ທຫລ ເຜີຍແຜ່ນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະນິຕິກໍາທີ່ຕິດພັນຢູ່ແຂວງສາລະວັນ

ທະນາຄານແຫ່ງ ສປປ ລາວ (ທຫລ) ໄດ້ຈັດກອງປະຊຸມເຜີຍແຜ່ການຈັດຕັ້ງປະຕິບັດນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນໃຫ້ແກ່ບັນດາທະນາຄານທຸລະກິດ, ບໍລິສັດ ແລະ ນັກທຸລະກິດພາຍໃນແຂວງສາລະວັນ ຂຶ້ນໃນວັນທີ 29 ພະຈິກຜ່ານມາ ທີ່ທະນາຄານການຄ້າຕ່າງປະເທດລາວມະຫາຊົນສາຂາແຂວງສາລະວັນ ໂດຍການເປັນປະທານຂອງທ່ານ ນວນຕາ ແກ້ວມະນີ ຫົວໜ້າທະນາຄານແຫ່ງ ສປປ ລາວ ພາກໃຕ້, ມີອົງການປົກຄອງທ້ອງຖິ່ນ ແລະ ບັນດາທະນາຄານທຸລະກິດເຂົ້າຮ່ວມ.
    ທ່ານ ນວນຕາ ແກ້ວມະນີ ກ່າວວ່າ: ກອງປະຊຸມຄັ້ງນີ້ຈັດຂຶ້ນເພື່ອເປັນເວທີໜຶ່ງເປີດໂອກາດໃຫ້ບັນດາທະນາຄານທຸລະກິດ, ບໍລິສັດ ແລະ ນັກທຸລະກິດພາຍໃນແຂວງໄດ້ແລກປ່ຽນຄຳຄິດຄຳເຫັນ ເພື່ອໃຫ້ຮັບຮູ້ເຂົ້າໃຈກ່ຽວກັບການຈັດຕັ້ງປະຕິບັດນະໂຍບາຍສິນເຊື່ອທັງ 2 ນະໂຍບາຍຄື: ນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນຍິ່ງຂຶ້ນ. ປັດຈຸບັນ ທຫລ ໄດ້ມີຫຼາຍວຽກຈຸດສຸມໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມກໍຄືການປະຕິບັດວາລະແຫ່ງຊາດ ກ່ຽວກັບການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເພື່ອສຸມໃສ່ແກ້ໄຂບັນຫາເຄັ່ງຮ້ອນດ້ວຍຫຼາຍມາດຕະການ. ຄຽງຄູ່ກັບການຄຸ້ມຄອງເງິນຕາຕ່າງປະເທດດ້ວຍການປະຕິບັດນະໂຍບາຍເງິນຕາດ້ວຍເຄື່ອງມືທີ່ເປັນປົກກະຕິ, ທຫລ ຍັງໄດ້ມີນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ ຊຶ່ງເປັນວຽກທີ່ນອນໃນນະໂຍບາຍເງິນຕາ.
    ທ່ານ ໂພໄຊ ມະຫາລາດ ຫົວໜ້າພະແນກຄຸ້ມຄອງທະນາຄານທຸລະກິດໄດ້ຜ່ານຂໍ້ຕົກລົງ2 ສະບັບຄື: ຂໍ້ຕົກ ລົງ ວ່າດ້ວຍການຈັດຕັ້ງປະຕິບັດນະໂຍບາຍສິນເຊື່ອເພື່ອກະຕຸ້ນເສດຖະກິດ ແລະ ນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ, ຂໍ້ຕົກລົງວ່າດ້ວຍການຜັນຂະຫຍາຍນະໂຍບາຍສິນເຊື່ອເພື່ອກະຈາຍແຫຼ່ງທຶນສູ່ທ້ອງຖິ່ນ ແລະ ວ່າດ້ວຍການຜັນຂະຫຍາຍນະໂຍບາຍສິນເຊື່ອເພື່ອກະຕຸ້ນເສດຖະກິດ ຊຶ່ງຂໍ້ຕົກລົງ2 ສະບັບປະກອບມີ6 ໝວດ 24 ມາດຕາໄດ້ກໍານົດເງື່ອນໄຂ, ຂັ້ນຕອນ ແລະ ກົນໄກການຈັດຕັ້ງປະຕິບັດໃຫ້ເປັນອັນລະອຽດເພື່ອຄວາມເປັນເອກະພາບ ແລະ ມີປະສິດທິຜົນ.
ຂ່າວ-ພາບ: ລັດຕະນາ ແສງສຸວັນ