ທິດທາງການນຳພາຂອງຄະນະພັກແຂວງວຽງຈັນ ໄດ້ຊ່ວຍເຮັດໃຫ້ບັນດາທຸລະກິດມີຄວາມໝັ້ນໃຈໃນການລົງທຶນຫຼາຍຂຶ້ນ
ໃນໂອກາດດໍາເນີນກອງປະຊຸມໃຫຍ່ຜູ້ແທນອົງຄະນະພັກແຂວງວຽງຈັນ ຄັ້ງທີ VII ໃນລະຫວ່າງວັນທີ 15-16 ຕຸລາ ຜ່ານມາ, ທ່ານ ຄໍາໄພ ສົມຊະນະ ປະທານບໍລິສັດກຸ່ມ ຄໍາໄພຊະນະ ຈໍາກັດຜູ້ດຽວ ໄດ້ໃຫ້ສຳພາດຕໍ່ສື່ມວນຊົນວ່າ: ການເຂົ້າຮ່ວມກອງປະຊຸມຄັ້ງນີ້ ເປັນໂອກາດດີໃຫ້ພວກເຮົາໄດ້ຮັບຮູ້ທິດທາງໃໝ່ໆ ຈາກພັກ-ລັດ ໃນການພັດທະນາເສດຖະກິດທ້ອງຖິ່ນ. ໃນໄລຍະ 5 ປີ ຜ່ານມາ ພາຍໃຕ້ຄວາມເອົາໃຈໃສ່ນໍາພາ-ຊີ້ນໍາຂອງຄະນະບໍລິຫານງານພັກແຂວງ, ການຈັດຕັ້ງພັກ-ລັດທຸກຂັ້ນ ເຫັນວ່າແຂວງວຽງຈັນກໍຍັງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍຢ່າງໜັກແໜ້ນ ແລະ ເສດຖະກິດຂອງແຂວງຕະຫຼອດ 5 ປີ ຍັງສືບຕໍ່ຂະຫຍາຍຕົວຢ່າງຕໍ່ເນື່ອງ ຊຶ່ງເຮັດໃຫ້ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການພັດທະນາດີຂຶ້ນເປັນແຕ່ລະໄລຍະ ແລະ ເຊື່ອໝັ້ນວ່າ ຄະນະບໍລິຫານງານພັກແຂວງຊຸດໃໝ່ ຈະສືບຕໍ່ຊຸກຍູ້ບັນດານັກທຸລະກິດມີຄວາມໝັ້ນໃຈໃນການລົງທຶນຫຼາຍຂຶ້ນ, ໂດຍສະເພາະໃນຂະແໜງການຜະລິດ, ການທ່ອງທ່ຽວ ແລະ ການຄ້າ. ການຮ່ວມມືລະຫວ່າງພາກລັດ ແລະ ເອກະຊົນ ແມ່ນຫົວໃຈສຳຄັນຂອງຄວາມສຳເລັດ ໃນການພັດທະນາຊີວິດການເປັນຢູ່ຂອງປະຊາຊົນ ກໍຄືການພັດທະນາເສດຖະກິດ-ສັງຄົມຢູ່ແຂວງວຽງຈັນ ໃຫ້ກ້າວໄປຂ້າງໜ້າ.
ທ່ານຍັງໄດ້ເວົ້າວ່າ: ສຳລັບການປະກອບສ່ວນຂອງຂ້າພະເຈົ້າໃຫ້ແຂວງວຽງຈັນ ແມ່ນໄດ້ກໍ່ສ້າງຕຶກຫ້ອງວ່າການແຂວງ 6 ຊັ້ນ ໃຊ້ເວລາກໍ່ສ້າງ 10-11 ປີ ຂ້າພະເຈົ້າຂໍຂອບໃຈຕໍ່ການນຳຂອງແຂວງວຽງຈັນ ພ້ອມດ້ວຍຄະນະ ທີ່ມີຄວາມສາມັກຄືເອກະພາບກັນ ເຮັດໃຫ້ບໍລິສັດຂອງຂ້າພະເຈົ້າສຳເລັດໄດ້ກໍຍ້ອນກຳລັງໃຈ ແລະ ການໃຫ້ກຽດ ແລະ ສັກສີແມ່ນສຳຄັນທີ່ສຸດ ຖ້າຄົນມີກຽດ ແລະ ສັກສີແລ້ວຖ້າຍັງຢຶດໝັ້ນຈຸດນັ້ນເປັນສິ່ງສຳຄັນ ເຮັດຫຍັງກໍສຳເລັດ, ຖ້າຄົນເຮົາຫາກບໍ່ມີກຽດ ແລະ ສັກສີ ເຮັດຫຍັງກໍບໍ່ສຳເລັດ ສະນັ້ນ ການສອນລູກ, ສອນຫຼານ ສິ່ງໃດຖືກຕ້ອງ, ສິ່ງໃດສັງຄົມ ປະຊາຊົນ ພັກ-ລັດ ຍອມຮັບແມ່ນເຮັດ ແລະ ຝາກຝັງເຖິງລູກຫຼານຜູ້ທີ່ຈະສືບຕໍ່ເປັນນັກທຸລະກິດທີ່ດີຂອງຊາດ ຕ້ອງເຂົ້າລົບກົດໝາຍບ້ານເມືອງ ເຮັດແນວໃດເອົາປະເທດຊາດ, ເອົາບ້ານເມືອງເປັນຫຼັກ ແລະ ການເຂົ້າຮ່ວມກອງປະຊຸມ ຄັ້ງນີ້ ແລະ ຢືນຢັນວ່າຈະນຳແນວທາງ, ນະໂຍບາຍ ມະຕິຂອງກອງປະຊຸມໃຫຍ່ຜູ້ແທນອົງຄະນະພັກແຂວງຄັ້ງນີ້ ໄປຜັນຂະຫຍາຍ ຈັດຕັ້ງປະຕິບັດໃຫ້ແທດເໝາະໃນການດຳເນີນທຸລະກິດ ສອດຄ່ອງກັບແຜນພັດທະນາຂອງແຂວງ.
ໂດຍ: ບຸນຕອມ.
ຄໍາເຫັນ