ທາບທາມຄຳຄິດເຫັນໃສ່ຮ່າງດໍາລັດວ່າດ້ວຍການສົ່ງເສີມທຸລະກິດສະຕາດອັບ

ກົມເຕັກໂນໂລຊີ ແລະ ນະວັດຕະກໍາ, ກະຊວງເຕັກໂນໂລຊີ ແລະ ການສື່ສານ (ກຕສ) ໄດ້ເປີດກອງປະຊຸມເປີດກວ້າງທາບທາມຄຳຄິດເຫັນໃສ່ຮ່າງເນື້ອໃນຂອງດໍາລັດວ່າດ້ວຍການສົ່ງເສີມທຸລະກິດແບບທຸລະກິດສະຕາດອັບ (Startup) ຂຶ້ນເມື່ອວັນທີ 22 ມີນາຜ່ານມາທີ່ສະພາປະຊາຊົນແຂວງຫຼວງພະບາງ ພາຍໃຕ້ການເປັນປະທານຮ່ວມຂອງທ່ານ ສັນຕິສຸກ ສິມມາລາວົງຮອງລັດຖະມົນຕີກະຊວງເຕັກໂນໂລຊີ ແລະ ການສື່ສານແລະ ທ່ານ ນາງ ສີລິພອນ ສຸພັນທອງ ຮອງເຈົ້າແຂວງຫຼວງພະບາງຜູ້ຊີ້ນຳວຽກເສດຖະກິດ, ມີບັນດາຜູ້ຕາງໜ້າພະແນກອ້ອມຂ້າງແຂວງ ແລະ ມາຈາກພະແນກເຕັກໂນໂລຊີ ແລະ ການສື່ສານ 10 ແຂວງ ແລະບັນດານັກທຸລະກິດ SME ຂະໜາດນ້ອຍ ແລະ ກາງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ສັນຕິສຸກ ສິມມາລາວົງໄດ້ກ່າວວ່າ: ໃນຍຸກການພັດທະນາເສດຖະກິດດີຈີຕອນ ກໍຄືຍຸກປັດຈຸບັນນີ້ ໄດ້ມີການພັດທະນາ ແລະ ນຳໃຊ້ວິທະຍາສາດ, ເຕັກໂນໂລຊີ ແລະ ນະວັດຕະກຳທີ່ກ້າວໜ້າ ທັນສະໄໝ ເຂົ້າໃນການດຳເນີນທຸລະກິດການຄ້າ, ການຜະລິດ, ການບໍລິການ ແລະ ການພົວພັນສັງຄົມ ຊຶ່ງເຮັດໃຫ້ບັນດາທຸລະກິດດັ່ງກ່າວໄດ້ມີການເຕີບໂຕຢ່າງວ່ອງໄວ ແລະ ຂະຫຍາຍຕົວແບບກ້າວກະໂດດ, ສ້າງລາຍຮັບອັນມະຫາສານໃຫ້ແກ່ດຳເນີນທຸລະກິດໃນໄລຍະເວລາອັນສັ້ນ ແລະ ສ້າງບົດບາດອັນໃໝ່ທີ່ຍິ່ງໃຫຍ່ ຕໍ່ກັບການພັດທະນາເສດຖະກິດ-ສັງຄົມຂອງໂລກ ເປັນຕົ້ນ Alibaba, Facebook, WhatsApp, TikTok ແລະ ອື່ນໆ ຊຶ່ງສັງຄົມທົ່ວໄປເຂົ້າໃຈ ແລະ ມັກເອີ້ນກັນວ່າ: ທຸລະກິດແບບສະຕາດອັບ. 
ສຳລັບ ສປປ ລາວ ກໍເຫັນໄດ້ວ່າ ໃນຊຸມປີ 2000 ເປັນຕົ້ນມາ ໄດ້ມີທຸລະກິດຮູບແບບໃໝ່ເກີດຂຶ້ນຢ່າງຫຼວງຫຼາຍ ເປັນຕົ້ນແມ່ນ: ທຸລະກິດ-ທຸລະກຳທາງດ້ານການເງິນ, ການຄ້າ, ການບໍລິການ ເຊັ່ນ: ລະບົບການບໍລິການທະນາຄານ BCEL One,ຂົນສົ່ງຮຸ່ງອາລຸນ, ຂົນສົ່ງອານຸສິດ, ໂລກາບໍລິການລົດແທັກຊີ ແລະ ອື່ນໆ. ໂດຍບັນດາທຸລະກິດເຫຼົ່ານີ້ ລ້ວນແລ້ວແຕ່ໄດ້ສ້າງການປ່ຽນແປງໃໝ່ດ້ານການຄ້າ ແລະ ການບໍລິການທີ່ບໍ່ເຄີຍມີມາກ່ອນໃນ ສປປ ລາວ ແລະ ເຫັນວ່າມີການເຕີບໂຕ ແລະ ພັັດທະນາຢ່າງວ່ອງໄວ. ສະນັ້ນ, ການສ້າງດຳລັດ ວ່າດ້ວຍການສົ່ງເສີມທຸລະກິດແບບສະຕາດອັບສະບັບນີ້ ຈະເປັນເຄື່ອງມືດ້ານນິຕິກຳທີ່ສຳຄັນ ເພື່ອຮັບໃຊ້ໃຫ້ແກ່ວຽກງານສົ່ງເສີມທຸລະກິດແບບສະຕາດອັບ ໃນ ສປປ ລາວ ໃຫ້ນັບມື້ນັບຫຼາຍຂຶ້ນ ພ້ອມທັງຮັບປະກັນການຄຸ້ມຄອງ, ຕິດຕາມ, ກວດກາຄວາມສອດຄ່ອງໃນການດຳເນີນທຸລະກິດ ທີ່ຕິດພັນກັບພັດທະນາເສດຖະກິດ-ສັງຄົມຂອງຊາດ.
ຂ່າວ-ພາບ: ກຕສ