງທຶນໃຫ້ໂລ່ງລ່ຽນ,ວ່ອງໄວ, ສ້າງສະພາບແວດລ້ອມ, ອຳນວຍຄວາມສະດວກໃຫ້ແກ່ນັກລົງທຶນ ແລະ ຜູ້ປະກອບການໃຫ້ຫຼາຍຂຶ້ນ;ປັບປຸງກໍາລັງການຜະລິດ, ກຸ່ມສະຫະກອນ, ສະມາຄົມ. ເພື່ອຍົກສູງຄວາມສາມາດການຜະລິດ ແລະ ຈຳໜ່າຍຜົນຜະລິດ; ສືບຕໍ່ປັບປຸງກົງຈັກການຈັດຕັ້ງ ໄປຕາມທິດ ກະທັດຮັດ, ໂປ່ງໃສ ແລະ ມີປະສິດທິພາບ; ຕັ້ງໜ້າພັດທະນາຊັບພະຍາກອນມະນຸດ ໃນດ້ານເຕັກນິກຕ່າງໆ ເພື່ອສາມາດຕອບສະໜອງໄດ້ຄວາມຮຽກຮ້ອງຕ້ອງການຂອງວຽກງານ.
ຂ່າວ ແລະ ພາບ: ກົມປະຊາສຳພັນ ຫສນຍ.