ທາບທາມ ຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງ ແລະ ເຜີຍແຜ່ກົດໝາຍວ່າດ້ວຍກວດກາລັດ(ສະບັບປັບປຸງ)

ຊຸດສໍາມະນາເຜີຍແຜ່ກົດໝາຍວ່າດ້ວຍການກວດກາລັດ(ສະບັບປັບປຸງ) ແລະ ທາບທາມຄໍາເຫັນໃສ່ຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງ (ສະບັບປັບປຸງ) ແລະ ຮ່າງຍຸດທະສາດຕ້ານການສໍ້ລາດບັງຫຼວງແຕ່ປີ 2023-2030 ໄດ້ຈັດຂຶ້ນໃນວັນທີ 18 ທັນວານີ້, ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງໄຊຍະບູລີ ໂດຍການເປັນປະທານຂອງທ່ານ ສົມຫວັງ ແກ້ວວິໄລສັກ ກໍາມະການປະຈໍາພັກແຂວງ ປະທານອົງການກວດກາພັກແຂວງ ປະທານອົງການກວດກາລັດ ຫົວໜ້າອົງການຕ້ານການສໍ້ລາດບັງຫຼວງ, ໃຫ້ກຽດເຂົ້າຮ່ວມຂອງທ່ານ ດວງຕາ ໄຊວຸດ ຮອງເລຂາພັກແຂວງ, ທ່ານ ວັນຄໍາ ໄຊວົງສັກ ຫົວໜ້າກົມຄົ້ນຄວ້າ ແລະ ວາລະສານກວດກາອົງການກວດກາແຫ່ງລັດ, ມີຮອງຫົວໜ້າພະແນກການຂອງແຂວງ, ທີມງານຈາກສູນກາງ, ບັນດາຫົວໜ້າຂະແໜງກວດກາອ້ອມຂ້າງແຂວງ ແລະ 11 ເມືອງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ.
ໃນພິທີ ທ່ານ ສົມຫວັງ ແກ້ວວິໄລສັກ ປະທານອົງການກວດກາພັກແຂວງ ປະທານອົງການກວດກາລັດແຂວງໄດ້ກ່າວເປີດກອງປະຊຸມ ຊຶ່ງໄດ້ຍົກໃຫ້ເຫັນບາງຕອນວ່າ:ໂດຍປະຕິບັດຕາມ ແຜນການສ້າງ ແລະ ປັບປຸງກົດໝາຍ 5 ປີ ຂອງສະພາແຫ່ງຊາດ ຊຸດທີ IX (2021-2025) ສະບັບເລກທີ 03/ສພຊ, ລົງວັນທີ 26 ມີນາ 2021 ແລະ ແຜນການເຄື່ອນໄຫວລົງເຜີຍແຜ່ກົດໝາຍວ່າດ້ວຍ ການສະກັດກັ້ນ ແລະ ຕ້ານການສໍ້ລາດບັງຫຼວງ (ສະບັບປັບປຸງ) ຂອງອົງການກວດກາແຫ່ງລັດ ສະບັບເລກທີ 427/ອກຫລ, ລົງວັນທີ 7 ທັນວາ 2023 ຈຶ່ງໄດ້ຈັດກອງປະຊຸມສໍາມະນາເຜີຍແຜ່ກົດໝາຍວ່າດ້ວຍ ການກວດກາລັດ (ສະບັບປັບປຸງ) ແລະ ທາບທາມຄໍາເຫັນໃສ່ຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງ (ສະບັບປັບປຸງ), ຮ່າງຍຸດທະສາດ ຕ້ານການສໍ້ລາດບັງຫຼວງ ແຕ່ປີ 2023-2030 ດັ່ງທີ່ທ່ານຮູ້ແລ້ວວ່າ ກົດໝາຍວ່າດ້ວຍ ການກວດກາລັດ ທີ່ສະພາແຫ່ງຊາດ ໄດ້ຮັບຮອງ ສະບັບເລກທີ 25/ສພຊ, ໃນປີ 2022 ; ອົງການກວດກາແຫ່ງລັດ ຈຶ່ງໄດ້ນໍາເອົາມາເຜີຍແຜ່ໃຫ້ການນໍາແຂວງ, ພະນັກງານຫຼັກແຫຼ່ງ, ພະນັກງານອົງການກວດກາລັດແຂວງ ແລະ ເມືອງ ໃຫ້ເຂົ້າໃຈຕໍ່ພາລະບົດບາດ ຂອງອົງການກວດກາແຕ່ລະຂັ້ນ. ບັນດາທ່ານ ທີ່ເຂົ້າຮ່ວມກອງປະຊຸມ ໄດ້ພ້ອມກັນປະກອບຄໍາຄິດ, ຄໍາເຫັນໃສ່ຮ່າງກົດໝາຍວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງ (ສະບັບປັບປຸງ), ຮ່າງຍຸດທະສາດ ຕ້ານການສໍ້ລາດບັງຫຼວງ ແຕ່ປີ 2023-2030. ຊຶ່ງກົດໝາຍວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງສະບັບເກົ່າປະກອບມີ 10 ໝວດ ແລະ 64 ມາດຕາ ແລະ ໄດ້ປັບປຸງໃໝ່ມາເປັນ 12 ພາກ 88 ມາດຕາ; ກົດໝາຍວ່າດ້ວຍການກວດກາລັດສະບັບເກົ່າປະກອບມີ 10 ພາກ ແລະ 80 ມາດຕາ ປັບປຸງໃໝ່ມາເປັນ 9 ພາກ ແລະ 81 ມາດຕາ. ສະນັ້ນ ກອງປະຊຸມສຳມະນາທີ່ກ່າວມານັ້ນ ມັນຮຽກຮ້ອງ ໃຫ້ບັນດາທ່ານຜູ້ເຂົ້າຮ່ວມກອງປະຊຸມທັງໝົດ ຈົ່ງພ້ອມກັນຍົກສູງຄວາມຮັບຜິດຊອບ, ເສີມຂະຫຍາຍ ສະຕິປັນຍາ, ຄວາມຮູ້, ຄວາມສາມາດ, ບົດຮຽນ ແລະ ປະສົບການຕົວຈິງ ເຂົ້າໃນການຄົ້ນຄວ້າປະກອບຄຳຄິດຄຳເຫັນໃສ່ຮ່າງກົດໝາຍ ວ່າດ້ວຍການສະກັດກັ້ນ ແລະ ຕ້ານການສໍ້ລາດບັງຫຼວງ ສະບັບປັບປຸງນີ້ ໃຫ້ຄົບຖ້ວນສົມບູນ ຕາມຫຼັກການສ້າງ ແລະ ປັບປຸງກົດໝາຍ ແລະ ໃຫ້ສຳເລັດຕາມຈຸດປະສົງຄາດໝາຍວາງໄວ້ ທັງໝົດນັ້ນ ເພື່ອໃຫ້ສອດຄ້ອງກັບສະພາບຄວາມເປັນຈິງເປັນເອກະພາບກັນ ແລະ ທັນກັບເວລາ.(ຂ່າວ+ພາບ: ບຸນທີ)