ທິດທາງໃນການພັດທະນາວຽກງານກໍາມະບານລາວໃນຕໍ່ໜ້າ

ໂດຍ:ວັນໄຊ ຕະວິນຍານ
 ສະຫະພັນກໍາມະບານແຕ່ລະຂັ້ນຕ້ອງສືບຕໍ່ຢຶດໝັ້ນ ແລະ ປະຕິບັດຕາມແນວທາງປ່ຽນແປງໃໝ່ຮອບດ້ານທີ່ມີຫຼັກການຂອງພັກຢ່າງໜັກແໜ້ນ, ເອົາໃຈໃສ່ປະຕິບັດໃຫ້ບັນລຸຈຸດປະສົງ, ເປົ້າໝາຍມະຕິກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດ ຄັ້ງທີ VIII ແລະ ສອດຄ່ອງກັບມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ ແຫ່ງຊາດ ຄັ້ງທີ IX, ມະຕິກອງປະຊຸມໃຫຍ່ຜູ້ແທນກໍາມະບານລາວທົ່ວປະເທດ ຄັ້ງທີ VIII, ແຜນພັດທະນາວຽກງານກໍາມະບານ 5 ປີຄັ້ງທີ IV ຈະເປັນບ່ອນອີງໃນການເຄື່ອນໄຫວວຽກງານກໍາມະບານແຕ່ລະຂັ້ນໃຫ້ມີຄວາມເປັນເອກະພາບແຕ່ສູນກາງລົງຮອດຮາກຖານໃນຂອບເຂດທົ່ວປະເທດ, ເພື່ອຈັດຕັ້ງຜັນຂະຫຍາຍບັນດາມະຕິທີ່ກ່າວມາຂ້າງເທິງໃຫ້ມີຜົນສໍາເລັດ ສະຫະພັນກໍາມະບານແຕ່ລະຂັ້ນຕ້ອງໄດ້ເອົາໃຈໃສ່ບາງບັນຫາຕົ້ນຕໍດັ່ງນີ້: 
1) ເພີ່ມທະວີການໂຄສະນາສຶກສາອົບຮົມການເມືອງ-ແນວຄິດ ໃຫ້ສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານຮັບຮູ້, ເຊື່ອມຊຶມແນວທາງແຜນນະໂຍບາຍຂອງພັກ, ກົດໝາຍຂອງລັດ, ເສີມຂະຫຍາຍຄຸນລັກສະນະດີເລີດຂອງຊົນຊັ້ນກໍາມະກອນ, ມີນ້ໍາໃຈຮັກຊາດ, ມີລະບຽບວິໄນໃນການອອກແຮງງານ, ມີຄວາມຕື່ນຕົວທາງດ້ານການເມືອງ, ມີຄວາມຮູ້, ຄວາມສາມາດທາງດ້ານວິທະຍາສາດ-ເຕັກໂນໂລຊີ, ປະຕິບັດພາລະບົດບາດ, ສິດ, ໜ້າທີ່ ແລະ ພັນທະຂອງຕົນ; ເຕົ້າໂຮມຄວາມສາມັກຄີ, ປຸກລະດົມຂົນຂວາຍສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານລາວປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ; 
2). ເຊີດຊູບົດບາດ ແລະ ປັບປຸງການຈັດຕັ້ງກໍາມະບານແຕ່ລະຂັ້ນ ໃຫ້ມີຄວາມເຂັ້ມແຂງ ເພື່ອປຸກລະດົມຂົນຂວາຍ ກໍາມະກອນ, ຜູ້ອອກແຮງງານ ເຂົ້າຢູ່ໃນການຈັດຕັ້ງກໍາມະບານໃຫ້ຫຼາຍຂຶ້ນກວ່າເກົ່າ, ໂດຍສະເພາະແມ່ນເຂົ້າສູ່ຫົວໜ່ວຍແຮງງານເອກະຊົນ ກໍຄືການລົງທຶນຂອງຕ່າງປະເທດບ່ອນທີ່ບໍ່ທັນມີອົງການຈັດຕັ້ງກໍາມະບານໃຫ້ນັບມື້ກວ້າງຂວາງ.
3). ເພີ່ມທະວີການບໍາລຸງ, ກໍ່ສ້າງ, ຍົກລະດັບຄວາມຮູ້ ກ່ຽວກັບວຽກງານກໍາມະບານ ແລະ ຄວາມຮູ້ວິທະຍາສາດອື່ນໆ ໃຫ້ແກ່ພະນັກງານກໍາມະບານອາຊີບ, ເຄິ່ງອາຊີບຢູ່ພາຍໃນ ແລະ ສົ່ງໄປຍົກລະດັບຢູ່ຕ່າງປະເທດ. ສະມາຊິກກໍາມະບານ, ກໍາມະກອນຕ້ອງເອົາໃຈໃສ່ຝຶກຝົນຫຼໍ່ຫຼອມຕົນເອງ, ສ້າງແບບແຜນດໍາລົງຊີວິດທີ່ປອດໃສ ແລະ ຮ່ໍາຮຽນຄຸນລັກສະນະດີເລີດຂອງຊົນຊັ້ນກໍາມະກອນລາວ.
4) ຕັ້ງໜ້າຫັນລົງຮາກຖານເພື່ອປັບປຸງການຈັດຕັ້ງກໍາມະບານໃຫ້ໜັກແໜ້ນເຂັ້ມແຂງໂດຍຕິດພັນກັບ 4 ເນື້ອໃນ 4 ຄາດໝາຍທີ່ພັກໄດ້ກໍານົດໄວ້, ຊຸກຍູ້ ແລະ ປັບປຸງການຈັດຕັ້ງກໍາມະບານອາຊີບ, ເຄິ່ງອາຊີບຕາມຂະແໜງການ, ກົງຈັກ ແລະ ໂຄງປະກອບບຸກຄະລາກອນຂອງກໍາມະບານແຕ່ລະຂັ້ນໃຫ້ພຽງພໍ, ສັບຊ້ອນຕໍາແໜ່ງງານຄືນໃໝ່ໃຫ້ສອດຄ່ອງກັບໜ້າທີ່ວຽກງານປັບປຸງແບບແຜນການນໍາພາ, ແບບແຜນວິທີເຮັດວຽກຂອງຄະນະນໍາກໍາມະບານແຕ່ລະຂັ້ນຢ່າງປະດິດສ້າງ.
5). ສະຫະພັນກໍາມະບານລາວທຸກຂັ້ນຕ້ອງເອົາໃຈໃສ່ກໍ່ສ້າງ, ບໍາລຸງກໍາມະກອນໃຫ້ມີພູມປັນຍາ, ມີຄວາມຮູ້, ຄວາມສາມາດ, ມີເຕັກນິກວິທະຍາສາດອັນໃໝ່ໃຫ້ນັບມື້ນັບຫຼາຍຂຶ້ນ, ຊຸກຍູ້ຜູ້ໃຊ້ແຮງງານເອົາໃຈໃສ່ສ້າງ ແລະ ຍົກລະດັບ ສີມືແຮງງານໃຫ້ແກ່ກໍາມະກອນນັບມື້ມີຄຸນນະພາບສູງຂຶ້ນ,ສາມາດຮັບຮອງການເຊື່ອມໂຍງກັບສາກົນໃນການພັດທະນາເສດຖະ
ກິດ-ສັງຄົມ, ກໍ່ສ້າງກໍາມະກອນ ແລະ ຜູ້ອອກແຮງງານໃຫ້ກາຍເປັນກໍາລັງແຮງງານ ປະກອບສ່ວນເຂົ້າໃນການປົກປັກຮັກສາ ແລະ ພັດທະນາປະເທດຊາດ.
6). ເພີ່ມທະວີໃນການຊຸກຍູ້, ຕິດຕາມການສ້າງສັນຍາແຮງງານບຸກຄົນ, ສັນຍາແຮງງານລວມໝູ່ຢູ່ບັນດາຫົວໜ່ວຍແຮງງານເພື່ອປົກປ້ອງສິດ ແລະ ຜົນປະໂຫຍດອັນຊອບທໍາຂອງສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ, ຊຸກຍູ້ການປະຕິບັດພັນທະຕ່າງໆ ລະຫວ່າງ ຜູ້ໃຊ້ແຮງງານ ແລະ ຜູ້ອອກແຮງງານຢ່າງຖືກຕ້ອງຕາມກົດໝາຍ; 
7). ເພີ່ມທະວີການປຸກລະດົມຂົນຂວາຍ, ສ້າງຕັ້ງ ແລະ ຂະຫຍາຍວຽກງານກອງທຶນຊ່ວຍເຫຼືອຊຶ່ງກັນ ແລະ ກັນ ຂອງສະຫະພັນກໍາມະບານລາວໃຫ້ນັບມື້ເຕີບໃຫຍ່ເຂັ້ມແຂງ, ສາມາດຫັນເປັນທຶນໝູນວຽນເຂົ້າໃນການຜະລິດໃຫ້ກາຍເປັນສິນຄ້າສ້າງເສດຖະກິດຄອບ
ຄົວ ເພື່ອພັດທະນາຄຸນນະພາບຊີວິດການເປັນຢູ່ຂອງພະນັກງານ, ສະມາຊິກກໍາມະບານ, ກໍາ ມະກອນ ແລະ ຜູ້ອອກແຮງງານໃຫ້ດີຂຶ້ນ.
8) ປຸກລະດົມຂະບວນການແຂ່ງຂັນ 5 ເປັນເຈົ້າ ຂອງສະຫະພັນກໍາມະບານລາວ ຕິດພັນກັບຂະບວນການຮັກຊາດ ແລະ ພັດທະນາ, ກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ ແລະ ຕິດພັນກັບວຽກງານວິຊາສະເພາະຂອງສະມາຊິກ ກໍາມະບານ, ກໍາມະກອນ ແລະ ຜູ້ອອກແຮງງານໃຫ້ເປັນຂະບວນການຟົດຟື້ນກ້ວາງຂວາງ.
