ທ່ານ ພັນໂທ ສົມສົດ ແສງອາພອນ ກຳມະການພັກແຂວງ ເລຂາພັກເມືອງ ເຈົ້າເມືອງທ່າພະບາດ ໄດ້ໃຫ້ສຳພາດຕໍ່ນັກຂ່າວໜັງສືພິມປະຊາຊົນໃນວັນທີ 3 ມີນາຜ່ານມາ ທີ່ຫ້ອງວ່າການປົກຄອງເມືອງທ່າພະບາດ ແຂວງບໍລິຄຳໄຊ ທ່ານກ່າວວ່າ: ຕໍ່ກັບການກະກຽມກອງປະຊຸມໃຫຍ່ 3 ຂັ້ນຂອງອົງຄະນະພັກເມືອງທ່າພະບາດ ພາຍຫຼັງໄດ້ຮັບຄຳສັ່ງຈາກຄະນະເລຂາທິການສູນກາງພັກວ່າດ້ວຍການກະກຽມກອງປະຊຸມໃຫຍ່ 3 ຂັ້ນ ສະບັບເລກທີ 411 ແລະ ໄດ້ຮັບຄຳແນະນຳຈາກຄະນະຈັດຕັ້ງສູນກາງພັກສະບັບເລກທີ 211 ແລະ ຮັບຄຳແນະນຳຈາກຄະນະປະຈຳພັກແຂວງ ສະບັບເລກທີ 402, ມະຕິຂອງຄະນະປະຈຳພັກແຂວງ ສະບັບເລກທີ 375 ແລະ ຄຳແນະນຳຂອງຄະນະຈັດຕັ້ງແຂວງສະບັບເລກທີ 883. ຈາກນັ້ນອົງຄະນະພັກເມືອງທ່າພະບາດຈຶ່ງໄດ້ອອກຄຳສັ່ງແນະນຳວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນໃນທົ່ວອົງຄະນະພັກເມືອງທ່າພະບາດສະບັບເລກທີ 1891/ຄອສພ, ລົງວັນທີ 6 ຕຸລາ 2023 ແລະ ມະຕິຂອງຄະນະປະຈຳພັກເມືອງທ່າພະບາດລົງວັນທີ 23 ຕຸລາ 2023 ວ່າດ້ວຍການແຕ່ງຕັ້ງຄະນະຮັບຜິດຊອບໃນການຫ້າງຫາກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນໃນທົ່ວອົງຄະນະພັກເມືອງທ່າພະບາດ ເປັນຕົ້ນແມ່ນໄດ້ແຕ່ງຕັ້ງຄະນະຊີ້ນໍາລວມ, ຄະນະຮັບຜິດຊອບກະກຽມເນື້ອໃນບົດມະຕິຂອງກອງປະຊຸມໃຫຍ່ ແລະ ແຜນພັດທະນາເສດຖະກິດ-ສັງຄົມ. ຈາກນັ້ນໄດ້ມີການແຕ່ງຕັ້ງບັນດາອະນຸກຳມະການຊ່ວຍວຽກຕ່າງໆຈຳນວນໜຶ່ງເຊັ່ນ: ອະນຸກຳມະການຂະບວນການ, ພິທີການ, ສະຖານທີ່ ແລະ ຮັບແຂກ, ອະນຸກຳມະການເສດຖະກິດ, ຍ້ອງຍໍ, ປ້ອງກັນຊາດ, ປ້ອງກັນຄວາມສະຫງົບ ແລະ ອະນຸກຳມະການຮັກສາສຸຂະພາບ ເພື່ອພ້ອມກັນສ້າງແຜນດຳເນີນງານຂອງເມືອງສະບັບລົງວັນທີ 5 ມັງກອນ 2024. ຈາກນັັັັັັັັັັ້ນໄດ້ເປີດກອງປະຊຸມຜ່ານມະຕິ ພ້ອມທັງໄດ້ມອບຄວາມຮັບຜິດຊອບໃຫ້ແຕ່ລະອະນຸກຳມະການໃນການຈັດຕັ້ງ, ຊີ້ນຳ, ນຳພາໃນການປະຕິບັດ. ຜ່ານການຫ້າງຫາກະກຽມຕໍ່ກອງປະຊຸມໃຫຍ່ 3 ຂັ້ນທົ່ວອົງຄະນະພັກເມືອງທ່າພະບາດ ອັນທີ 1 ໄດ້ສຸມໃສ່ສັບຊ້ອນພະນັກງານຫຼັກແຫຼ່ງຂອງເມືອງ ຊຶ່ງລວມມີ 33 ສະຫາຍ ຍິງ 3 ສະຫາຍເພື່ອລົງກໍ່ສ້າງຮາກຖານການເມືອງ ໂດຍສະເພາະເນັ້ນໃສ່ການປັບປຸງໜ່ວຍພັກບ້ານກໍຄືອົງການປົກຄອງບ້ານໃຫ້ມີຄວາມເຂັ້ມແຂງ. ສະນັ້ນ, ມາຮອດປັດຈຸບັນນີ້, ທົ່ວເມືອງທ່າພະບາດມີທັງໝົດ 26 ບ້ານ, ໄດ້ເປີດກອງປະຊຸມໃຫຍ່ຂັ້ນບ້ານ ແລະ ປັບປຸງອົງການປົກຄອງບ້ານຕາມ 5 ໜ່ວຍງານສຳເລັດແລ້ວ 25 ບ້ານ ຍັງເຫຼືອ 1 ບ້ານຄາດວ່າຈະໃຫ້ສຳເລັດໃນກາງເດືອນມີນາ 2024, ວຽກຈຸດສຸມອັນທີສອງ ພາຍຫຼັງສຳເລັດກ່ຽວກັບການເປີດກອງປະຊຸມໃຫຍ່ຂັ້ນບ້ານແລ້ວ, ການປັບປຸງອຳນາດການປົກຄອງຕາມ 5 ໜ່ວຍງານທາງຄະນະປະຈຳພັກເມືອງຈະໄດ້ມີການສະຫຼຸບຖອດຖອນບົດຮຽນຕີລາຄາໃນການປັບປຸງການຈັດຕັ້ງກໍຄືໜ່ວຍພັກຢູ່ຂັ້ນບ້ານເຫັນວ່າມີດ້ານດີ, ດ້ານອ່ອນ, ຂໍ້ຄົງຄ້າງຄືແນວໃດເພື່ອວາງແຜນສືບຕໍ່ຈັດຕັ້ງປະຕິບັດໃນຂັ້ນຕໍ່ໄປ. ພາຍຫຼັງສ້າງແຜນດຳເນີີນງານກະກຽມໃຫ້ແກ່ການເປີດກອງປະຊຸມໃຫຍ່ໜ່ວຍພັກຕ່າງໆອ້ອມຂ້າງເມືອງ ບວກກັບສອງກອງບັນຊາການແລ້ວຄາດວ່າຈະເລີ່ມຈັດຕັ້ງປະຕິບັດໃນກາງເດືອນມີນາຈະເປີດກອງປະຊຸມໃຫຍ່ໜ່ວຍພັກອ້ອມຂ້າງເມືອງບວກກັບກອງປະຊຸມໃຫຍ່ຂອງໜ່ວຍພັກຮາກຖານຄາດວ່າຈະໃຫ້ສຳເລັດໃນທ້າຍປີ 2024, ຈຸດສຸມອັນທີ່ສາມ ສືບຕໍ່ສ້າງຂະບວນການດ້ານຕ່າງໆໃຫ້ແກ່ການຫ້າງຫາກະກຽມໃຫ້ແກ່ການເປີດກອງປະຊຸມໃຫຍ່ອົງຄະນະພັກເມືອງທ່າພະບາດຄັ້ງທີ VII ຄາດວ່າຈະໄດ້ຈັດຂຶ້ນໃນກາງປີ 2025 ຕາມແຈ້ງການຂອງຄະນະພັກຂັ້ນເທິງ.
ຂ່າວ: ພູວັນ, ພາບ: ແສງຈັນ
ຂ່າວ: ພູວັນ, ພາບ: ແສງຈັນ
ຄໍາເຫັນ