9) ເພີ່ມທະວີການເຄື່ອນໄຫວວຽກງານ, ຕິດຕາມ, ກວດກາກໍາມະບານໃນແຕ່ລະຂັ້ນ ຢ່າງມີແຜນການ ແລະ ຮັບປະກັນຄຸນນະພາບ. ເປັນເຈົ້າການເຂົ້າຮ່ວມແກ້ໄຂປະກົດການຍໍ້ທໍ້ຕ່າງໆໃນຖັນແຖວສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ, ປະກອບສ່ວນເຂົ້າໃນການປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍໃນສັງຄົມ, ອະນຸລັກ ແລະ ເສີມຂະຫຍາຍວັດທະນາະທໍາອັນດີງາມຂອງຊາດລາວເຮົາ.
10). ເພີ່ມທະວີການພົວພັນ, ຮ່ວມມືກັບການຈັດຕັ້ງກໍາມະບານປະເທດເພື່ອນມິດຍຸດທະສາດ,ເພື່ອນມິດສາກົນກໍາມະບານປະເທດຕ່າງໆແລະ ອົງການຈັດຕັ້ງສາກົນໃຫ້ນັບມື້ກວ້າງຂວາງຕາມແນວທາງການຕ່າງປະເທດຂອງພັກ. ເພື່ອຜັນຂະຫຍາຍເນື້ອໃນຄໍາຂວັນ ກໍາມະບານລາວເຂັ້ມແຂງ ທັນສະໄໝ ສາມັກຄີ ມີວິໄນ ນ້ໍາໃຈສາກົນກໍາມະຊີບ ຂອງສະຫະພັນກໍາມະບານລາວ ແລະ ເຮັດສໍາເລັດທິດທາງແຜນການ, ຄາດໝາຍສູ້ຊົນໃນການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນກໍາມະບານລາວ ທົ່ວປະເທດ ຄັ້ງທີ VIII, ແຜນພັດທະນາວຽກງານກໍາມະບານລາວ 5 ປີ ຄັ້ງທີ IV ແລະ ມະຕິກອງປະຊຸມຄົບຄະນະກາງສະໄໝຄະນະບໍລິຫານງານສູນກາງສະຫະພັນກໍາມະບານລາວ ສະໄໝທີ VIII ສະຫະພັນກໍາມະບານແຕ່ລະຂັ້ນຕ້ອງສຸມໃສ່ 9 ແຜນງານ, 51 ໂຄງການ ທີ່ກອງປະຊຸມໃຫຍ່ຜູ້ແທນກໍາມະບານລາວ ທົ່ວປະເທດ ຄັ້ງທີ VIII ໄດ້ຮັບຮອງດັ່ງນີ້:  ແຜນງານທີ1:ພັດທະນາວຽກງານໂຄສະນາສຶກສາອົບຮົມ ປະກອບມີ 7 ໂຄງການ; ແຜນງານທີ 2: ພັດທະນາວຽກງານຂ່າວສານຂອງກໍາມະບານລາວ ປະກອບມີ 6 ໂຄງການ; ແຜນງານທີ 3: ສ້າງຄວາມເຂັ້ມແຂງໃຫ້ແກ່ການຈັດຕັ້ງ ແລະ ບຸກຄະລາກອນ ມີ 5 ໂຄງການ; ແຜນງານທີ 4: ປົກປ້ອງສິດຜົນປະໂຫຍດ ຂອງສະມາຊິກກໍາມະບານ, ກໍາມະກອນ ແລະ ຜູ້ອອກແຮງງານ ປະກອບມີ 7 ໂຄງການ; ແຜນງານທີ 5: ສ້າງຄວາມເຂັ້ມແຂງວຽກງານຄຸ້ມຄອງບໍລິຫານ ຂອງກໍາມະບານ ປະກອບມີ 6 ໂຄງການ; ແຜນງານທີ 6: ຍົກສູງຄຸນນະພາບວຽກງານຂະບວນການ ຂອງສະຫະພັນກໍາມະບານລາວ ປະກອບມີ 4 ໂຄງການ; ແຜນງານທີ 7: ພັດທະນາຊັບພະຍາກອນ ຂອງສະຫະພັນກໍາມະບານລາວ ປະກອບມີ 7 ໂຄງການ; ແຜນງານທີ 8: ພັດທະນາການພົວພັນຮ່ວມມືກັບຕ່າງປະເທດ ປະກອບມີ 4 ໂຄງການ; ແຜນງານທີ 9: ສ້າງຄວາມເຂັ້ມແຂງວຽກງານກວດກາກໍາມະບານລາວ ປະກອບມີ 5 ໂຄງການ.